پوولیسو یو ۴۵ کلن بریتانوی، چې پر دوو یهودانو د چاقو ګزار په تړاو د قتل په هڅه تورن دی، نن جمعې په ورځ، د لندن یوې محکمې ته وړاندې شو. پولیسو دغه برید یو «ترهګریز عمل» بللی دی. دا پېښه د لندن په شمالي سیمه «ګولډرز ګرین» کې شوې.
متحده عربي امارات وایي چې ایران د هرمز تنګي په اړه د هر ډول یو اړخیزو پرېکړو او ترتیباتو په برخه کې د باور وړ نه دی، په داسې حال کې چې د ایران جګړې د پای ته رسولو هڅې لا هم له کړکېچ سره مخ دي.
سیمهییزې سرچینې وايي، چې د شمالي وزیرستان د مرکز میرانشاه په درپهخېل کې ناڅرګندو وسلهوالو یو قومي مشر ملک سیفالله په ډزو وژلی. د میرانشاه پولیسو ویلي، چې له دې پيښې وروسته د درپهخېل قوم او وسلهوالو ترمنځ په نښتو کې ۳ کسان وژل شوي او اته نور ټپیان دي.
په اروزګان کې د طالبانو امنیتي چارواکي وايي، چې د مرکز ترینکوټ په ګډون په ټولو ولسوالیو کې یې د جوماتونو د امنیت لپاره ځانګړي تدابیر نیولي وو. طالبانو ویلي، چې نن هېڅ ډول امنیتي پېښه نه ده رامنځته شوې، خو د شته ګواښونو په اړه یې نور جزییات نه دي ورکړي.
د لبنان روغتیا وزیر وايي، چې د دغه هېواد پر نبطیه سویلي ښار د اسراییل په بریدونو کې دوه کسان وژل شوي او لږترلږه ۱۰ نور ټپیان دي. د لبنان دولتي خبري اژانس نن سهار پر حارث او الطیري ښارونو هم د اسراییل له بریدونو خبر ورکړی دی.
د اوکراین د اودیسا والي اولېه کیپر ویلي، چې د روسیې د بېپیلوټه الوتکو د تېرې شپې په بریدونو کې د اودیسا بندري بنسټونه زیانمن شوي او دوه تنه ټپیان شوي دي. دغو بریدونو په ملکي ودانیو کې اورلګېدنې هم رامنځته کړې دي.
د ایران د بهرنیو چارو وزیر عباس عراقچي د امریکا د دفاع وزارت پر ارقامو نیوکه کړې او ویلي یې دي، چې د اسراییل د لومړي وزیر بنیامین نتنیاهو په لمسونه روانو جګړو تر اوسه امریکا ته شاوخوا ۱۰۰ ملیارده ډالره نېغ په نېغه مالي زیان اړولی دی.
د طالبانو د ټولګټو چارو وزارت خبر ورکړی، چې د دغه وزارت د اوسپنې پټلۍ مرستیال محمداسحاق صاحبزاده د طالبانو په استازیتوب د قزاقستان هېواد په پلازمېنې استانه کې د اوسپنې پټلۍ په ۴۰م کنفرانس کې ګډون کړی.
سياېناېن د باخبره سرچینو په حواله راپور ورکړی، پاکستاني منځګړي تمه لري چې ایران به د ډونالډ ټرمپ لهخوا د سولې وړاندیز پخوانۍ نسخې تر ردولو وروسته یو اصلاح شوی وړاندیز وړاندې کړي. د سرچینو په وینا؛ دغه وړاندیز ښايي تر جمعې ورځې پورې اعلان شي.
د کډوالو په چارو کې د ملګرو ملتونو عالي کمېشنرۍ (UNHCR) ویلي، په سیمه کې د جګړو د زیاتوالي له امله مېلیونونه خلک اړ شوي چې خپل کورونه پرېږدي او امن ځایونو ته پناه یوسي چې دې چارې تر ټولو ډېر پر ماشومانو ناوړه اغېزه کړې.
د بېپولې خبریالانو د سویلي اسیا مشره سیلیا مرسیه وايي، چې په ۲۰۲۵کال کې د طالبانو لهخوا د نیول شويو ۱۹ خبریالانو له ډلې څلور یې لاهم په زندان کې دي. هغه وايي: «هغه خبریالان چې له جلاوطنه رسنیو سره کار کوي په ځانګړي ډول په نښه کېږي».
د پاکستان د کارګرو فدراسیون د بلوچستان څانګې سرمنشي پیر محمد کاکړ افغانستان انټرنشنل پښتو ته ویلي، چې د زرګونه افغان کارګرو د اېستلو له امله پاکستان ته سخت زیان رسېدلی او افغانستان ته د افغان کارګرو له ستنېدو سره د بلوچستان عاید خورا کم شوی دی.
د خیبر پښتونخوا په مانسهره کې د دوو جلا ټرافیکي پېښو له امله پنځه کسان مړه او شپږ نور ټپیان شوي دي. دغه پېښې په دودیال او کالج دوراهه سیمو کې رامنځته شوې دي. د ژغورنې ادارې ویلي، چې په لومړۍ پېښه کې درې کسان مړه شوي دي.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ له طالبانو غوښتي، چې د مطبوعاتو د ازادۍ نړۍوالې ورځې په مناسبت ټول نیول شوي خبریالان سملاسي او بې له شرطه خوشې کړي.
په کندهار کې د طالبانو رسنیز دفتر خبر ورکړی، چې د ملاهبت الله د حکم او د اړونده ادارو په لارښوونه او سپارښتنه د دغه ولایت په ژړۍ ولسوالۍ کې پر ۳زره او ۵۰۰ راستنو شویو کډوالو کورنیو د ځمکو د وېش لړۍ پیل شوه.
د طالبانو د صنعت او کانونو خونې ویلي، ټاکل شوې په کابل کې د صنعت او کانونو د اونۍ پنځم ملي او نړۍوال نندارتون جوړ شي چې پهکې به د بېلابېلو هېوادونو صنعتکاران هم ګډون وکړي.
په بادغیس کې د طالبانو د احصایې او معلوماتو رییس ضیاءالدین بختیار خبر ورکړی، چې په تېر ۱۴۰۴کال کې یې په دغه ولایت کې پر خلکو ۶۶زره او ۸۴۲ پېژندپاڼې وېشلې دي. د هغه په وینا؛ له دې ډلې ۳۵زره او ۳۳۰ برېښنایي او پاتې ۳۱زره او ۵۱۲ نورې پېژندپاڼې کاغذي وي.
د بېځایه شویو نړۍوال سازمان د فیفا او اسیا فوټبال فدراسیون له هغه پرېکړو هرکلی کړی، چې په نړۍوالو سیالیو کې د افغانستان د فوټبال ښځينه جلاوطنه لوبغاړو ته د لوبېدو رسمي اجازه ورکوي.
د پاکستان د پخواني لومړي وزیر او د تحریک انصاف ګوند بنسټګر عمران خان وکیل سلمان صفدر ویلي، چې د نوموړي سترګې په زندان کې ۸۵سلنه لید له لاسه ورکړی. هغه د اسلاماباد سترې محکمې ته ویلي، چې عمرانخان او بشرا بيبي په زندان کې له جدي روغتیايي ستونزو سره مخ دي.
د سره صلیب نړیوالې کمېټې ویلي، چې د فبرورۍ له نیمایي د طالبانو او پاکستان ترمنځ د تاوتریخوالي د زیاتېدو او د لارو د دوه میاشتني بندښت له امله لسګونه زره خلک د خوړو له ناورین سره مخ شوي دي.
د پاکستان د پنجاب ایالت په چنیوټ ولسوالۍ کې د یوه کور چت پرېوتو له امله د یوې کورنۍ څلور غړي مړه او یوه مېرمنه سخته ټپي شوې ده. ځایي چارواکي وایي، چې ټپي شوې مېرمنه یې د درملنې لپاره روغتون ته لېږدولې ده.