د پاکستان پوځ ادعا کړې چې امنيتي ځواکونو یې د بلوچستان ایالت په پنجګور ولسوالۍ کې د يو لړ عملياتو په ترڅ کې پنځه وسله وال وژلي دي، د پاکستان پوځ وژل شوي وسله وال د بلوڅ بیلتون غوښتونکې ډلې غړي ياد کړي دي.
د یمن حکومت وايي، حوثیانو د بابالمندب په تنګي کې پر یوې سوداګریزې بېړۍ «دوه پړاویزه» برید کړی چې په پایله کې یې د بېړۍ د عملې څلور غړي او دوه مرستندویان وژل شوي دي.
د طالبانو د کډوالو او بېرته راستنېدونکو چارو وزارت وايي، په کابل کې ملګري ملتونه د راستنېدونکو کډوالو لپاره د یوه نوي مېشتغالي او د قالین اوبدنې د یوې کارخونې د جوړولو طرحه تر ارزونې لاندې ده.
په اتریش کې د مدني ټولنو یوه ایتلاف د طالبانو د واکمنۍ د پنځم کال په درشل کې له اتریش او اروپايي ټولنې غوښتي چې د طالبانو پر وړاندې اصولي، یو موټی او اوږدمهاله تګلاره خپله کړي.
د پاکستان د پخواني لومړي وزیر او تحریک انصاف ګوند د بنسټګر عمران خان خوېندو ویلي، تر هغې چې د عمران خان خوېندې او ډاکټران د هغه د روغتیا په اړه څه ونه وايي، نور کسان دې د هغه د روغتیا په اړه له خبرونو او څرګندونو ډډه وکړي.
د افغانستان د عامې روغتیا پخوانۍ وزیره ثریا دلیل په هرات کې د ملګرو ملتونو د مرستندویه پلاوي (یوناما) د دوو افغان کارکوونکو د نیول کېدو په غبرګون کې وايي، د ملګرو ملتونو کارکوونکي د خپلو رسمي دندو د ترسره کولو پر مهال له خوندیتوب څخه برخمن دي.
د خیبر پښتونخوا د مومندو ولسوالۍ لویې جرګې ویلي، په مومندو، په ځانګړي ډول له ډېورنډ کرښې سره نږدې پرتو سیمو او د پښتونخوا په بندوبستي سیمو کې هم د زرګونو پښتنو پېژندپاڼې (شناختي کارتونه) تړل شوې دي.
سیمهییزې سرچینې وايي، طالبانو د غزني د نواباد هزاره مېشتي ښارګوټې اوسېدونکو ته امر کړی چې په یوه اونۍ کې خپل کورونه پرېږدي. سرچینو افغانستان انټرنشنل ته ویلي، طالبانو خبرداری ورکړی چې که د کورونو له پرېښودو ډډه وکړي، په زور به وایستل شي او کورونه به یې ونړول شي.
د افغانستان د پخوانۍ ولسي جرګې غړی رمضان بشردوست وايي، د طالبانو چارواکي د ساده ژوند او د اسلام د لومړنیو خلفاوو په څېر د حکومتولۍ د ادعاوو پر خلاف، اوس تر پخوا ډېر په تشریفاتو، تجمل او ګڼو ساتونکو کې ښکېل دي.
د امریکا «والسټریټ ژورنال» ورځپاڼې د یوه امریکايي چارواکي په حواله راپور ورکړی چې اسراییل واشنګټن ته د ډونالډ ټرمپ د ترور په اړه د ایران د پلان معلومات ورکړي وو. دغه امریکایي چارواکي زیاته کړې چې هغه مهال ټرمپ له ترکیې څخه په پټه په یوه پوځې الوتکه کې ولېږدول شو.
د افغانستان او پاکستان د سوداګرۍ د ګډې خونې مشران وايي، د دواړو هېوادونو ترمنځ د لارو د پرانیستلو په اړه له دولتي چارواکو سره یې خبرې روانې دي، تمه شته خو تر اوسه په دې برخه کې کوم د پام وړ پرمختګ نه دی شوی.
له افغانستان څخه یوه هېوادوال افغانستان انټرنشنل - پښتو ته په رالېږلي پیغام کې د متحدې جبهې له مشر سمیع سادات څخه غوښتي چې په امریکا کې له ناستې د جګړې د رهبرۍ پر ځای دې افغانستان ته ستون شي او له دننه دې مبارزه وکړي. دغه هېوادوال زیاتوي چې هغه مهال به یې مونږ هم ملاتړ وکړو.
په افغانستان کې د نجونو د زدهکړو پر دوام بندیز یوازې د میلیونونو نجونو پر راتلونکې اغېز نه دی کړی، بلکې پر کورنیو، په ځانګړي ډول پر هغو پلرونو یې هم دروند رواني او عاطفي فشار راوستی چې هره ورځ ګوري لوڼې یې له ښوونځي او پوهنتون څخه بې برخې کېږي.
د ملګرو ملتونو د ښوونې، علومو او کلتور سازمان (یونسکو) وایي چې په افغانستان کې د ښځو او نجونو پر لوړو زدهکړو د طالبانو محدودیتونه به د ښځینه ښوونکو کمښت لا زیات کړي او دا هېواد به تر ۲۰۳۰ کال پورې د۱۱زرو څخه د زیاتو مسلکي ښځینه ښوونکو له کمښت سره مخ شي.
د طالبانو مخالفې ډله، د ازادۍ جبهه وایي چې هره هغه ترهګره ډله چې د افغانستان، سیمې او نړۍ لپاره یو لوی ګواښ ګڼل کېږي، یا د طالبانو تر سیوري لاندې او یا هم د هغوی په امن پناهځایونو کې روزل شوې او وده یې کړې ده.
د جرمني د زرغون ګوند د پارلمان غړي مارسل امریش له فدرالي حکومت څخه غوښتي چې له ګواښ سره مخ یو شمېر افغانان د دغه هېواد اولم ښار ته ولېږدوي. اولم د جرمني په سوېل کې د بادنوورتمبرګ ایالت ښار دی او سیمهییزو چارواکو یې ویلي چې دغه ښار د نورو پناهغوښتونکو منلو لپاره چمتووالی لري.
د ننګرهار د هسکې مېنې ولسوالۍ یو شمېر اوسېدونکي شکایت کوي چې په دغه ولسوالۍ کې د برېښنايي پېژندپاڼو د وېش بهیر له ځنډ، واسطهبازۍ او فساد سره مخ دی. دوی زیاتوي چې په ولسوالۍ کې د پېژندپاڼو د برخې طالب مومورین فورمې په پیسو پلوري.
په سعودي عربستان کې یو شمېر مېشت افغانان شکایت کوي چې افغانستان ته د الوتکو د ټکټونو لوړو بیو له سخت مالي فشار سره مخ کړي او له اړوندو ادارو غواړي چې د ټکټونو د بیو د راټیټولو لپاره اقدام وکړي.
د امریکا ولسمشر ډونالډ ټرمپ ویلي، د ایران پر وړاندې یې دوه انتخابونه دي؛ یا به تهران اقتصادي سقوط ته پرېږدي او یا به پرې ډېر سخت برید وکړي. هغه ایران د «چلول مذاکره کوونکی» بللی او ویلي یې دي چې د دغه هېواد کنګل شوې شتمنۍ د امریکا تر کنټرول لاندې دي.
د ایران د تایباد د عدلیې او څارنوالۍ چارواکي وايي، د روان کال له پیل راهیسې د ایران او افغانستان په ګډه پوله کې ۸۰زره او ۴۶۱ افغانان د اسنادو نه لرلو له امله نیول شوي دي.
د کابل پوهنتون یو شمېر محصلان وايي، د محصلانو له لیلیو تر اېستل کېدو وروسته د استوګنې له جدي ستونزو سره مخ شوي او ځینې محصلین د کرایې ورکولو توان د نه درلودو له امله اړ شوي چې خپلې زدهکړې پرېږدي.