د افغانستان د خبریالانو مرکز د یکشنبې په ورځ اعلان وکړ، چې همیشه بهار راډیو ټلویزیون په ننګرهار کې خپل فعالیت بېرته پیل کړ. دغه رسنۍ نږدې درې اوونۍ وړاندې د طالبانو له خوا تړل شوې وه او کارکوونکي یې ځورول شوي وو.
د خبریالانو د ملاتړ دغه مرکز ویلي، د همیشه بهار راډیو ټلویزیون مسوول اتل ستانکزي د دې خبر پخلی کړی او ویلي یې دي، چې پرون ناوخته د ننګرهار لپاره د طالبانو د اطلاعات او فرهنګ ریاست د استازي له لوري د دغې رسنۍ د دروازې مهرلاک مات او دروازه يې بېرته پرانیستې ده.
په ننګرهار کې د طالبانو د اطلاعاتو او کلتور ریاست مشر صدیق الله قریشي بدلون وویل، دغه رسنۍ د "ځینو سرغړونو" له امله د لنډې مودې لپاره تړل شوې وه.
د زمري میاشتې په ۹مه نېټه د نجونو لپاره د ژورنالیزم د روزنې پرواګرام په اعتراض کې طالبان د همیشه بهار ټلویزیون ته ورننوتل او ځينې ګډونوال او مسوولان یې وډبول او پروګرام يې ور ړنګ کړ.
په دې رسنۍ کې د ښځو لپاره د ژورنالیزم د روزنیز کورس له ګډوډولو یوه ورځ وروسته د طالبانو له لوري د دغې رسنۍ فعالیت بند شو.
په کور د ننه او بهر د خبریالانو د ملاتړ ادارو ويلي، چې طالبانو په دې وروستیو کې یو ځل بیا په رسنیو او خبریالانو کړۍ تنګه کړې او يو شمېر خبریالان يې بندیان کړي هم دي.
