د خوست ولایت لپاره د طالبانو د رسنیو دفتر وايي، د دغه ولایت لپاره د دوی د مرافعه محکمې رييس عینالله خلیل په غزني کې په یوې ټرافیکي پېښه کې ومړ، خو د پېښې د څرنګوالي په تړاو څه نهدي ویل شوي. یاد دفتر د هغه مړینه د «ټولنې» لپاره ستره ضایعه بللې ده.
د افغانستان لپاره د پاکستان پخواني ځانګړي استازي اصف دراني د بلوچستان په کویټې ښار کې د وروستي ځانمرګي برید په تړاو د طالبانو د غبرګون په اړه نیوکه کړې او ویلي یې دي چې طالبان د ورته بریدونو پر وړاندې انتخابي او دوهګونی چلند کوي.
د طالبانو د ۲۰۳ منصوري قول اردو قومندان ملا محمد خان دعوت د خوست ولایت اړوند ډیورند کرښې په اوږدو کې د طالبانو له پوستو لیدنه او د وضعیت ارزونه یې کړې ده. دغه قومندانۍ وايي، په هېڅ صورت به یوه لوېشت خاوره هم چاته پرېنږدي.
د بامیانو د بودا مجسمو د نړولو ۲۴مې کلیزې په مناسبت «له بودا سره شپه» په نوم څوارلسم کلتوري پروګرام د سويډن په پلازمېنه سټاکهولم کې ترسره شو. دغه پروګرام د طالبانو له لوري د بامیانو د بودا مجسمو د ویجاړلو د یاد ساتلو او د فرهنګي میراثونو د ارزښت په اړه د پوهاوي لپاره جوړ شوی و.
د طالبانو او پاکستان ترمنځ د کړکېچ او د سوداګریزو لارو د پرلهپسې تړل کېدو له امله د پښتونخوا په بازارونو کې د وچو مېوو بیې په بې ساري ډول لوړې شوې دي. سوداګر وايي، د عرضې کمښت او د اختر له رانږدې کېدو سره د تقاضا زیاتوالي نرخونو لا لوړ کړي دي.
امریکایي رسنۍ اکسیوس د دوو امریکایي چارواکو له قوله راپور ورکړی، چې د امریکا ولسمشر ډونالډ ټرمپ د څو عربي او اسلامي هېوادونو له مشرانو غوښتي، که له ایران سره د جګړې د پای ته رسولو تړون وشي، نو دغه هېوادونه دې له اسراییل سره د سولې «ابراهیمي تړون» ته ورګډ شي.
د افغانستان د بشري حقونو د مدافعینو کمېټې په هند کې د افغان کډوالو د وضعیت په اړه ویلي، چې وروستیو اونیو کې پر افغان کډوالو فشارونه زیات شوي او یو شمېر یې د اېستلو له ګواښ سره مخ دي. یادې کمېټې له هند غوښتي، چې د افغان کډوالو ځانګړی وضعیت په پام کې ونیسي او له اېستنې یې ډډه وکړي.
د امریکا جمهوريپال سناتور لینډسي ګراهام خبرداری ورکړی، که سعودي عربستان، قطر او پاکستان له ابراهيمي تړون سره له يو ځای کېدو څخه انکار وکړي، «دا به زموږ د راتلونکو اړیکو لپاره جدي پایلې ولري او دغه د سولې وړاندیز به د منلو وړ نه وي».
د طالبانو د پکتیکا ولایت امنیې قوماندانۍ ویلي، چې د دغه ولایت د ارګون ولسوالۍ په «دهنه» سیمه کې درې تنه ځوانان د اوبو په یوه بند کې ډوب شوي او مړه شوي دي.
د طالبانو د لوړو زدهکړو وزارت د زدهکړیالانو د خدمتونو او همغږۍ رييس فضلکریم صدیقي وايي، دښمن د محصلینو پر فکري انحراف کار کوي. هغه زیاتوي، په همدې موخه باید د محصلینو د ظرفیت لوړونې په برخه کې «فکري روزنې» ته جدي پاملرنه وشي.
د طالبانو د کورنیو چارو وزارت ویلي چې د جرمونو پر ضد د مبارزې طالب پولیسو یې په تېرو ۲۴ساعتونو کې د هېواد په نهو ولایتونو کې ۲۱کسان د غلاوو او جعلي پیسو د کارونې په تړاو نیولي دي.
د طالبانو د کډوالو ستونزو ته د رسېدنې عالي کمېسیون دارالانشاء وايي، پاکستان او ایران یوازې پرون (یکشنبه د غبرګوي ۳مه) له بېلابېلو لارو ۸۸۳ کډوالې کورنۍ چې شمېر ۴۵۹۲ تنه کېږي، جبري ډول افغانستان ته ستانه کړي.د دغه کمېسیون په وینا، په همدې ورځ ۱۲۵۶ کورنۍ خپلو سیمو ته لېږدول شوي دي.
د ښځو د خوځښت شبکې او د ازادۍ لپاره د افغان مېرمنو متحد غورځنګ د طالبانو د «زوجینو د تفریق اصولنامې» د توشیح په غبرګون کې ویلي، چې دغه سند د افغانستان د نجونو د غلامۍ د مشروعیت ورکولو لپاره یو «شرموونکی قانون» دی.
په داسې حال کې چې ۶۴ سلنه افغانان په فقر کې ژوند کوي او ۱۴ میلیونه یې د لوږې له جدي ګواښ سره مخ دي، طالبانو د خپل مشر اختریز پیغام په لوړ لګښت په رنګه بڼه چاپ او کابو په ټولو ولایتونو کې یې وېشلی دی. څارونکي وايي، پر یوه فقر ځپلي ولس واکمن ته دغه ډول د «ځان ښودنې» چاره نه ښايي.
د حالوش په نوم د بشري حقونو بنسټ ادعا کړې، چې د ایران پولهساتو ځواکونو د سیستان او بلوچستان ولایت اړوند د «بچهراهي» په سیمه کې پر هغو افغان کډوالو ډزې کړې چې غوښتل یې ایران ته ننوځي. د راپور له مخې، په دغه پېښه کې لږ تر لږه درې افغانان وژل شوي او څلور نور ټپیان شوي دي.
د عوامي نشنل ګوند مشر اېمل ولي خان پر پاکستاني رياست نيوکې کړي او ويلي يې دي، «په خيبرپښتونخوا او بلوچستان ايالتونو کې پرله پسې خرابېدونکی امنيتي وضعيت د رياست د ناکامۍ څرګند نښه دی».
په ننګرهار کې ځایي طالب چارواکو ویلي، چې د دغه ولایت په لعلپورې ولسوالۍ کې یې هغه وسلې او د نظامي وسلو پرزې نیولي چې د دوی په وینا له پاکستان څخه افغانستان ته د قاچاق په توګه راوړل کېدلې.
افغانستان کې د طالبانو له بیا واکمنېدو راهیسې د فقر کچه لوړه شوې او له ایرانه د میلیونونو افغان کارګرو له شړلو وروسته له دغه هېواد سره سرحدي ولایت هرات کې د غلاوو ګراف ډېر لوړ شوی دی.د موندنو لهمخې، په تېرو ۶ میاشتو کې ۸۸۲ کسان یوازې په همدې ولایت کې د غلاوو په تړاو نیول شوي دي.
د سارک هېوادونو سازمان د سوداګرۍ او صنایعو خونې پخواني مشر افتخار علي ملک ویلي، پاکستان او افغانستان د خپل ستراتېژیک جغرافیایي موقعیت له امله د مرکزي اسیا، سویلي او ختیځې اسیا د انرژۍ د بازارونو ترمنځ یو طبیعي پل جوړولای شي.
د امریکا د ولسمشر ډونالډ ټرمپ مشر زوی ټرمپ جونیور ویلي، چې پلار یې ژمنه کړې وه څو ایران د اټومي وسلو له ترلاسه کولو راوګرځوي او د هغه په وینا، اوس هم د همدې موخې د عملي کولو په لور ګامونه اخیستل کېږي.
د پاکستان د بشري حقونو کمېسيون (اېچ ار سي پي) په بلوچستان ایالت کې پر زياتېدونکې ناامنۍ ژوره اندېښنه څرګنده کړې او ویلي یې دي چې«په دغه ايالت کې د ناامنۍ زياتېدونکې پېښې د حکومتي واک د کمزورۍ ښکارندويي کوي».