د افغانستان ازادۍ او مقاومت جبهو په نوم د طالبانو مخالفې وسلوالې ډلې، د بغلان په مرکز پلخمري ښار او د دغه ولایت په خوست ولسوالۍ کې دې ډلې ته د مرګ ژوبلې اړولو ادعا کوي. خو په بغلان کې د طالبانو ځايي چارواکي د دې دواړو جبهو دا ادعاوې ردوي.
د افغانستان ازادۍ جبهې په نوم د طالبانو مخالفه وسلواله ډله وايي، د پلخمري ښار په پل معدن سیمه کې یې بېګا د طالبانو پر ګارنېزیون په برید کې دوه طالبان وژلي او څلور یې ټپیان کړي دي.
دې ډلې څو ویډیووې هم نشر کړې چې په تیاره کې چاودنې ښيي، خو ځای یې نه مشخص کېږي.
د افغانستان ملي مقاومت جبهې په نوم د طالبانو بله مخالفه وسلواله ډله هم وايي، چې د بغلان په خوست کې یې د طالبانو پر قرارګاه برید کړی او مرګ ژوبله یې ور اړولې ده.
دې جبهې د مرګ ژوبلې کره شمېر نه دی ښودلی.
خپلواکو سرچینو د دې دواړو جبهو د ادعاوو په هکله څه نه دي ویلي.
په بغلان کې د طالبانو اطلاعات او فرهنګ ریاست هم دا ادعاوې ردوي او وايي، دې ورځو کې د بغلان په مرکز او ولسوالیو کې کومه امنیتی پېښه نه ده شوې.
