د جرمني په پلازمېنه برلین کې له خبري غونډې وروسته یوه معترض د ایران پخواني ولیعهد رضا پهلوی ته د رومي بانجانو روب ور شیندلی. د رضا پهلوي ډلې ویلي، چې نوموړي ته د رومي بانجانو ساس یا روب ورشیندل شوی او غاړه او اوږه یې پرې ککړې شوې.
د اروپايي ټولنې غړو هېوادونو د ۲۰۲۶ او ۲۷ کلونو لپاره له اوکراین سره د ۹۰ میلیارده یورو پور او پر روسیې د نویو ندیزونو په اړه هوکړه وکړه. د اروپايي کمېسیون مشرې ویلي، چې د روسیې د تېري په ځواب کې به له اوکراین څخه ملاتړ دوه برابره زیات کړي.
د کینیا لوړې محکمې پرېکړه کړې، چې د افغانستان د پخوانۍ ولسي جرګې غړی عبدالظاهر قدیر متحده ایالاتو ته وسپاري. محکمې ویلي چې کینیا نه شي کولی د نشه يي توکو او غیرقانوني وسلو د قاچاق پر ضد مبارزه کې له خپلو نړیوالو ژمنو تېره شي.
د طالبانو د کابل ښاروال په افغانستان کې د هند سفارت له شارژدافیر سره د کابل ژوبڼ د پیاوړتیا، د پروژو د ډیزاین او د ښاري مدیریت په برخه کې افغانستان ته د هند د بریالیو تجربو د انتقال په اړه خبرې کړې دي.
د طالبانو د مخابراتو او معلوماتي ټکنالوژۍ وزیر د ترکیې د ترک ساټ دولتي شرکت له مسوولانو سره په انلاین ناسته کې د برېښنايي حکومتولۍ په برخه کې د همکارۍ غوښتنه کړې او وايي، ترکیه دې په دې برخه کې له طالبانو سره خپلې تجربې شریکې کړي.
د افغانستان د رسنیو ملاتړ سازمان په پاکستان کې د افغان خبریالانو د نیولو، ځورونې او جبري شړلو د پېښو پر زیاتېدو اندېښنه ښودلې. د دغه سازمان د ترلاسه شویو معلوماتو له مخې، په تېرو دوو اونیو کې پاکستاني پولیسو درې افغان خبریالان نیولي دي.
په نورستان کې د طالبانو رسنیز دفتر ویلي، چې د کونړ له غازي څخه د نورستان تر کامدېش ولسوالۍ پورې یې د سړک جوړلو پروژې چارې عملا پیل کړې. دغه سړک کامدېش او برګمټال ولسوالۍ ته د بدیلې لارې په توګه جوړیږي.
اروپايي ټولنې په افغانستان کې د وروستیو سېلابونو له امله زیانمنو کورنیو سره د مرستې لپاره ۱۷۵ زره یورو، چې شاوخوا ۱۳ میلیونه افغانۍ کیږي، ځانګړې کړې دي. دغه مرسته به په بادغیس، فراه، غور، هلمند، هرات، کندهار، لوګر او ارزګان کې شاوخوا ۱۲ زره کسانو ته ورسېږي.
بریتانیا او فرانسه یو نوی درې کلن تړون لاسلیکوي چې ارزښت یې ۶۶۲ میلیونه پونډه دی. دغه تړون به د انګلیسي کانال له لارې په وړو کښتیو کې د کډوالو د غیر قانوني تګ او راتګ مخه ونیسي.
په بغلان کې د طالبانو امنیې قوماندانۍ خبر ورکړی، چې د دغه ولایت په پلخمري ښار کې یې ۲۱ کسان د «موسیقۍ غږولو او الکولي مشروباتو کارولو» په تور نیولي دي. طالبانو ویلي، چې دغه کسان د یو لړ عملیاتو پرمهال په یوه کور کې نیول شوي دي.
ملګرو ملتونو ویلي، چې د طالبانو او پاکستان ترمنځ د شخړو له امله ډیورنډ کرښې ته څېرمه سیمو کې شاوخوا ۱۲ زره زده کوونکي له خپلو سیمو بېځایه شوي او یا يې هم د زده کړو بهیر په ټپه درېدلی دی. په کونړ کې ډیری کلي له ماشومانو خالي شوي او د جګړې له امله ۲۲ ښوونځي په کنډوالو بدل شوي.
د ازبکستان ولسمشر شوکت میرضیایف ویلي چې د اوبو د وېش لپاره داسې حقوقي چوکاټ ته اړتیا ده چې د افغانستان په ګډون د ارال حوزې د ټولو هېوادونو حقونه او مسوولیتونه پکې په پام کې ونیول شي. نوموړي زیاته کړې، چې په افغانستان کې باید د سیند غاړو د ساتنې او د ځمکو د سمون پروژې پلي شي.
په افغانستان کې د نجونو پر مخ د منځنیو ښوونځیو او لېسو د تړلو ۱۶۷۸ ورځې پوره شوې؛ خو طالبانو لاهم په دې برخه کې خپله پرېکړه نهده بدله کړې او دغه دروازې لاهم د هغوی پر مخ تړلې پاتې دي. له دې سره یوناما له طالبانو د نجونو پر زدهکړو د لګېدلو بندیزونو لرې کولو غوښتنه کړې.
د طالبانو د بهرنیو چارو وزیر امیرخان متقي په کابل کې د دودیزې غېږ نیونې نړۍوالو سیالیو د پرانیستې مراسمو پرمهال په سیمه کې د روانې جګړې په اړه خواشینې ښودلې. هغه زیاته کړه: «په سیمه کې یوه خطرناکه جګړه پيل شوې ده».
د طالبانو تر کنټرول لاندې د هواپوهنې ادارې خبر ورکړی، چې نن او سبا (د غویي ۳مه او ۴مه) په ۲۷ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل شوی دی.
د بلوچستان ایالت د چاغۍ ولسوالۍ مرکز دالبندین ته اړوند داریګون سیمه کې ناپېژاندو وسلهوالو د «نېشنل ریسورسز» په نوم د کان کېندنې پر یوه ځایي شرکت برید کړی. په دغه برید کې د یوه بهرني وګړي او دوه ځايي امنيتي ساتونکو په ګډون ۹ کسان وژل شوي دي.
د طالبانو د صنعت او سوداګرۍ وزارت وایي، په ازبکستان کې طالب پلاوي او د بخارا والي په لیدنه کې د دواړو هېوادونو ترمنځ د ګرځندوی او سیاحتي سفرونو په ځانګړي ډول د روغتيايي سفرونو پر خدمتونو خبرې کړې دي.
د طالبانو تر کنټرول لاندې ملي ټلوېزیون په بادغیس کې د یادې ډلې د ځایي چارواکو په حواله راپور ورکړی، چې د دغه ولایت په بالامرغاب ولسوالۍ کې د سېلابونو له امله پنځه کسه مړه شوي دي. د دوی په وینا؛ په قربانیانو کې درې ماشومان او دوه مېرمنې شاملې دي.
د طالبانو د کډوالو او بېرته راستنېدونکو چارو وزارت د پنجشنبې په ورځ (د غویي ۳مه) خبر ورکړی، چې په روانه اونۍ کې ۳۳۴ افغان کډوال چې د پاکستان په زندانونو کې بندیان وو؛ له زندانه تر خوشې کېدو وروسته بېرته افغانستان ته ستانه شوي دي.
د افغانستان لپاره د ملګرو ملتونو اماني صندوق ویلي، چې د اوبو کمښت لاهم د دغه هېواد یو له اصلي ننګونو څخه ده او یوازې د ګډ اقدام له لارې دغه ستونزه حل کېدای شي.
د طالبانو تر واک لاندې د صنعت او سوداګرۍ وزارت خبر ورکړی، چې اذربایجان ته د دغه ډلې تللي پلاوي د هغه هېواد د ترانسپورټ وزارت له معین سره په لیدنه کې د ټرانزیټ اسانتیاوو، د افغاني بار وړونکو موټرو د تګراتګ او د نفتي توکو د لېږد پر همکاریو خبرې کړې دي.