د هند په سختو بارانونو او سیلابونو کې ۴۸ کسان مړه شوي او ۷ ورک دي
هندي رسنۍ خبر ورکوي، چې په دغه هېواد کې د سختو بارانونو، سیلابونو او ځمکې ښویېدنې له امله ۴۸ تنه مړه شوي او ۷ نور ورک دي.
هندي رسنۍ خبر ورکوي، چې په دغه هېواد کې د سختو بارانونو، سیلابونو او ځمکې ښویېدنې له امله ۴۸ تنه مړه شوي او ۷ نور ورک دي.
رسنیو د هند په شمالي ایالتونو اتراکنډ او هماچل پردېش کې د چارواکو په حواله نن دوشنبه (د زمري ۲۳مه) راپور ورکړی، چې د اګسټ میاشتې له پیله تر اوسه په دغو ایالتونو کې سیلابونو ګڼې ودانۍ او پلونه ویجاړ کړي او سلګونه موټرونه یې وړي دي.
په دې وروستیو کې په هند، چین، بنګله دېش، سریلنکا او ګاونډیو هېوادونو کې د موسمي بارانونو پر مهال د پېښو شدت زیات شوی او ګڼ تلفات یې اړولي دي.
ال انډیا راډیو؛ د هماچل پردېش د مشر وزیر سوویندر سینګ سوکو په حواله وايي، چې د وروستیو بارانونو او سیلابونو له امله په دغه ایالت کې لږ تر لږه ۱۹ کسان په تېرو څلرویشتو ساعتونو کې مړه شوي دي.
نوموړی زیاتوي، چې له دغو کسانو څخه یې نهه تنه د دغه ایالت په مرکز شیملا کې د یوه معبد د نړېدو له امله مړه شوي دي او یو شمېر نور بند پاتې دي.
د سوکو په خبره، چې ژغورونکې ډله تر معبد لاندې د نورو کسانو د راویستو په لټه ده.
فاکس نیوز د هند د سیلابونو په اړه په خپل راپور کې وايي، چې په اتراګنډ او هماچل پردېش کې سلګونه ودانۍ، سړکونه، د ریل ګاډي پټلۍ، د برېښنا تارونو او مخابراتي شبکو ته زیان رسولی دی.
سرچینې زیاته کړې، چې په ګڼو سیمو کې له خلکو سره اړیکې پرې شوي او تر اوسه د تلفاتو او زیانونو په اړه دقیق معلومات نه شته.
د یادونې وړ ده، چې تېره میاشت هم په هند کې د سختو بارانونو له امله سلګونو تنو ته مرګ ژوله اوښتې وه او ګڼې ودانۍ ویجاړې شوې وې.
