ننګرهار کې معتبرو فرهنګي سرچینو افغانستان انټرنشنل – پښتو ته ویلي چې طالبان په جلال اباد ښار کې د غازي امان الله خان په مقبره کې د لیلامي توکو مارکېټ جوړوي. سرچینې وایي، ننګرهار کې د طالبانو د ولایت چارواکي په دغه قرارداد کې ښکېل او په دغه ځای کې ۶۲ غرفې جوړوي.
د هلمند د موسیکلا ولسوالۍ د عمومي دولتي روغتون یو شمېر ناروغانو او پایوازانو افغانستان انټرنشنل ته ویلي چې سهار روغتون ته پر وخت ورځي، خو د ډاکټرانو او نورو کارکوونکو د کار تر پیل پورې شاوخوا یو ساعت انتظار باسي.
د کونړ د سید جمالالدین افغان پوهنتون یوه محصل افغانستان انټرنشنل- پښتو ته ویلي چې د طالبانو د امر بالمعروف ماموران د محصلانو ږیرې ګوري او د هغو کسانو د پوهنتون او لیلیې کارتونه اخلي چې ږیره یې لنډه کړې وي.
روغتیايي چارواکي وايي چې د خیبر پښتونخوا په بنو ولسوالۍ کې د پولیو د یوې نوې پېښې له ثبتېدو سره په روان کال کې په ټول پاکستان کې د دې ناروغۍ د مثبتو پېښو شمېر پنځو ته ورسېد. دا نوې پېښه د بنو ولسوالۍ د ډومېل په خندر خانخېل سیمه کې په یوه ۱۷ میاشتنۍ نجلۍ کې تایید شوې ده.
په نورستان کې د طالبانو او د دوی د مخالفو وسلهوالو جبهو د نښتو د دوام له خبرونو سره هممهاله، د طالبانو د لوی درستیز ویاند د دغو بریدونو تر شا د « بهرني دښمن» د لاس لرلو ادعا کړې او ګواښ یې وکړ، چې ځواکونه به یې د « ناامنۍ» هره هڅه په پرېکنده ډول وځپي.
د طالبانو د کورنیو چارو وزارت ویاند عبدالمتین قانع په کابل کې د خبریالانو د مصونیت کمېټې په یوه غونډه کې له رسنیو وغوښتل چې د اوازو او جعلي خبرونو د خپرېدو مخه ونیسي او د معلوماتو تر خپرولو وړاندې د هغو له سموالي ډاډ ترلاسه کړي.
سرچینو افغانستان انټرنشنل- پښتو ته ویلي چې د تېر جمهوري نظام د ملي امنیت شورا د دفتر د فرهنګي چارو ریاست پخوانی مرستیال مولوي عبدالغني بلوچ طالبانو په لس کاله بند محکوم کړی دی. د سرچینو په وینا په بند کې د نوموړي روغتیايي حالت د اندېښنې وړ دی.
پر شمالي غزه د اسراییل په هوايي برید کې د فلسطین د وسله والې ډلې د پوځي څانګې مشر وژل شوی دی. وژل شوی قوماندان پر اسراییل د ۲۰۲۳ کال د اکتوبر د ۷مې د بریدونو له مشرانو بلل شوی.
د مراکش شاهي ماڼۍ ویلي چې پاچا شپږم محمد د سېشنبې په ورځ فاطمه الزهرا المنصوري د دغه هېواد د لومړۍ ښځینه لومړۍ وزیرې په توګه وټاکله.
طالبانو د پروان ولایت له صیاد څخه کابل ښار او نوي کابل پروژې ته د پاکو اوبو د لېږدولو پروژې د تخنیکي او ډیزاین چارو د پیل مراسم ترسره کړل. د طالبانو د دولتي شرکتونو رییس ویلي، چې د اقلیمي بدلونونو له امله د کابل د ځمکې لاندې اوبه له جدي بحران سره مخ دي.
د طالبانو د ریاست الوزرا اداري مرستیال عبدالسلام حنفي په کابل کې د چین له سفیر ژاو شِینګ سره د مخه ښې لیدنه کړې. حنفي د افغانستان او چین د اړیکو پر پراختیا ټینګار کړی او هیله یې څرګنده کړې چې چین په نړیوالو ناستو او د ملګرو ملتونو امنیت شورا کې له طالبانو «قوي ملاتړ» وکړي.
د پېښور پولیس وايي، د یوه افغان کس د وژنې په قضیه کې یې یوه افغانه ډاکټره او د هغې مېړه نیولي دي. نیول شوې ډاکټره زندان ته لېږل شوې او مېړه یې لا هم د پولیسو په توقیف کې دی.
سرچینو افغانستان انټرنشنل ته خبر ورکړی، چې طالبانو په کندهار ولایت کې په پخواني حکومت کې د نشهيي توکو پر وړاندې د مبارزې رییس ګلمحمد شکران او د هغه زوی نذیراحمد شکران نیولي دي. د سرچینو په وینا، د طالبانو وسله والو هغوی د کندهار ښار د یوولسمې ناحیې په عینو مینه کې نیولي دي.
بریتانیا د سېشنبې په ورځ پر ایران نوي بندیزونه پلي کړل چې د انرژۍ، تېلو، طبیعي ګاز، پتروشیمۍ او ټکنالوژۍ برخې رانغاړي. دا بندیزونه د بریتانیا مالي نظام او بازارونو ته د ایران لاسرسی نور هم محدودوي. لندن دا بندیزونه د سپټمبر پر اتمه اعلان کړي وو.
د طالبانو د بهرنیو چارو وزارت وايي، په کابل کې یې د پاکستان د سفارت شارژدافیر احضار کړی او د نورستان کامدېش ولسوالۍ ته له ډیورنډ کرښې د وسله والو کسانو د اوښتو په تړاو یې خپل اعتراض لیک ور سپارلی.
سرچینو افغانستان انټرنشنل- پښتو ته ویلي چې پخوانی افغان خبریال عزیز وطنوال شاوخوا یو نیم کال کیږي چې په بګرام زندان کې ساتل کېږي او ذهني او رواني حالت یې د اندېښنې وړ دی. د سرچینو په وینا، نوموړي ته له ډاکټر سره د لیدو اجازه هم نه ورکول کېږي.
د طالبانو د کورنیو چارو وزارت وايي، چې د غزني، سمنګان، فاریاب او نیمروز په ګډون په پنځو ولایتونو کې ۳۶ تنه د غلا، باج اخیستنې او نشهيي توکو د پلورلو په تور نیول شوي. د وزارت په وینا، د فراه ولایت په شیخ ابونصر فراهي بندر کې یې یو تن له نږدې لس ټنه اومو نشهيي توکو سره نیولی.
د جنرال سمیع سادات په مشرۍ متحده جبهه وايي، چې نن سې شنبه د تلې پر ۷مه یې د غور لپاره د طالبانو والي پر دفتر برید کړی دی. د جبهې په وینا، په برید کې د طالبانو د والي یو ساتونکی وژل شوی او اته تنه نور ټپیان دي. طالبانو ویلي، چې بریدګر یې وژلی دی.
یو شمېر لوستې افغانې ښځې وايي، د طالبانو د بندیزونو له امله یې په افغانستان کې د زده کړو، کار او مسلکي پرمختګ فرصتونه له منځه تللي او د ښه راتلونکي لپاره له خپلو ماشومانو او کورنیو سره په خطرناکو لارو ګاونډیو هیوادنو ته اړې شوې دي.
د طالبانو یو شمېر مخالفانو د پاکستان د نړیوال پارلماني کانګرس په نوښت په اسلام اباد کې د «افغانستان ستونزمن وضعیت او د سولې لار» په نوم جوړ کنفرانس کې ګډون کړی. د کنفرانس یوې ګډونوالې ستاره ایاز افغانستان انټرنشنل ته وویل، چې په کنفرانس کې امان الله پیمان او طاهر زهیر ګډون کړی.
د طالبانو د صنعت او سوداګرۍ وزارت وايي، ددغه وزارت وزیر نورالدین عزیزي د یوه پلاوي په مشرۍ د بېلاروس په بلنه دغه هېواد ته سفر کړی دی. د سفر موخه د بېلاروس د صنعت په دویم نړیوال نندارتون کې ګډون او د دواړو هېوادونو ترمنځ د اقتصادي او سوداګریزو همکاریو پراخول ښودل شوي دي.