د طالبانو دفاع وزیر ملا یعقوب د افغانستان د خپلواکۍ بیا اخیستلو د ۱۰۴ کلیزې په لمانځغونډه کې وویل، افغانانو په یوه پېړۍ کې ۳ امپراتورۍ ماتې کړې. خو د افغانستان ژغورنې لپاره د مقاومت ملي جبهې په نوم د طالبانو مخالفه ډله وايي، «اوس د افغانستان خپلواکي تر پوښتنې لاندې ده.»
په دې جبهه کې د افغان پخواني حکومت چارواکي ګډون لري، چې طالبانو یې مقابل کې جګړه کوله.
طالبانو په افغانستان کې د امریکا په مشرۍ د ناټو ځواکونو شتون د دغه هېواد د «نیواک» په مانا باله.
ملا یعقوب دفاع وزارت کې له انګرېزیانو د افغانسان د خپلواکۍ بیا اخیستلو د ۱۰۴ کلیزې مراسمو ته په وینا کې د امریکا وتل هم د دغه هېواد ماتې وبلله.
هغه زیاته کړه: «په یوه پېړۍ کې مو انګرېزانو ته ماته ور کړه، روسانو ته مو ماته ور کړه. امریکایان مو مات کړل. دا د ټولو افغانانو لپاره د ویاړ ځای دی.»
نوموړي افغان ملت ته په خطاب زیاته کړه: «په ټول توان به هڅه کوو چې افغانستان بیا د جنګ جګړو تورو تیارو ته ور ونه ګرځي او په دې برخه کې به ملت اوږه په اوږه را سره ولاړ وي.»
د طالبانو د کورنیو چارو وزیر سراج الدین حقاني هم دې مراسمو ته وینا کې وویل، «د نړۍ امپراتوران په غرور افغانستان ته راغلي، خو خدای تعالی دلته زلیل کړي دي.»
خو د افغانستان ژغورنې لپاره د مقاومت ملي جبهې په نوم د طالبانو مخالفه ډله وايي، «د یوې توندلارې او د نورو په لاس روزل شوې ډلې په حاکمیت کې اوس د افغانستان خپلواکي تر پوښتنې لاندې ده او اوس د افغانستان د چارو ډېره برخه د نورو په لاس اداره کېږي.»
دې شورا د خپلواکۍ ورځې په مناسبت خبرپاڼه کې ویلي:«په ۱۳۸۰ کال کې د طالبانو د لومړني حکومت تر پرځېدو او د جمهوري نظام په جوړېدو سره ازادي او ولسواکي واکمنه شوه، که څه هم په دې برخه کې ننګونې وې، خو مختلفو برخو کې بریاوې هم وې.»
د دوی خبرپاڼه کې پر افغانستان د طالبانو واکمنېدو ته په اشاره زیاته شوې: «د ۱۴۰۰ کال د اسد پر ۲۴ افغانستان بیا د ترهګرۍ مثلت - د افغان طالبانو، پاکستاني طالبانو او القاعده- له نیواک سره مخ شو.»
د دوی په خبره، دې پېښې سره د افغانستان ډېرې لاسته راوړنې له منځه لاړې او نور هم د له منځه تلو په حال کې دي.
