د روغتیا نړیوال سازمان په افغانستان او پاکستان کې د پولیو پېښو د کمېدو خبر ورکړی او ویلي یې دي چې دوی د دغه ویروس له منځه وړلو ته نږدې شوي دي. خو د رپوټونو له مخې همدغه سږ کال یوازې په ننګرهار کې په پولیو د اخته ماشومانو ۵ نوې پېښې ثبت شوې.
خو د روغتیا د نړیوال سازمان چارواکي وایي "پاکستان او افغانستان، چې د پوليو د ويروس وروستي مرکزونه دي، بايد په نخښه شي، دغلته بايد د پوليو د ويروس مخه ونيول شي او تر هغې چې مونږ دغه هدف ته ونه رسيږو، د نړۍ په بېلابيلو برخو کې به دا وايرس راڅرګند شي".
پوښتنه دا ده جې ولې د پښتنو سيمې د پولیو د ویروس مرکزونه جوړ شوي؟
په پاکستان کې په کال ۲۰۲۲ کې د پولیو ۲۰ پېښې ثبت شوې چې پکې ۱۷ په شمالي وزیرستان, دوه په جنوبي وزیرستان او يوه په لکی مروت کې مخې ته راغلې.
افغانستان کې په کال ۲۰۲۲ کې د طالبانو د واکمنۍ پر مهال د پولیو دوه پېښې ثبتې شوې وې.
نړیوالې ادارې او د پاکستان روغتیایي چارواکي دا خبره مني چې په پاکستان کې د پولیو په پېښو کې وروستی زیاتوالی د افغانستان پولې ته څېرمه د پاکستان په پخوانیو قبایلي سیمو کې په لږه جغرافیه کې محدودپاتې دي .
کارپوهان خبرداری ورکوي چې د پښتنو په سیمو کې د تندلارو ډلو د منفي تبلیغاتو ، روانې جګړې، ناامنۍ، لرې پرتو ځایونو ته د روغتیایي ډلو نه رسیدنه د ګوزڼ ناروغۍ پر وړاندې د روغتیایي کارکوونکو هڅې محدودې کړې دي.
په پيښور کې خبريال او څيړونکی مشتاق یوسفزی وايي "تر ټولو لویه مسله د امنیت ده، د پوليو کارکوونکي شته، واکسین هم شته، خلک چمتو دي، د نړیوالې ټولنې مرستې دوام لري، خو رياست اوس هم په هغو سیمو کې اغېز نه لري چې وروستۍ پېښې مخې ته راغلې دي".
د خېبر پښتونخوا د صحت چارواکي وايي امنیت یوه مسله ده خو د پولیو په کمپاین کې به بری حتمن د دوی په برخه وي.
