د اروپا د پارلمان دوو غړو ویلي چې د اروپايي ټولنې د هغو کډوالو د لېږد او منلو په اړه له روانډا سره خبرې پیل شوې چې په اروپايي ټولنه کې د قانوني استوګنې حق نه لري. استازو په وینا، روانډا له دې طرحې هرکلی کړی، خو خبرې لا هم په لومړنیو پړاوونو کې دي او تر اوسه هېڅ هوکړه نه ده شوې.
قطر کې د طالبانو سفارت ویلي چې د دوی سفیر محمد سهیل شاهین په دوحه کې د ترکیې له نوي ټاکل شوي سفیر یعقوب جایماز اوغلو سره په لیدنه کې د سیاسي، اقتصادي او تعلیمي همکاریو په تړاو خبرې کړې دي.
د افغانستان لپاره د روسیې د ولسمشر ځانګړي استازي ضمیر کابلوف په اسلاماباد کې یوې غونډې ته وویل چې مسکو د یوه سولهییز او له اقتصادي پلوه پر ځان بسیا افغانستان غوښتونکی دی.
د افغانستان کرېکټ بورډ د لوړو مهارتونو او ظرفیت لوړونې څانګه د روانې اکتوبر میاشتې له لومړۍ اونۍ د پلازمېنې په ګډون د زونونو په کچه په بېلابېلو ولایتونو کې د «تندر» په نوم د چټکو توپ اچوونکو د ازموینې او موندنې لړۍ پیلوي. دغه بهیر به د اکتوبر له ۴مې پیل او تر ۲۷مې به دوام وکړي.
د امریکا ولسمشر ډونالډ ټرمپ ویلي، متحده ایالات له ایران سره په جګړه کې له شپږو میاشتو راهیسې ښکېل دي او د هغه په وینا، د ایران پوځي ځواک «په بشپړه توګه له منځه تللی» او دغه هېواد «تر ډېره ویجاړ شوی» او ډير ژر به مهم پرمختګونه رامنځته شي.
افغانستان کې د طالبانو له لوري پر رسنیو له ګڼو محدودیتونو سره سره کندهار کې د «سماءامید» په نوم یوې راډيو د چهارشنبې په ورځ په نشراتو پیل وکړ. د دغې راډيو بنسټګر رفیعالله امید وايي، موخه یې د ټولنې اړتیاوو ته په کتو د مسلکي، باکیفیته او هر اړخیزو خپرونو وړاندې کول دي.
د روسیې د بهرنیو چارو وزیر سرګي لاوروف به د تلې په ۱۳مه مسکو کې د افغانستان په اړه د «مسکو فارمټ» غونډې په څنډه کې د طالبانو د بهرنیو چارو له وزیر امیرخان متقي سره وګوري.
د افغانستان د ازادۍ جبهې د سیاسي کمېټې مشر داوود ناجي وایي، د دوی وسلهواله ډله هېواد د طالبانو له «جنسیتي تبعیض، سیاسي استبداد، درو وهلو او شکنجو څخه ازادوي.
د زېمبابوې حکومت ویاند وايي، د دغه هېواد د پلازمېنې اړوند سیمه کې د یوې چورلکې د رالوېدو له امله یو میلیونر او نوموتی سوداګر، ۳ مسافر او ۲ پیلوټان مړه شوي دي. دغه پېښه نن مازدیګر د زېمبابوې د پلازمېنې په ماروندیرا سیمه کې رامنځته شوې ده.
بلخ کې د طالبانو والي محمد یوسف وفا د ایران د سفارت له مرستیال سیدحسن مرتضوي سره په مزارشریف کې لیدلي دي. دواړو لوریو د اړیکو پر پیاوړتیا، د سوداګرۍ پر چټکتیا او منظم والي، او د سرحدي سیمو پر امنیت خبرې کړې دي.
په جیوا کې د ملګرو ملتونو د بشري حقونو شورا د غونډې پر مهال د افغانستان دایمي استازولۍ د اسراییل له لوري د نړیوال بشردوستانه قانون او بشري حقونو سرغړونې په کلکه وغندلې او د یوه خپلواک فلسطیني دولت د جوړېدو په ملاتړ یې د افغانستان پر پخواني دریځ ټینګار کړی.
په افغانستان کې د چین سفیر ژاو شینګ په کابل کې د خپلې درې کلنې دندې په پای کې د چین او افغانستان اړیکې د پراختیا په حال کې بللې او ویلي یې دي چې بیجینګ له شته ننګونو سره سره د دواړو هېوادونو د راتلونکو همکاریو په اړه ډاډ لري.
سلام وطندار راډیو د اقتصادي ستونزو له امله خپل ۱۵ کارکوونکي له دندو ګوښه کړي دي. دغې راډیو د چهارشنبې په ورځ افغانستان انټرنشنل ـ پښتو ته د دغو کارکوونکو ګوښه کېدل تایید کړل.
د ناټو سرمنشي مارک روټه ویلي چې اروپا باید په راتلونکو لسو کلونو کې د ایران د اټومي وړتیا په نښه کولو توان ترلاسه کړي او په خپلواکه توګه دا ډول پوځي عملیات ترسره کړای شي.
د طالبانو د صنعت او سوداګرۍ وزیر نورالدین عزیزی د بېلاروس په پلازمېنه منسک کې د دې هېواد د کرنې له وزیر سره لیدلي. د یاد وزارت په وینا، عزیزي په دې لیدنه کې له بېلارسي چارواکو سره افغان کارګرو ته د کار موندنې په فرصتونو، کاري ویزو او بانکوالۍ خبرې کړې دي.
د هرات لپاره د طالبانو د امنیه قومندانۍ ویاند وايي، په اسلامکلا بندر کې لګېدلی اور په بشپړ ډول مهار او مړ کړای شوی دی. د نوموړي په وینا، د اور لمن له پراخېدو مخنیوی شوی دی، خو له دغې پېښې په رارسېدلو ویډیوګانو او انځورونو کې لیدل کېږي، چې یو شمېر موټر په بشپړ ډول سوځېدلي دي.
د افغانستان لپاره د پاکستان ځانګړي استازي محمد صادق خان ویلي، په افغانستان کې د امنیتي ننګونو د هواري لپاره باید ملګري ملتونو، د اسلامي همکاریو سازمان او د شانګهای همکاریو سازمان په ګډه اقدام وکړي.
په کابل کې د سلام پوهنتون مسوولانو افغانستان انټرنشنل ته ویلي چې طالبانو د دغه خصوصي پوهنتون د فعالیت د درولو امر کړی دی.
اکانومېسټ مجلې په یوه راپور کې لیکلي چې د طالبانو د منزوي کولو لپاره د امریکا او اروپا هڅو نږدې هېڅ پایله نه ده ورکړې او لوېدیځ هېوادونه باید له دې ډلې سره د تعامل نوې لارې ولټوي.
د ایران د خراسان رضوي ولایت د سرحدي ځواکونو قوماندان وايي چې د روان کال په لومړۍ نیمايي کې یې دغه ولایت ته د ناقانونه ننوتلو په تور ۱۴۵ زره افغانان نیولي او بېرته یې افغانستان ته ستانه کړي دي.
ټایم مجلې د افغان نجونو د زدهکړو ملاتړې او د «سوله» ښوونځي شریکه بنسټګره او مشره شبانه بسیج راسخ د ۲۰۲۶ کال د ۱۰۰ اغېزناکو ځوانو څېرو په نوملړ کې شامله کړې ده. په دې کلني نوملړ کې هغه سل کسان شامل دي چې په خپلو برخو کې مهم کارونه کوي او راتلونکی بدلوي.