د بريتانيا حکومت وايي د روان کال د سرطان تر ۹ په دغه هېواد کې د پناه غوښتونکو شمېر یو لک ۷۵ زره ۴۵۷ کسانو ته رسېدلی دی. د بریتانيا د کورنیو چارو وزارت د شمېرو له مخې، دې نوي ريکارډ ته په کتو د تېر کال له همدې نېټې تر اوسه په دغه هېواد کې پناه غوښتنه ۴۳ سلنه زیاته شوې ده.
د انفو مایګرنتس په وینا، دا شمېره له ۲۰۱۰ میلادي کال څخه چې بریتانوي چارواکي د پناه غوښتنې شمېر ارزوي، بې ساری ریکارډ دی.
د بریتانیا د کورنیو چارو وزارت ارقام دا هم ښیي چې د ۲۰۲۲ میلادي کال د جولای او ۲۰۲۳ میلادي کال د جون میاشتې تر منځ ۴۱ سلنه د پناه غوښتنلیکونه د هغو کسانو دي چې په کښتیو کې له مانش کاناله دغه هېواد ته رسېدلي دي.
د دغو شمېرو له مخې، په دې موده کې ټولټال ۹۷ زره او ۳۰۷ نویو کسانو په برېتانیا کې د پناه غوښتنه کړې چې تر تېر کال ۱۹ سلنه زیاتوالی ښيي.
د دې شمېرو په اساس، د هانک ګانګ او اوکرایني اتباعو پرته، له البانیایانو وروسته، افغانانو او ایرانیانو تر نورو ډېره په برېتانیا کې پناه غوښتې ده.
بریتانیا ته د پناه غوښتونکو د تګ د محدودولو لپاره لندن اوس هڅه کوي چې د ځینومالي پلانونو په ملاتړ سره دې هیواد ته د مهاجرت سیلاب کم کړي.
روانډا ته د پناه غوښتونکو د ویستلو له پلان سره سره، د ګارډین د جولای میاشتې د راپور له مخې، د برېتانیا د کورنیو چارو وزارت په ۲۰۲۲ میلادي کال کې د ترکیې پوله ساتو ته ۳.۵ میلیونه یورو ورکړل چې د افغان کډوالو په بیرته ستنولو کې له دوی سره مرسته وکړي.
همداراز بریتانیاد روان کال په پسرلي کې د یوې موافقې له مخې ژمنه وکړه، چې فرانسې ته به د سمندري پولو د پوځي کنټرول لپاره په څلورو کلونو کې له ۵۰۰ میلیونو ډېرې یورو ورکړي.
