د ایران د اټومي پروګرام مشر محمد اسلامي وايي، د دغه هېواد د پارلمان له خوا په جوړ شوي چوکاټ کې د یورانیمو بډایول دوام لري. نوموړي د یکشنبې په ورځ دا خبره د دې پوښتنې په ځواب کې وکړه، چې ایران د یورانیمو بډایول له ۶۰ سلنې ټیټ کړي دي.
هغه دغه قانون ته په اشاره زیاته کړه: «زموږ یورانیم بډایول د ستراتیژیک اقدام د قانون له مخې روان دي.»
د دې میاشتې په لومړیو کې والسټریټ جورنال راپور ور کړ چې ایران د وسلې په کچه د یورانیم بډایولو زېرمه کول کم کړې او هم یې د ۶۰ سلنه په کچه بډایه شوي یورانیم نري کړي دي.
وال سټرایټ د خپلو سرچینو په حواله د ایران دا ګام له امریکا سره د تاوتریخوالي کمولو لپاره ګټور بللی و.
په ۲۰۲۰ کال کې د ایران توندلاري پارلمان د یوه قانون په تصویب سره حکومت ته اجازه ور کړه چې که نور لوري د ۲۰۱۵ کال اټومي تړون پوره نه پلی کوي، نو تهران هم له ټاکلی حد یورانیم ډېر بډایولی شي.
په ۲۰۱۸ کال کې له دې تړون د امریکا په وتلو او پر تهران د بندیزونو بیا لګولو پسې ایران هم له اټومي تړون سرغړونه پیل کړه.
د ۲۰۱۵ کال اټومي تړون له مخې ایران ۳.۶۷ سلنه پورې یورانیم بډایولی شي، خو دغه هېواد پر ۲۰۲۱ کال تر ۶۰ سلنې ټینګوالي یورانیم بډایول پیل کړل.
ایران په دغه ګام سره مواد دومره بډایوي چې اټوم بم جوړولو ته یې نږدې کړی دی، خو تهران تل وايي، چې اټومي پروګرام یې سوله ییز دی او اټومي وسلې نه جوړوي.
