په ډنمارک او سویډن کې د قرآن کریم له سوځولو وروسته بریتانیا خپلو هغو وګړو ته د احتمالي بریدونو خبرداری ور کړ چې ډنمارک ته ځي.بریتانیا او امریکا تر دې مخکې هم په سویډن کې د غچ اخیستونکو بریدونو د احتمال په اړه خبرداری ورکړی و.
سویډن د پنجشنبې په ورځ د ترهګریزو بریدونو د ګواښ کچه لوړه کړه.
د بریتانیا د بهرنیو چارو وزارت خبرداری ورکړ: «امکان لري چې ترهګر په ډنمارک کې د بریدونو هڅه وکړي. کیدای شي دا بریدونه په هغه ځای کې وشي چې بهرنیان ورته تګ راتګ کوي».
د دغه وزارت په وینا، ډنمارکي چارواکو ځینې پلان شوي بریدونه شنډ کړي او په دې تړاو یې یو شمېر کسان هم نیولي دي.
سویډن هم ویلي چې د ځینې پلان شویو بریدونو مخه یې نیولې ده.
د جمعې په ورځ د سویډن حکومت اعلان وکړ چې په بهر کې یې د هېواد ګټو ته د ګواښونو د زیاتوالي له امله په سفارتونو او نورو ماموریتونو کې امنیتي تدابیر زیات کړي دي.
د ډنمارک او سویډن حکومتونو د قرآن سوځول غندلي دي او د هغو قوانینو پر اصلاح غور کوي، چې د ورته چارو مخنیوی وکړي، خو کورني منتقدین وايي چې دا ډول اقدامات باید د اساسي قانون له مخې د بیان د ازادۍ د خوندي ساتلو په چوکاټ کې وشي.
غازي امان الله خان په ۲۷ کلنۍ کې د افغانستان پاچا شو او له ۱۹۱۹ کال تر ۱۹۲۹ کال پورې یې واکمني وکړه.
نوموړي په دریم افغان- انګرېز جنګ کې بریتانیا ته په ماتې ور کولو سره د غازي نوم وګاټه.
د هغه په وخت کې د لویې جرګې له لارې افغانستان کې اساسي قانون جوړ شو او له مخې یې ټول افغانان یو شان وبلل شول.
غازي امان الله خان د هېواد د عصري کولو لپاره د اورګاډي پټلۍ هم کابل کې جوړه کړه او هم یې هوايي ډګر په شېرپور کې جوړ کړ.
غازي امان الله خان د افغانستان د پرمختګ او عصري کولو لپاره پر زدکړه ډېر تینګار در لود.
د هغه په وخت کې په افغانستان کې اول ځل د پوهنې وزارت جوړ شو او ښوونځي پرانیستل شول.
راډیو، تلیفون، د چاپ ماشین، کاغذي نوټ او همدارنګه پاسپورټ دود شو.
د غازي امان الله خان په وخت کې له افغانستان مختلفو هېوادونو ته زدکوونکي ولېږل شول.
نوموړي له نورو هېوادونو په تېره له هند هم افغانستان ته ځينې استادان را وستل.
غازي امان الله خان د افغانستان د عصري کولو لپاره د بریتانیا، جرمني او روسیې په ګډون مختلفو هېوادنو ته شپږ میاشتنې سفر درلود.
نوموړي له دغه سفر وروسته د افغانستان د لا عصري کولو هڅې چټکې کړې، خو د هغه له اصلاحاتو سره وروسته پاتې ټولنه جوړه نه وه. د بچه سقاو یا حبیب الله کلکاني په مشرۍ د نوموړي ضد پاڅون بریالی او شاه امان الله غازي ایټالیا ته جلا وطن شو.
