د طالبانو او پاکستاني ځواکونو ترمنځ د ماشومانو پر سر د جنجال له امله تورخم دروازه تر یو ساعت تړل کېدو وروسته پرانیستل شوه. د تورخم لپاره د طالبانو کمیسار مولوي عصمت الله یعقوب هم ویلي، د شنبې په ورځ د دواړو لورو ترمنځ لفظي شخړه پسې پاکستاني لوري دروازه تړلې وه.
نوموړي باختر اژانس ته ویلي چې دروازه شل دقیقې تړلې وه، یوې سرچینې د افغانستان انټرنشنل خبریال عبدالحق عمري ته ویلي، چې تر یوې ګړۍ ډېره بنده وه.
د دې سرچینې په خبره، له ماشومانو سره د پاکستاني پوځیانو په ناوړه چلن پسې طالبانو غبرګون وښود او له امله یې دا لار د ګاډو او خلکو په مخ وتړل شوه.
دا سرچینه وايي، جنجال د هغو ماشومانو پر سر را پورته شوی چې دواړو لورو ته پنډې وړي او پاکستاني پوځیان یې له ګاډو کوزوي او وهي یې.
طالبانو د پاکستاني پوځ دې اقدام مقابل کې غبرګون ښودلی او ورته ویلي یې دي چې نور باید ماشومان ونه وهل شي.
د همدې ناندریو له امله دروازه تړل شوې وه او افغانستان انټرنشنل ته رسېدلو انځورونو ښيودله چې دواړو غاړو ته مساپر ولاړ دي.
تورخم د افغانستان او پاکستان ترمنځ د خلکو او تجارت تر ټولو بوخته لار ده.
د طالبانو واکمنېدو پسې د دې ډلې او پاکستاني ځواکونو ترمنځ د نښتو او لانجو له امله تېرو دوو کلونو کې دغه لار څو ځلې تړل شوې ده.
