تر هغې وروسته، چې ایراني چارواکو له امریکا سره د سولې خبرو ته چمتووالی ونه ښود، راپورونه ښيي چې د پاکستان د پوځ مشر عاصم منیر، تش لاس بیرته خپل هېواد ته ستون شو. هغه په دې موخه تهران ته تللی و، چې د ایران او امریکا د بیاځلي مذاکراتو زمینه برابره کړي.
د پېښور عالي محکمې د خېبر پښتونخوا د لرې کړل شوي اعلی وزیر سهیل اپرېدي، د ایالتي اسمبلۍ د مشر بابر سلیم سواتي او د پاکستان تحریک انصاف ګوند د نورو مشرانو د موندلو په اړه د ثبت شویو غوښتنلیکونو اورېدنه کړې ده. محکمې له اړوندو لورو غوښتي چې خپل ځوابونه په لسو ورځو کې وړاندې کړي.
د اروپايي ټولنې د بهرني سیاست مسوولې کایا کالاس ویلي، چې حوثي یاغیان په یمن او سعودي عربستان کې پر ملکي وګړو د ترهګریزو کړنو له لارې په سیمه کې د وېرې خپرولو هڅه کوي.
د پاکستان په کراچۍ ښار د ډاو په نوم د روغتیايي علومو پوهنتون د ۲۷ کارکوونکو تعلیمي اسناد جعلي ثابت شوي دي. د سند ایالتي اسمبلۍ د عامه حسابونو کمېټې پرېکړه کړې چې له دغو کارکوونکو څخه دې ټولې ورکړل شوې تنخواوې بېرته واخیستل شي.
روسیې په داسې حال کې د طالبانو او پاکستان ترمنځ د منځګړیتوب وړاندیز کړی چې تر دې وړاندې د څو هېوادونو هڅو د دواړو لورو د ترینګلتیا په کمولو کې څرګنده پایله نه ده لرلې.
انټر پریس سروېس ویبپاڼې په یوه تحلیلي راپور کې ویلي، چې د طالبانو له سختو بندیزونو او ګواښونو سره سره، افغان ښځو د خپلو حقونو د غوښتنې لپاره انټرنېټي او انلاین لاریونونو ته مخه کړې ده. سرچینې، د یوې پخوانۍ ۲۸ کلنې ښوونکې کیسه را اخېستې، چې په انلاین ډول همداسې مبارزه کوي.
د ملګرو ملتونو ادارو خبرداری ورکړی چې په راروان ژمي کې به شاوخوا ۱۹ میلیونه افغانان له سختې لوږې او ۴ میلیونه ماشومان شدیدې خوارځواکۍ سره مخ شي. د خوړو نړیوال پروګرام بیا ویلي، چې د ښو حاصلاتو سره سره بېکارۍ او بېوزلۍ د خلکو د پېر ځواک کم کړی دی.
د طالبانو تر چتر لاندې د افغانستان د سوداګرۍ او پانګونې خونې مسوولینو ويلي، چې د روان ۱۴۰۴ لمریز کال په لومړیو شپږو میاشتو کې له هېواده بهر ته د کابو نهه میلیونه امریکایي ډالرو په ارزښت لاسي اوبدل شوې غالۍ صادرې شوې دي.
د اوکراین ولسمشر ولادیمیر زېلنسکي په ناروې کې اعلان وکړ، چې د امریکا د بهرنیو چارو له وزیر مارکو روبیو سره یې د هېواد د دفاعي وړتیاوو او امنیتي تضمینونو په اړه مفصلې او رغنده ټلیفوني خبرې کړې دي.
په داسې حال کې، چې د سوداګرۍ او پانګونې خونې د ژمي په درشل کې د غنمو په ګډون د نورو خوراکي توکو د کمښت اندېښنه ښودلې؛ طالب چارواکي د غنمو په تولید کې د ۱۳،۴ سلنه زیاتوالي ادعا لري. افغان کروندګر بیا شکایت لري، چې طالب واکمنۍ کې ورسره کرنیزې مرستې خورا کمې شوې دي.
د ایران ولسمشر مسعود پزشکیان د پاکستان د پوځ مشر عاصم منیر سره په کتنه کې ویلي، چې د دوی ملت پر امریکا هېڅ باور نه لري او خلک فکر کوي که مذاکره وکړي نو بیا به هم پر دوی بریدونه وشي. دا په داسې حال کې ده چې عاصم منیر د ایران او امریکا د بیا ځلي خبرو د هڅونې لپاره تهران ته تللی.
د قطر نړیوالو همکاریو په چارو کې د دولت وزیرې مریم بنت علي بن ناصر المسند ویلي، د افغانستان راتلونکی باید د یوه ټولشموله سیاسي بهیر له لارې وټاکل شي، چې مشري یې خپله افغانان وکړي. هغې ټینګار کړی، چې په دغه بهیر کې باید د افغانستان حاکمیت، خپلواکۍ او ځمکنۍ بشپړتیا ته درناوی وشي.
د افغانستان لپاره د پاکستان پخوانی ځانګړی استازی اصف درانی وايي، له طالبانو سره د روسیې او هند د اړیکو نږدېوالی ښايي د دې ډلې د نړیوال مشروعیت د زیاتېدو او پر طالبانو د پاکستان د فشار د وسیلو د کمزوري کېدو لامل شي.
په داسې حال کې چې نړۍوال او ګڼ افغانان د طالب مشر ملاهبت الله فرمانونه د « جنسیتي اپارټایډ» زمینه برابروونکي ګڼي؛ په بادغیس کې د طالبانو د اطلاعاتو او کلتور رییس ویلي، چې دا فرمانونه د «خیر، فلاح او بریا» سبب کیږي. هغه له خبریالانو غوښتي، چې خلک د دغو فرمانونو ملاتړ ته راوبولي.
د مالدیپ ولسمشر محمد معیز د پاکستان د لومړي وزیر شهباز شریف په بلنه په درې ورځني رسمي سفر اسلاماباد ته رسېدلی دی. ټاکل شوې ده چې نوموړی د پاکستان له ولسمشر او لومړي وزیر سره د لیدنو ترڅنګ د دواړو هېوادونو د اړیکو او په بېلابېلو برخو کې د همکارۍ پر پراختیا خبرې وکړي.
فاکس نیوز د دوو امریکایي چارواکو په حواله راپور ورکړی، چې متحده ایالات منځني ختیځ ته د «تیودور روزوېلټ» په نوم الوتکهوړونکې بېړۍ او د سمندري ځواکونو ۱۳مه قطعه لېږي، چې په دې سره به په سیمه کې شاوخوا ۱۰ زره نور امریکایي سرتېري ځای پر ځای شي.
د ملګرو ملتونو د ماشومانو د ملاتړ صندوق (یونیسف) اعلان کړی، چې تر ۲۰۲۶ کاله پورې به په افغانستان کې لږ تر لږه ۱۵۰۰ تنکي ځوانان چې له جدي امنیتي او ټولنیزو ګواښونو سره مخ دي، تر خپل ملاتړ لاندې راولي او د مسلکي کسبونو روزنه به ورکړي.
د بلوچستان اسمبلۍ د غړې او د لوبو او ځوانانو چارو سلاکارې مینا مجید ورور اورنګزېب مجید د کیچ ولسوالۍ په مند سیمه کې د ناپېژاندو وسلهوالو له خوا تښتول شوی دی. بل لور ته د بلوچستان حکومت وايي چې په دغه ایالت کې د ترهګرۍ پر ضد تر ۶۰ زرو ډېر عملیات شوي دي.
د طالبانو د امربالمعروف او شکایتونو اورېدو وزارت اعلان کړی، چې د دوی د محتسبانو په هڅو بلخ ولایت کې د چین دوه تنه وګړي مسلمانان شوي دي. دغه وزارت ویلي چې یادو بهرنیو وګړو په خپله خوښه د دغه دین احکام منلي دي.
په ملګرو ملتونو کې د افغانستان استازي نصیر احمد فایق ویلي، د افغانستان اقتصادي بیارغونه د خلکو له بنسټیزو حقونو، په ځانګړې توګه د ښځو او نجونو له حقونو څخه نه شي بېلېدای. هغه ټینګار کړی، افغان ښځې او نجونې د طالبانو تر واکمنۍ لاندې لا هم له سیستماتیک تبعیض او محرومیت سره مخ دي.
د طالبانو د اطلاعاتو او کلتور وزیر، د ملا هبتالله اخوندزاده د یوه کتاب د پېژندنې غونډه کې اقتصاد او رزق «ضمني مسایل» ګڼلي او له خلکو یې غوښتي، چې اصلي پام دې پر عقیدې وساتي. د طالبانو په واک د ملي ټلوېزیون مشر په دې غونډه کې ویلي، چې د دوی د مشر اساسي چاره امر بالمعروف دی.