د طالبانو د بهرنیو چارو وزارت د لومړي سیاسي ریاست رییس شعیب بریالي د مالیزیا د دفاع وزارت د سکرتر جنرال له مرستیال داتوک محمد یاني سره لیدلي دي. په مالیزیا کې د طالبانو سفارت ویلي، چې په دې لیدنه کې د دفاع وزارتونو ترمنځ د روزنیزو او تخنیکي همکاریو پر پراختیا ځانګړی بحث شوی دی.
روسیې د دویمې پرله پسې ورځې لپاره د اوکراین پر پلازمېنه کییف او یو شمېر نورو سیمو د بې پیلوټه الوتکو پراخ بریدونه کړي دي. اوکرایني چارواکي وایي، چې د دې بریدونو موخه د خلکو د ورځني ژوند ګډوډول او د پلازمېنې فلج کول دي.
د طالبانو د کانونو وزارت ویلي د ۱۴۰۵ کال د پلان له مخې یې په افغانستان کې د اساسي جیولوجیکي سروې بهیر پیل کړی دی. د وزارت په وینا، د سروې انجنیران هرات او کندهار ولایتونو ته تللي او ټاکل شوې روان کال په دریو زونونو کې د جیولوجیکي نقشو چارې بشپړې شي.
د قرغیزستان د ملي امنیت دولتي کمېټې کارکوونکو د نشهيي توکو د یوې قاچاق وړونکې ډلې فعالیتونه شنډ کړي دي. د یادې دولتي کمېټې د مطبوعاتي دفتر په وینا، دغې ډلې د افغانستان، تاجکستان او قرغیزستان پر مسیر د نشهيي توکو د انتقال او خرڅلاو لپاره یو نړیوال کانال جوړ کړی و.
د پاکستان کورنیو چارو مرکزي وزیر محسن نقوي وايي، حکومت به هېچا ته اجازه ورنه کړي چې د هېواد امنیت، امن او ثبات له خطر سره مخ کړي او له هغو کسانو سره به د قانون له مخې چلند وشي چې قانون په خپل لاس کې اخلي.
د ناروې شاهي ماڼۍ اعلان کړی، چې د دغه هېواد پاچا هارالد پنځم، د جمعې په سهار د اسلو پوهنتون په روغتون کې د ۸۹ کلونو په عمر وفات شو. هارالد د اروپا تر ټولو ډېر عمر لرونکی ژوندی پاچا و. نوموړی په دې وروستیو کې په وینه کې د باکتریايي انتان له امله په روغتون کې بستر شوی و.
په خیبر پښتونخوا کې په تېرو ۲۴ ساعتونو کې د ډزو، چاودنو او لاسي بم بریدونو په بېلابېلو پېښو کې لږ تر لږه پنځه کسان وژل شوي او ۲۴ نور ټپیان دي.
د ملګرو ملتونو د کډوالو عالي کمېشنرۍ ویلي، په نړۍ کې له ۴،۵ مېلیونه ډېر کسان له قانوني تابعیت څخه بې برخې او له همدې امله له ګڼو اساسي حقونو څخه محروم پاتې دي. دغه اداره په عمومي سرلیک کې لیکلي: «هر انسان د تابعیت حق لري».
د پاکستان او افغانستان د ګډې سوداګرۍ خونې مرستیال مشر ضیاالحق سرحدي وایي، چې د دواړو هېوادونو تر منځ د ټرانیزیټي لارو د اوږدې مودې تړل کېدو له امله پاکستان تر اوسه له پنځه میلیاردو امریکايي ډالرو ډېر سوداګریز زیان لیدلی دی.
د اسیا پراختیايي بانک خبرداری ورکوي چې د «النینو» اقلیمي پدیده ښايي په اسیا او ارام سمندر سیمه کې د خوړو له سخت کمښت سره د مخامخو خلکو شمېر ۸،۲ میلیونه نور زیات کړي. دغه بانک وايي، له ناورین مخکې د مرستو او چمتووالي اقدامات کولی شي د دې پدیدې اقتصادي او بشري اغېزې راکمې کړي.
سکای نیوز راپور ورکړی، چې په افغانستان کې د نړیوالو بشري مرستو د پام وړ کمښت د روغتیايي خدمتونو پر وړاندې ستونزې زیاتې کړي او ماشومان او بېوزله کورنۍ یې سختې اغېزمنې کړي دي.
سرچینې وایي د هلمند د سنګین ولسوالۍ په یو روغتیايي مرکز کې یوې قابلې له دندې څخه د ګوښه کېدو وروسته د زهرو ګولۍ خوړلي او ځان وژنه یې کړې. بل خوا په ننګرهار کې سیمه ییز طالب مسولین وایي، چې یو ځوان بهر ته د تګ لپاره د کورنۍ له خوا د پیسو د نه ورکړې وروسته ځان وژلی دی.
د جمهوري نظام پرمهال د چارو ادارې مشر فضلمحمود فضلي وايي، له طالبانو سره د نړیوالو هېوادونو د تعامل د سیاست پر مهال یو شمېر «تعاملمحورې» مدني او رسنیزې ډلې رامنځته شوې، خو اوس چې د طالبانو پر وړاندې د فشار خبرې زیاتې شوې، هماغه کسان د طالبانو د مخالفت په لیکو کې راڅرګندېږي.
ملګري ملتونه او د «ریچ» څېړنیزې ادارې په یوه نوي تحلیلي ارزونه کې، چې پنجشنبې (د وږې۵مه) خپره شوې، خبرداری ورکړی چې د لوږې، بېځایه کېدو او وچکالۍ دوام د افغانانو رواني روغتیا له جدي ګواښ سره مخ کوي.
د برېتانیا بهرنیو چارو مشترکالمنافع او پراختیا ادارې ویلي، سراج الدین حقاني او جلالالدین حقاني لا هم د دوی د بندیزونو په نوملړ کې دي. دوی زیاته کړې، چې پر یادو کسانو د سفر او د شتمنیو د کنګل بندیزونه دوام لري. دوی په دې اړه معلومات هم تازه کړي دي.
د ملګرو ملتونو د خوړو نړیوال پروګرام (ډبلیواېفپي) وايي، اروپايي ټولنې په افغانستان کې د اقلیمي بدلونونو پر وړاندې د مقاومت پیاوړتیا او د خوړو د سیمهییزو سیستمونو د ملاتړ لپاره ۱۵ میلیونه یورو مرسته کړې ده.
د اوکراین د شخصي پوست او کوریر شرکت «نووا پُشتا» وايي، د روسیې په بریدونو کې د پلازمېنې کییف ته څېرمه او د اوکراین په شمال کې د سومي ښار د دغه شرکت د توکو د وېش مرکزونه ویجاړ شوي دي.
د پاکستان د بلوچستان ایالت د دوکي ولسوالۍ په یوه سکرو کان کې د زهرجن ګاز د خپرېدو له امله د دوو افغان وګړو په ګډون درې کانکیندونکي مړه شوي دي.
پخوانۍ امریکايي ډېپلوماټه لورل میلر او د نړیوال بحران ډلې پخواني شنونکي ګریم سمیت د «امریکا وروسته افغانستان» په نوم د «فارن افرز» مجلې په پوډکاسټ کې ټینګار کړی چې د افغانستان د جګړې هېرېدو، په دې هېواد کې د امریکا د دوو لسیزو د حضور د پرېکړو او تېروتنو ارزونه ستونزمنه کړې ده.
د نیپال پوځ د هېواد په شمال کې د یو برېښناکوټ پروژې په تونل کې د بند پاتې شاوخوا ۱۰۰ کسانو د ژغورنې عملیات پيل کړي دي. دغه کسان د راسووا ولسوالۍ د اپر تریشولي د برېښناکوټ پروژې په تونل کې د سختو سېلابونو له امله بند پاتې دي.
په پاکستان کې د افغان کډوالو د بېرته ستنېدو له بهیر سره هممهاله، د خیبر پښتونخوا په پېښور او نورو سیمو کې د افغانانو د بانکي حسابونو، کاروبارونو او شتمنیو په اړه د احتمالي اقداماتو اندېښنې زیاتې شوې دي.