ولسمشر ویلادیمیر پوتین د واګنر وسلوالو ته امر کړی چې په رسمي توګه د روسیې له حکومت سره خپله وفاداري اعلان کړي. روسي چارواکو ویلي چې د دې ډلې مشر یوګني پریګوژین په هغه الوتکه کې و چې د چهارشنبې په ماښام د مسکو په شمال لویدیځ کې وغورځېده.
د دل ویدیځ کارپوهان وايي چې پریګوژین د پوتین په امر وژل شوی، خو کرملین دا تورونه «مطلق درواغ» بولي. کرملین د پریګوژین وژل کیدل نه دي تایید کړي او ویلي یې دي چې د څیړنو پایلې ته باید په تمه اوسو.
د روسیې ولسمشر د پنجشنبې په ورځ د پریګوژین او د دغې پېښې د قربانیانو له کورنیو سره خپله خواخوږي څرګنده کړه. پوتین د پریګوژین د ستاینې پرمهال وویل، چې هغه «جدي تېروتنې» هم کړې.
د واګنر ډلې تر قوماندې لاندې ځواکونو ته د جبري وفادارۍ قسم په اړه د پوتین نوی حکم د کرملین لخوا د واګنر په څیر خصوصي نظامي ډلو کنټرول لپاره یو څرګند اقدام دی.د پوتین فرمان د جمعې په ورځ صادر شو.
دا فرمان چې د کرملین په ویبپاڼه کې خپور شوی، هر هغه څوک چې د پوځ په استازیتوب کار کوي یا د هغه څه ملاتړ کوي چې مسکو یې په اوکراین کې خپل «ځانګړي پوځي عملیات» بولي، له روسیې سره د وفادارۍ رسمي سوګند ته اړ کوي.
