یو افغان افغانستان انټرنشنل ته په لېږلي پیغام کې د طالبانو د بهرنیو چارو وزارت د قونسلي چارو په ریاست کې د مراجعینو د سپکاوي په اړه شکایت کړی. د دغه کس په وینا، د دغه ریاست کارکوونکي له واک په استفادې له مراجعینو سره په سپکو الفاظو خبرې کوي.
د فراه ولایت محصلانو افغانستان انټرنشنل ته په لېږلو پیغامونو کې ویلي، چې د طالبانو د دعوت او ارشاد ادارې لهخوا په زور او جبر د پګړۍ نه تړلو له کبله له لیلیې اېستل کېږي. دغه محصلان وايي، چې په ټولګي کې هم د همدې کبله غیرحاضر او له درسونو محرومېږي.
د هرات اوسېدونکو افغانستان انټرنشنل ته په لېږلو پیغامونو کې ویلي، چې د طالبانو د امر بالمعروف محتسبین د سېشنبې په ورځ د هرات ښار په ۱۵مه ناحیه کې کوڅه په کوڅه ګرځېدل او د ښځو د جامو د ډول له امله یې د هغوی پلټنې کولې.
د کابل ښار د نهمې ناحیې د عمر ګلستان ښارګوټي اوسېدونکي وایي، طالبانو د کرایې د نهورکړې له امله د اوبو او برېښنا پرې کولو ګواښ کړی. د دوی په خبره، دامهال له ډېر بد وضعیت او جدي فشارونو سره مخ دي.
د ننګرهار د بهسودو ولسوالۍ یوه اوسیدونکي افغانستان انټرنشنل- پښتو ته په استولي پيغام کې ویلي، چې د طالبانو د ښار جوړونې یو انجینر د یوه سوداګر د ځمکو د قیمت لوړولو لپاره د یوه سړک مسیر بدلوي، چې لسګونه کورونه ورسره ویجاړیږي.
د تېر جموریت پرمهال د پولیسو اکاډمیو محصلان چې د طالبانو تر واک لاندې یې زده کړې بشپړې کړې وايي، د جمهوري نظام له پرځېدو وروسته یې خپلو زده کړو ته دوام ورکړ، خو له فراغت وروسته، د نامعلوم برخلیک سره مخ دي او طالبان یې په دنده نه ګوماري.
د کابل ولایت د دولتي ښوونځیو زدهکوونکي شکایت کوي، چې په دغه ښوونځیو کې د ښوونکو د کمښت له امله د لېسې زدهکوونکي د ښوونیز کال په اوږدو کې له مناسبې زدهکړې بېبرخې شوي دي.
د افغانستان د علومو اکاډمۍ غړي سید نظیم سعیدي د کابل په اسمايي غره کې د یو شمېر کورونو د ړنګولو په اړه د طالبانو د ښاروالۍ د پرېکړې په غبرګون کې په خپل فېسبوک کې لیکلي، چې دغه پلان دوی له «رواني ځور» سره مخ کړې دي.
د ننګرهار اوسېدونکي حاجي ارباب خان په دغه ولایت کې د یوه ډاکټر او د هغه د روغتون د کارکوونکو له لوري تر جراحي عملیات وروسته د طبي بېغورۍ او د اکسیجن د نشتوالي له کبله د خپلې ناروغې خور د مړینې خبر ورکړی دی.
په کابل کې د خېرخانې مېنې اوسېدونکي وايي، چې د وروستیو ناامنیو په پلمه د کور په کور تالاشۍ، خپلسرو نیونو، شکنجې او د خلکو ځورونې سخت اندېښمن کړي دي. دوی زیاتوي، چې پخواني جهادي قوماندانان تر نورو ډېر له ځورونې او کړاو سره مخ دي.
د کابل یو اوسېدونکي افغانستان انټرنشنل ته په لېږلي پیغام کې ویلي، چې د طالبانو ښاروالۍ لومړی د کابل ښار په کلولهپشتې، څلورمه او شپږمه ناحیه کې د سړک جوړولو لپاره د خلکو کورونه ویجاړ کړي او له هغې وروسته د کورونو مالکانو د خپلو ملکیتونو په پاتې برخو کې هټۍ جوړې کړې وې.
د هرات یو اوسېدونکی چې په اونۍ کې دوه ځلې اسلامکلا پولې ته تګراتګ کوي وایي، پر لار د هر موټر څخه د تګ پرمهال ۸۰ افغانۍ او د بېرته ستنېدو پرمهال هم ۸۰ افغانۍ اخیستل کېږي. نوموړي پوښتنه کړې، چې دغه قراردادونه له چا سره شوي او راټولې شوې پیسې چېرته ځي.
یو افغان پناهغوښتونکی وايي، د ترکیې پولیسو د دغه هېواد له ارزروم ښار څخه د افغان پناهغوښتونکو د جبري اېستلو پرمهال هغوی وهلي، سپکاوی یې ورته کړی او په زور یې الوتکې ته پورته کړي دي.
له کاپیسا نه یو درمل پلورونکي افغانستان انټرنشنل ته په رالېږلي پیغام کې ویلي، چې طالبانو د درملو شرکت د فعالیت جواز لپاره ترې پیسې او درمل د بډې په توګه اخیستې دي؛ خو د هغه سربېره یې هم ورته د درملو شرکت تړلی دی.
د جوزجان ولایت د خماب ولسوالۍ اوسېدونکي وايي، له پاخه سړکونو او برېښنا بېبرخې دي او د بنسټیزو اسانتیاوو له کمښت سره مخ دي. دغه اوسېدونکي زیاتوي، د خلکو یوه جدي ستونزه د سړکونو خرابوالی دی چې د دوی ورځنی ژوند یې له ګڼو ستونزو سره مخ کړی دی.
د هرات پوهنتون محصلان وايي، له تېرو دوو میاشتو راهیسې په پوهنتون کې د ځیرکو ټېلیفونونو کارول منع شوي او محصلان په خپلو لیلیو کې هم د یادو ټېلیفونونو د کارولو له محدودیت سره مخ دي. د دوی په خبره، نږدې هره ورځ یې لیلیې تالاشي کېږي.
د کابل ښار یوشمېر هټۍوالو افغانستان انټرنشنل ته ویلي، د شپې تر لسو بجو وروسته د هټیو تړل یې پر کاروبار منفي اغېز کوي. دوی وايي، د فعالیت قانوني جوازونه لري او په اړوندو ناحیو کې ثبت دي؛ خو بیا هم اړ اېستل کېږي چې د شپې په لسو بجو خپلې هټۍ وتړي.
د ننګرهار د دره نور د تلکي ډاک اوسېدونکو افغانستان انټرنشنل ته په غږیزو پیغامونو کې ویلي، چې له ۵۰ کلونو مېشتېدو وروسته یې کورونه طالبانو ړنګ کړي دي. یادو اوسېدونکو د انصاف غوښتنه کړې ده.
د کابل ښار د یوه دولتي ښوونځي ښوونکې وایي، نن ورځ له دې امله پرې ډېره سخته تېره شوه چې په نړۍ کې د ښوونکي ورځ نمانځل کېده؛ خو دوی اړ وو چې د نورو عادي ورځو په څېر تدریس وکړي.
د کابل د سروبي ولسوالۍ یوه اوسېدونکي شکایت کړی چې د دې ولسوالۍ لپاره د طالبانو د برېښنا شرکت د مرستیال د زوی په واده کې له دوو ورځو راهیسې پټاقۍ چاودول کېږي او د مرکزي بازار د خلکو ارام یې ګډوډ کړی دی.
د هلمند د موسیکلا ولسوالۍ د عمومي دولتي روغتون یو شمېر ناروغانو او پایوازانو افغانستان انټرنشنل ته ویلي چې سهار روغتون ته پر وخت ورځي، خو د ډاکټرانو او نورو کارکوونکو د کار تر پیل پورې شاوخوا یو ساعت انتظار باسي.
د کونړ د سید جمالالدین افغان پوهنتون یوه محصل افغانستان انټرنشنل- پښتو ته ویلي چې د طالبانو د امر بالمعروف ماموران د محصلانو ږیرې ګوري او د هغو کسانو د پوهنتون او لیلیې کارتونه اخلي چې ږیره یې لنډه کړې وي.