د ننګرهار یوه اوسېدونکي افغانستان انټرنشنل پښتو ته د څو ویډیوګانو په رالېږلو سره شکایت کړی چې په دغه ولایت کې د نشتر په نوم د پښتورګو دولتي روغتون کې د ډاکټرانو کمښت ناروغان له جدي ستونزو سره مخ کړي دي.
د پاکستان د بهرنیو چارو وزارت ویاند طاهر اندرابي وايي، اسلام اباد پر ډیورنډ کرښه اغېزمن کنټرول لري او تګ راتګ یوازې د ویزې، ټاکلو قوانینو او موجودو هوکړو له مخې مني. نوموړي ویلي، د ناقانونه تګ راتګ د مخنیوي تدابیر به دوام ولري.
د کابل د ملاترهخېل ښارګوټي یو شمېر اوسېدونکو افغانستان انټرنشنل پښتو ته ویلي، چې د طالبانو تر واک لاندې کابل ښاروالۍ د سیمې د زرګونو کورونو ځمکې دولتي اعلان کړي او اوسېدونکو ته یې ویلي چې خپل کورونه پرېږدي.
د طالبانو د کرنې وزیر عطاالله عمري له خپل ایراني سیال وزیر غلام رضا نوري قزلجه سره د لیدنې پر مهال د کرنې په برخه کې د همکاریو پراختیا په اړه غږېدلی او زیاته کړې یې ده، چې یاده ډله په سختو شرایطو کې د ایران ترڅنګ ولاړه ده.
د ایران ولسمشر مسعود پزشکیان د جاپان له لومړۍ وزیرې تاکایچي سانا سره ټیلیفوني خبرو کې ویلي، ایران له نړیوالو قوانینو سرغړونه نه ده کړې او په سیمه کې د ناارامۍ غوښتونکی نه دی. هغه پر ډیپلوماټیکو هڅو د ټینګار ترڅنګ امریکا او اسراییل د سیمې د بې ثباتۍ اصلي لامل بللي دي.
د بدخشان په نسي ولسوالۍ کې د طالبانو او د جمعهخان فاتح تر قوماندې لاندې کسانو ترمنځ د نښتو له شدت موندلو سره هممهاله، سیمهییزو سرچینو افغانستان اینټرنشنال ته ویلي چې د دې ولسوالۍ په ځینو برخو کې انټرنېټ قطع شوی دی.
جهادي شخصیت محمد اسماعیل خان د هرات د سقوط د پنځمې کلیزې په مناسبت ویلي، د طالبانو پر وړاندې مقاومت او د دغه ډلې د واکمنۍ او حکومتولۍ په اړه د خلکو کرکه زیاته شوې ده. نوموړي ویلي، دا وضعیت د طالبانو د «استبداد» د زوال نښه ده.
په نیمروز کې د طالبانو د اطلاعاتو او کلتور ریاست د «سپاهیان میهن جبهې» د غړیتوب په تور د اتو کسانو د نیول کېدو خبر ورکړی دی. سیمهییزې سرچینې وايي چې دغه کسان شاوخوا درې اونۍ وړاندې له ایران نه ایستل شوي او افغانستان ته ستانه کړل شوي وو.
د ایران د دوغارون سرحدي بندر مدیر وايي، د روان کال په لومړیو څلورو میاشتو کې د دوغارون او اسلام کلا ترمنځ د صادراتي باروړونکو موټرو تګ راتګ ۵۷ سلنه زیات شوی او په دې موده کې ۳۳ زره او ۸۲۵ موټرو تګ راتګ کړی دی.
د نی بنسټ راپور ورکړی دی چې د طالبانو په پنځه کلن حاکمیت کې د خبریالانو او رسنیزو کارکوونکو پر وړاندې د تاوتریخوالي تر ۷۰۰ زیاتې پېښې مستندې شوې دي. د دغه راپور پر بنسټ، په دې موده کې لږ تر لږه ۶ خبریالان وژل شوي او شاوخوا ۴۰۰ خبریالان او رسنیز کارکوونکي نیول شوي دي.
په کندهار کې د طالبانو امنیه قوماندانۍ ویلي چې د اوومې امنیتي حوزې په سیمه کې یوې ښځې د یوه بل نارینه په مرسته خپل خاوند د تبر په وسیله وژلی دی.
د طالبانو د بغلان ولایت د تاله وبرفک ولسوالۍ امنیه قوماندان وايي، ددغه ولسوالۍ د دیوالک په سیمه کې د دوو کورنیو ترمنځ د اوبو د وېش پر سر وسله واله شخړه کې څلور کسان وژل شوي او یو بل تن ټپي دی.
د طالبانو د کډوالو چارو وزارت وايي، تېره ورځ ۳۶۷ افغان کډوالې کورنۍ، چې د غړو شمېر یې ۱۸۸۱ کسان دي، هېواد ته راستنې شوې دي. طالبانو ویلي چې ۱۶۹ کورنۍ خپلو اصلي ولایتونو ته لېږدول شوې دي.
له افغانستان نه د امریکا وتلو د دغه هېواد مسوولیت پای ته ونه رساوه؛ واشنګټن سملاسي له یوې مهمې ننګونې سره مخ شو: د بشري ناورین مهارول او د افغانستان اقتصاد د بشپړ سقوط مخنیوی.
د پاکستان د بهرنیو چارو وزیر اسحاق ډار په سره سمندر کې پر سوداګریزې کښتۍ د حوثیانو برید وغانده. نوموړي پر اېکس پاڼه لیکلي، چې د دغه برید له امله درې پاکستاني وګړي وژل شوي او یو بل ټپي دی.
پولیټیکو په یو راپور کې لیکلي، چې د جرمني د لومړي وزیر فریدریښ مېرڅ حکومت لهخوا له طالبانو سره د افغان کډوالو د اېستلو تړون د زرګونه کډوالو او د بشري حقونو فعالانو ترمنځ د اندېښنې او لاریونونو څپه راپورته کړې ده. دغه کډوال جرمني ته د طالبانو د ځپلو له امله تښتېدلي دي.
د ملګرو ملتونو پراختیايي پروګرام په کابل کې د وزیر محمداکبر خان روغتون لپاره د ۲۰۰ کیلو واټه لمریزې برېښنا سیستم نصب کړی، چې د روغتون د برېښنا ستونزې به راکمې او د مهمو روغتیايي خدمتونو د دوام زمینه به برابره کړي.
د بدخشان سیمهییزو سرچینو ویلي، چې د دغه ولایت په نسي ولسوالۍ کې د طالب ځواکونو او د یادې ډلې د ناراضه قوماندان جمعهخان فتح ترمنځ نښتو زور اخیستی دی. د سرچینو په وینا؛ په څو سیمو کې سخته جګړه روانه ده او په نښتو کې دواړه خواوو ته سخته مرګژوبله هم اوښتې ده.
د افغانستان د کرېکټ ملي لوبډله به د سپټمبر په میاشت کې له هند سره د درېیو شل اوریزو نړۍوالو سیالیو لړۍ په ډیلي کې پيل کړي او د یادې لوبلړۍ کوربهتوب به د افغانستان د کرېکټ ملي لوبډله کوي.
د بشري حقونو سازمان هانا خبرداری ورکړی، چې له ایران نه د بېاسناده افغانانو د اېستلو لړۍ دوام ښځې او ماشومان له جدي بشري او خوندیتوب له ګواښونو سره مخ کولای شي.
د افغان رسنیو ملاتړ سازمان د طالبانو د پنځه کلنې واکمنۍ پرمهال د رسنیو اړوند یو راپور کې ویلي: «د هېواد رسنیز وضعیت له پراخو ننګونو او بدلونونو سره مخ شوی». راپور زیاتوي، د کاري چاپېریال تنګېدل، قانوني پېچلتیاوې او مالي ننګونې د ژورنالیزم د ۲۰ کلنو لاسته راوړنو د ورکېدو لامل شوي.