د طالبانو د زندانونو د تنظیم ادارې چارواکي وایي، د پنځو ښځو په ګډون ۱۶ بهرنیان د افغانستان په جېلونو کې بندیان دي. دوی د شنبې په ورځ «ملت ته د حکومت حساب ور کول» پروګرام کې دا خبره وکړه، خو د بهرنیو بندیانو د هویت په هکله یې څه ونه ویل.
د ځینې پخوانیو راپورونو له مخې، په بهرنیو بندیانو کې ځینې د امریکا او بریتانیا وګړي هم دي.
د امریکايي بندیانو خوشي کېدل د جولای په وروستیو کې په دوحه کې د طالبانو د بهرنیو چارو وزیر امیرخان متقي او د امریکايي پلاوي د خبرو برخه وه.
د ټام وېسټ او رینا امیري په مشرۍ امریکايي پلاوي له طالبانو وغوښتل چې دا بندیان « بې شرطه او سملاسي» خوشي کړي.
معلومه نه ده چې څو امریکايي وګړي له طالبانو سره بندیان دي، خو د امریکا د بهرنیو چارو وزیر تېر اپرېل کې وویل، چې ۱۷۵ وګړي یې په افغانستان کې پاتې دي.
د نوموړي په خبره، له دوی ځینې د افغان حکومت تر پرځېدو وروسته افغانستان ته تللي دي.
د بریتانیا ډیلي مېل ورځپاڼې هم تېر اپرېل وویل، چې درې بریتانویان له طالبانو سره بندیان دي.
د باختر اژانس د راپور له مخې، د طالبانو د جېلونو د تنظیم ادارې چارواکي وایي، چې زندانونو کې یې د بندیانو د وهلو مخه نیولې ده.
د دې ادارې په خبره، په ایران کې په اعدام ۲۵۰ افغانانو حکم یې بند ته اړولی دی.
