ترکیې، قطر، پاکستان او اندونیزیا په دوحه کې د «بدر» په نوم د دفاعي همکاریو تړون لاسلیک کړی، چې له مخې به یې د پوځي تولید، روزنې، څېړنې او پراختیا په برخو کې همکاري پراخوي، دفاعي وړتیاوې پیاوړې کوي او د امنیت د ټینګښت لپاره ګډ کار کوي.
د بلوچستان په چمن کې یوې محکمې د قتل په یوه قضیه کې د عوامي نشنل ګوند ایالتي مشر اصغر خان اڅکزي ضمانت رد کړی دی. د محکمې له پریکړې وروسته د بلوچستان پولیسو اصغر خان اڅګزی نیولی او زندان ته لېږدولی دی.
د ایران سویلي خراسان چارواکي وايي، تېر کال له دغه ولایت څخه افغانستان ته د ۱،۸۵ میلیارد ډالرو په ارزښت توکي صادر شوي دي. ایراني چارواکو د دواړو هېوادونو د ګډې پولې سوداګریز ظرفیتونه، د راکړې ورکړې پراختیا، د کارموندنې او د سرحدي سیمو د اوسېدونکو د عاید لوړولو لپاره مهم بللي دي.
په پاکستان کې د کډوالو په چارو کې د ملګرو ملتونو د عالي کمېشنرۍ استازې نوریکو تاکاګي پر پاکستان غږ کړی چې د هغه افغان کډوالو د ستنولو لړۍ ودروي چې افغانستان کې یې ژوند له جدي خطرونو سره مخامخ کېږي.
د کندهار یو شمېر پخواني نظامیان او اوسېدونکي وايي، د طالبانو د امر بالمعروف محتسبان خوا څارل او تعقیبیږی. دوی وايي، دې وضعیت یې د کار، عبادت او ورځني ژوند چارې له ستونزو سره مخ کړې او له کوره د وتلو پر مهال د نیول کېدو او تور لګېدو وېره لري.
د پاکستان د سند ایالت په دادو ښار کې محکمې د پښتون ژغورنې غورځنګ مخکښ غړی علي وزیر له یوې جوړې شوې قضیې څخه بري کړی خو د هغه وکیل افغانستان انټرنشنل ته وویل، چې نوموړی دا وخت لا هم په شپږو قضيو کې بندي دي.
د طالبانو د عدلیې وزارت خبر ورکړی چې د مرکزي زون د غصب شویو ځمکو قضیو ته د رسېدنې ځانګړې محکمې د کابل په پغمان ولسوالۍ کې ۵۰ جریبه ځمکه دولتي اعلان کړې ده. د یاد وزارت په ویا، د غصب شویو ځمکو ځانګړې محکمې د متصرفینو د اسنادو او املاکي دفترونو له ارزونې وروسته دا پرېکړه کړې ده.
د پاکستان د پنجاب ایالت د ژغورنې ادارې ویلي چې د راجنپور ولسوالۍ په روجهان سیمه کې د یوه مساپروړونکي بس د چپه کېدو په پېښه کې د ښځو او ماشومانو په کډون لږ تر لږه لس کسان مړه شوي او ۴۴ نور ټپیان دي.
د سلفي ډلو په فکري ډېسکورس کې عقیده د هر څه په مرکز کې ځای لري او دغه ډلې د عقیدې پر اهمیت او له ککړتیاوو څخه د هغې پر پاکولو په خورا ټینګار سره، د نورو مذهبي ډلو په پرتله ځان ته ځانګړی هویت جوړوي.
د افغانستان د کرکټ ملي لوبډلې مخکښ توپاچوونکي راشد خان د کرکټ نړیوالې شورا د یو ورځنیو سیالیو د توپاچوونکو په تازه ډلبندۍ کې بیا هم لومړی مقام ترلاسه کړی دی. راشدخان په متحده عربي اماراتو کې د درې اړخیزې لوبلړۍ پرمهال د زمبابوې پر وړاندې لوبه کې څلور لوبغاړي وسوځول.
ځايي سرچینو افغانستان انټرنشل ته ویلي چې د عزیز توخي په نوم یو ځوان تېره شپه د کندهار په عینو مېنه کې د ګاز نیونې له امله مړ شوی دی. د سرچینو د معلوماتو لهمخې، عزیز توخی له ۹ کلونو وروسته خپل کور ته راستون شوی و.
د پاکستان تحریک انصاف ګوند عمومي منشي سلمان اکرم راجا هغه راپورونه او ګونګوسې رد کړې، چې ګواکې د خیبر پښتونخوا اسمبلۍ ۶۸ غړي د عمران خان او د ګوند د سیاسي کمېټې له اجازې پرته د ګوند د ایالتي مشر او د راتلونکي سر وزیر د نوماند اعلانولو په لټه کې دي.
د برېتانیا حکومت د امریکا د جګړې وزیر پېټ هېګست هغه څرګندونې رد کړې، چې ویلي یې وو د افغانستان د جګړې پرمهال یوازې «یو یا دوه» د ناټو غړو هېوادونو په مستقیمو جګړهییزو عملیاتو کې برخه اخیستې وه.
د طالبانو مخالفې ډلې ازادۍ جبهې اعلان کړی، چې ځواکونو یې د سېشنبې په ماښام (د تلې ۲۸مه) په پروان ولایت کې د طالبانو پر يوې پوستې برید کړی. د یادې جبهې په خبرپاڼه کې ادعا شوې، چې په دغه برید کې د طالبانو درې غړي وژل شوي او دوه نور ټپیان دي.
په تخار کې د طالبانو د امنیه قوماندانۍ چارواکي وايي، د دغه ولایت د بنګي ولسوالۍ په یوه کلي کې یې له پخوانیو جګړو پاتې ۵۰۰ کیلوګرامه بم کشف کړی دی. د یادې قوماندانۍ ویاند نقیبالله مسرور ویلي، چې دغه نیم ټن بم د بنګي ولسوالۍ د «نواباد برجه» په کلي کې موندل شوی دی.
په هرات کې د طالبانو رسنیز دفتر د چهارشنبې په ورځ (د تلې ۲۹مه) ویلي، چې د روان کال په لومړیو شپږو میاشتو کې د هرات صادرات د اسلامکلا بندر له لارې د تېرکال د ورته مودې پرتله ۷۲ سلنه زیات شوي او ټولیز ارزښت یې ۱۲۴ مېلیون ډالرو ته رسېدلی دی.
د افغان کډوالو تر جبري اېستنې وروسته په تهران کې د بهرنیو زدهکوونکو شمېر ۵۰ سلنه کم شوی دی. د تهران د پوهنې او روزنې ادارې د معلوماتو له مخې، په تېرو کلونو کې د بهرنیو زدهکوونکو شمېر شاوخوا ۶۰زره و؛ خو په روان ښوونیز کال کې دغه شمېر تر ۳۰زرو کم شوی دی.
ازبکستان د قوشتیپې کانال د پروژې په اړه له طالبانو سره د تقابل او فشار پر ځای د خبرو اترو او تخنیکي همکاریو تګلاره غوره کړې ده. شنونکي وايي، تاشکند دې پایلې ته رسېدلی چې د افغانستان په خاوره کې د جوړېدونکې یادې سترې پروژې د درولو لپاره نه عملي او نه هم حقوقي وسیلې لري.
په داسې حال کې چې د امریکا ولسمشر ډونالډ ټرمپ ویلي، اوس هغه وخت رارسېدلی چې اوکراین جګړې ته د پای ټکی کېږدي؛ د امریکا ځانګړی استازی سټیو وېټکاف به د چهارشنبې په ورځ (د تلې په ۲۹مه) د روسیې له ولسمشر ولادیمیر پوتین سره وګوري.
د افغانستان د کرېکټ ملي لوبډله نن د درې اړخیزې یو ورځنیو سیالیو لوبلړۍ پر دوام خپله دویمه لوبه د بنګلهدېش د کرېکټ ملي لوبډلې پر وړاندې د متحده عربي اماراتو په شارجه لوبغالي کې ترسره کوي.
د ایران په زاهدان–بم لویه لاره کې د یوې ترافیکي پېښې له امله نهه افغان کډوال او یو ایرانی موټر چلوونکی مړه شوي دي. دغه پېښه د سېشنبې په سهار (د تلې ۲۸مه) د سیستان او بلوچستان ولایت په کهورک سیمه کې شوې ده.