د امریکا د مرکزي استخباراتو ادارې پخوانۍ ماموره سارا اډمز وايي، القاعده د افغانستان د شل کلنې جګړې پر مهال د طالبانو ترڅنګ په مستقیم ډول جګړه کړې او اوس د طالبانو د بیا واکمنېدو له امله په افغانستان کې د خپل پخواني امن ځای د بېرته ترلاسه کېدو لمانځنه کوي.
د بېځایه شویو نړیوال سازمان وايي، د طالبانو د بیا واکمنېدو پنځه کاله وروسته لا هم میلیونونه افغانان د طالبانو د سخت دریځیو او نورو عواملو له امله د خپلو کورونو پرېښودو او بې ځایه کېدو ته اړ کېږي.
دبرېتانیا ورځپاڼې « ډیلي مېل» په خپل یوه راپور کې لیکلي چې په افغانستان کې د طالبانو د واکمنۍ له پنځمې کلیزې سره هممهاله، د ښځو د حقونو فعالانو له بریتانیا غوښتي چې د هند، قطر او نورو هغو هېوادونو له لارې پر طالبانو فشار زیات کړي چې له دې ډلې سره اړیکې لري.
د مېډیا لاین په یوه راپور کې ویل شوي چې د طالبانو له واک ته رسېدو پنځه کاله وروسته، افغان ښځې او نجونې له زدهکړو، کار او عامه ژوند څخه د پراخو محدودیتونو له امله محرومې دي او ګڼې ښځې د فشارونو او ځورونو له کبله له افغانستانه وتلو ته اړې شوې دي.
د سولې د نوبل جایزې ګټونکې ملالې یوسفزۍ ويلي، طالبان باید پوه شي چې د واکمنۍ د پنځمې کلیزې د نمانځلو لپاره هېڅ دلیل نهلري، ځکه د افغان ښځو او نجونو پر وړاندې به د دوی د ترسره شویو «جنايتونو» حساب و کتاب ورسره وشي.
د پاکستان د استخباراتي ادارې (ایاېسای) پخواني مشر اسد دراني افغانستان انټرنشنل ته ویلي، چې طالبان او هېڅ بلې ډله په تېرو دوو لسیزو کې په افغانستان کې د پاکستان نیابتي ځواک نهوو.
طالبانو د واک ته د بېرته رسېدو د پنځمې کلیزې په مناسبت په پکتیا کې پر امریکايي ځواکونو د چاودنې او بریدونو یوه صحنه د تمثیلي نندارې په بڼه نندارې ته وړاندې کړه. هممهاله په کندهار کې طالبانو او د هغوی پلویانو د امریکا د ولسمشر ډونالډ ټرمپ مجسمه په لارو کوڅو کې وګرځوله او ووهله.
د بدخشان ولایت له بېلابېلو سیمو څخه را رسېدلي معلومات ښيي، چې د شنبې په ورځ (د زمري ۲۴مه) د دغه ولایت په پنځو ولسوالیو کې د طالبانو او د دې ډلې د وسلهوالو مخالفینو ترمنځ سختې نښتې شوې دي.
د پاکستان د راولپېنډۍ په ټېکسلا کې یوه ۲۸ کلنه پېژندل شوې ټيکټاکره عایشه چې په «ګيله منه» مشهوره وه د وسلهوالو موټرسایکل سپرو له لوري په ډزو وژل شوې او کشره خور یې سخته ټپي شوې ده. ویل کېږي، بریدګر له پېښې وروسته په تېښته بریالي شوي دي. دغه ټيکټاکره د پښتونخوا اوسېدونکې وه.
د ازادۍ جبهه وايي، چې د دې جبهې ځواکونو د شنبې په ورځ (د زمري ۲۴مه) د بدخشان د زېباک ولسوالۍ په سنګلېچ کلي کې د طالبانو یو رنجر موټر په نښه کړی دی. د دې جبهې په وینا، د طالبانو موټر له دې برید وروسته درې ته لوېدلی دی.
د طالبانو رییسالوزرا ملا محمد حسن اخوند ويلي، چې دوی د ګاونډیانو په ګډون د سیمې او نړۍ له ټولو هېوادونو سره د متقابل درناوي پر بنسټ د دوستانه اړیکو غوښتونکي دي او غواړي له ټولو هېوادونو سره خپلې سیاسي، اقتصادي او د همکاریو اړیکې لا پیاوړې کړي.
د جمهوري نظام د ولسمشرۍ ماڼۍ د عامه او ستراتیژیکو اړیکو مسوول وحید عمر وایي، د جمهوريت د ړنګېدو مهم عوامل د امریکا او ناټو د اوږدمهاله حضور پر وړاندې د سیمې هېوادونو مخالفت، پر بهرنیو مرستو د افغانستان د اقتصادي او امنیتي بنسټونو اتکا او د امریکا د پاتې کېدو په اړه ناسم اټکل وو.
د افغانستان د عدلیې پخواني وزیر فضلاحمد معنوي د طالبانو د بیا واک ته رسېدو د پنځمې کلیزې په مناسبت ویلي، چې د پنځو کلونو تېرېدو نه یوازې د طالبانو د مشروعیت کړکېچ نهدی هوار کړی، بلکې دغه کړکېچ یې لا ژور او څرګند کړی دی.
په خيبرپښتونخوا کې له ښوونځیو څخه د بهر پاتې ماشومانو بېرته ښوونځيو ته د راوستلو لپاره د څلورو ځايي ادارو د همکاريو په تړاو يوه هوکړه لاسليک شوې او ويل شوي، چې په دغه ايالت کې شاوخوا ۴،۹ میلیونه ماشومان ښوونځيو ته نهځي.
سرچینو افغانستان انټرنشنل–پښتو ته ویلي، چې هبتالله شنبه (د زمري ۲۴مه) د ورځې شاوخوا ۱۲ بجې له منډيګک ماڼۍ څخه د شهیدانو چوک او دو راهي پورې موټر کې ګرځېدلی او د طالبانو پنځمې کلیزې مراسمو ته تللی. هبتالله ویلي، چې کندهار ښار کې یې له خلکو سره په لاس روغبړ کړی دی.
د پاکستان د بلوچستان ایالت د کورنیو چارو وزیر ضیاالله لانګو ویلي، په بلوچستان کې د نا امنیو جوړونکو او شرخوښو ناقانونه وسلهوالو ډلو مشران، د افغان طالبانو او هند له لوري یرغمل شوي او د هغوی په لمسون ورانکاره فعالیتونه کوي.
ځايي سرچینو افغانستان انټرنشنل ته ویلي، چې د شنبې ماښام (د زمري ۲۴مه) د بدخشان د مایمي ولسوالۍ په دروازها سیمه کې د طالبانو او وسلهوالو کسانو ترمنځ نښته پیل شوې ده.
د افغانستان د کرېکټ ملي لوبډلې په پنځمې یو ورځنۍ نړۍوالې سیالۍ کې هم ایرلنډ ته د ۶ وېکټو په توپیر ماتې ورکړه. افغان اتلانو په دې بریا سره ۴ د صفر پر وړاندې پایلې سره یاده لوبلړۍ په خپل نوم کړه.
په افغانستان کې د اروپايي ټولنې پخوانی ډېپلوماټ مایکل سمپل وایي، چې طالبان په تېرو پنځو کلونو کې د حکومتولۍ په مخته وړلو کې «ناکام» شوي دي. هغه له افغانستان انټرنشنل سره په مرکه کې وویل، چې دغې ډلې یوازې پر تبلیغاتو تکیه کړې ده.
د طالبانو د لوړو زده کړو وزير ندا محمد ندیم په پروان پوهنتون کې د طالبانو د پنځه کلنې واکمنۍ او د یو شمېر زدهکړیالانو په فراغت مراسمو کې وویل: «د اسلامي نظام پر وړاندې بغاوت ناجایز او باغي واجب القتل دی».
د ملګرو ملتونو مرستيالې امنه محمد د طالبانو د واکمنۍ د پنځمې کلیزې په تړاو ويلي، په افغانستان کې د طالبانو له واکمنۍ د پنځو کلونو په تېرېدو سره افغان ښځې لا هم د بې برخې شويو حقونو بار پر اوږو وړي او لا هم له خپلو حقونو بې برخې دي.