دریو پاکستاني سرچینو رویټرز ته ویلي، د چین د منځګړیتوب هڅو، چې د ولسمشر شي جینپینګ پیغام هم پکې شامل و، د پاکستان او طالبانو ترمنځ د جګړې په کمولو کې مرسته کړې ده.د چین د بهرنیو چارو وزارت ویلي، تر ټولو عاجل کار دا دی چې جګړه پراخه نه شي او دواړه هېوادونه خبرو ته کښېني.
د هرات ولایت په انجیل ولسوالۍ کې د ۳۱ میلیونه او ۵۰۰ زره افغانیو په لګښت د غالۍ اوبدلو یو مرکز پرانېستل شوی. دغه مرکز د یوناما په مالي ملاتړ جوړ شوی او نږدې ۴۰۰ راستنو شویو کډوالو ته پکې د غالۍ اوبدنې او اړوندو مسلکي زده کړو زمینه برابره شوې ده.
د پاکستان د بهرنیو چارو وزارت ویاند طاهر اندرابي، نن د پنجشنبې په ورځ ( کب په ۲۱مه) ویلي چې کابل ته د درې کسیز پاکستاني پلاوي سفر رسمي نه و او دغه کسان په شخصي ډول افغانستان ته تللي.
د پاکستان لومړی وزیر شهباز شریف د پنجشنبې په ورځ د څو ساعته لنډ سفر لپاره سعودي عربستان ته تللی. د شریف سفرداسې مهال دی، چې بلومبرګ د نوموړي د ویاند له قوله راپور ورکړ چې پاکستان د منځني ختیځ د تاوتریخوالي په زیاتېدو سره چمتو دی د اړتیا په وخت کې د سعودي عربستان ملاتړ وکړي.
د ملامحمد حسن اخوند په مشرۍ د طالبانو د کابینې په غونډه کې پرېکړه شوې چې هېواد ته د بې اسنادو یا «یوه کیلۍ» موټرو د وارداتو او ګمرکي محصول کمولو موده د ۱۴۰۵ کال تر پایه وغځوي.
د پښتون ژغورنې غورځنګ لسګونه غړو د برېتانیا پارلمان مخې ته لاریون کړی او پر افغان ملکي وګړو یې د پاکستان بریدونه «بېرحمانه او وحشيانه» یاد کړي. لاریونوالو دغه بریدونه له نړۍوالو قوانینو او بشري ارزښتونو ښکاره سرغړونه بللې ده.
د افغانستان اماني صندوق اعلان کړی، چې په دغه هېواد کې یې د طالبانو نږدې پنځه کلنې واکمنۍ پرمهال له شاوخوا څلور مېلیونه افغان مېرمنو او نجونو سره مرسته کړې ده. یاد صندوق لیکلي، چې په دغه موده کې یې په ټول افغانستان کې د ښځو د پیاوړتیا په موخه د ډېرو پروژو ملاتړ کړی دی.
د طالبانو مرستیال ویاند حمدالله فطرت وايي، چې د پاکستان پوځ د خوست د علیشېرو - تریزو ولسوالۍ اړوند سیمو کې د ملکي کسانو پر کورونو او د کوچانو پر خېمو د هاوان او توپونو بریدونه کړي. نوموړي ویلي، چې په دغه بریدونو کې د ښځو او ماشومانو په ګډون ۴ کسه وژل شوي او درې نور ټپیان دي.
د طالبانو د کور او ښار جوړولو وزارت خبر ورکړی، چې د زابل ولایت په اړوندو سیمو کې یې بېرته راستنو شویو کډوالو ته د استوګنې نمرې وېشلې دي. د یاد وزارت په وینا؛ د کډوالو د دایمي مېشتېدو او مناسب استوګنځي برابرولو په موخه ټولټال ۳۳۹ نمرې پر اړمنو کورنیو وېشل شوې دي.
په هرات کې د طالبانو رسنیز دفتر ویلي، د دغه ولایت لپاره د یادې ډلې والي اسلام جار د افغانستان لپاره د ملګرو ملتونو سازمان او د کډوالو عالي کمېشنرۍ له استازو سره په لیدنه کې غوښتنه کړې چې د خوراکي او نورو اړینو توکو د پېرلو پرمهال د افغانستان کورني تولیداتو ته لومړیتوب ورکړي.
د طالبانو د امربالمعروف، نهې عن المنکر او شکایتونو اورېدو وزارت خبر ورکړی، چې د دوی محتسبانو په تېره یوه اونۍ کې د افغانستان په بېلابېلو ولایتونو کې ۹ کوډګر نیولي دي. د یاد وزارت په وینا؛ دغه کوډګر یې په ننګرهار، بلخ، بغلان، فراه، بدخشان او جوزجان ولایتونو کې نیولي دي.
د طالبانو عدلیې وزارت خبر ورکړی، چې د یادې ډلې د معاملاتو لارښوونې او عریضه لیکونکو چارو ریاست په سلواغې میاشت کې په کابل کې د معاملاتو لارښوونې ۱۹ دفترونه تړلي دي. یاد وزارت ویلي، چې په همدې اونۍ کې یې بیا درې نور دفترونه په هرات کې تړلي دي.
اسوشېټېډ پرېس خبري اژانس راپور ورکړی، چې د امریکا د بهرنیو چارو وزارت په پېښور کې خپله کونسلګري د تل لپاره تړي. دا د امریکا هغه ډيپلوماټيک ماموریت و، چې ډیورنډ کرښې ته نږدې او پر افغانستان د ۲۰۰۱کال تر برید مخکې د جګړې پرمهال او تر هغې وروسته د لوژستیک مهم مرکز ګڼل کېده.
د طالبانو سترې محکمې خبر ورکړی، چې په بلخ کې یې د یوې ښځې په ګډون شپږ کسه په دُرو وهلي دي. د یادې محکمې په خپرې شوې خبرپاڼه کې راغلي، چې دغه کسان یې د «زنا او الکولي مشروباتو د پلور» په تور په دُرو وهلي دي.
په بلخ کې د طالبانو امربالمعروف، نهې عن المنکر او شکایتونو اورېدو ریاست خبر ورکړی، چې د دوی محتسبانو په مزارشریف ښار کې د څارنې پرمهال ۶ سوداګر او هټۍوال د «احتکار او په لوړه بیه د توکو» د پلور په تور نیولي دي.
د بېلاروس د بهرنیو چارو وزیر ماکسیم رېژنکوف په یوې ټلویزیوني مرکه کې ویلي، چې له افغانستان سره د دغه هېواد د سوداګرۍ حجم په کال کې ۲۰۰ مېلیون ډالرو ته رسېدلی دی. هغه ويلي: «تېر کال موږ له افغانستان سره تر ۲۰۰ مېلیون ډالرو ډېره سوداګري لرله».
د طالبانو تر کنټرول لاندې د کډوالو ستونزو ته د رسېدنې عالي کمېسیون خبر ورکړی، چې پرون له ایران او پاکستان نه ۷۴ کورنۍ افغانستان ته ستنې شوې دي. طالبانو ویلي، چې ۳۲ نورې کورنۍ یې بیا خپلو سیمو ته لېږدولې دي.
د طالبانو د کډوالو او بېرته راستنېدونکو چارو وزارت خبر ورکړی، په روانه اونۍ کې ۲۱ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته بېرته افغانستان ته ستانه شوي دي.
د کندهار محبس د زندانیانو کورنۍ وايي، د مرکزي زندان دیوالونه نن یوازې د بند لپاره نهدي؛ بلکې د هغه سلګونه کسانو د چوپو فریادونو انعکاس دی، چې له ډېرې مودې راهیسې د ناروښانه برخلیک، له محکمې پرته سزا، زور او سپکاوي لاندې ساتل کېږي.
د خیبر پښتونخوا په شانګله، مانسهره او سوات ولسوالیو کې د چهارشنبې په سهار د سختو ورښتونو او تندر پرېوتو له امله څلور کسه مړه شوي دي. د شانګلې ولسوالۍ په لیلونای اچار سیمه کې پر یوه کور د تندر پرېوتو له امله د یوې ښځې او ماشوم په ګډون درې کسه مړه شوي دي.
په بلخ کې د طالبانو امنیه قوماندانۍ خبر ورکړی، چې د دغه ولایت د مزارشریف-حیرتان په لویه لار د شهیدانو دروازې ته نږدې د یوې ټرافیکي پېښې له امله دوه موټر چلوونکي مړه شوي دي. د یادې قوماندانۍ په وینا؛ د دغه موټر چلوونکو جسدونه د مزارشریف حوزوي روغتون ته لېږدول شوي.