پښتون ژغورنې غورځنګ: تر هغه پورې کرار نه کېنو چې سېمې مو امن نه شي
د پښتون ژغورنې غورځنګ مشر منظور احمد پښتین په خپل یوه تازه ويډيويي پیغام کې يو ځل بیا د پاکستان حکومت د ده د ملګرو په زنداني کولو کې ګرم بللی.
د پښتون ژغورنې غورځنګ مشر منظور احمد پښتین په خپل یوه تازه ويډيويي پیغام کې يو ځل بیا د پاکستان حکومت د ده د ملګرو په زنداني کولو کې ګرم بللی.
هغه زیاته کړې، چې په دې وروستیو کې د ده د نيول شویو ملګرو په ځانګړي ډول د پاکستان په پخوانۍ قومي اسمبلۍ کې د سویلي وزیرستان د خلکو استازي علي وزیر څخه غوښتل شوي، چې نور په ورته غونډو کې برخه وانخلي.
ټيک لس ورځې وړاندې د پښتون ژغورنې غورځنګ د اسلام اباد په څنډو کې يوه لويه غونډه وکړه، چې پکې د دغه غورځنګ مخکښو غړو د پاکستان پر حکومت او پوځ توندې نيوکې وکړې او هغوی يې د پښتنو په سيمو کې په امن راوستلو کې پاتې وبلل.
پښتين په خپل دغه ويډیویي پیغام کې ویلي، چې د ده له تازه نيول شویو ملګرو څخه د څېړنو پر مهال غوښتل شوي چې: « زموږ دا اوس نیول شويو ملګرو ته يې ويلي، چې تاسو په پښتنو سیمو کې د طالبانو د بیا راتلو په وړاندې ولې درېږئ او شور جوړوئ؟ هغو پرېږدئ چې راشي دا د دوی خپلې سېمې دي.»
په دې وروستیو کې د پښتون ژغورنې غورځنګ له شمالي وزیرستان نیولې بیا تر سویلي پښتونخوا کوېټې پورې په ټولو پښتنو سیمو کې د طالبانو د بېرته راتلو په وړاندې د (امن جرګې) تر نامه لاندې پراخې غونډې کړې دي او په خپلو سیمو کې يې د طالبانو د بيا راتګ په وړاندې مخالفت کړی.
منظور پښتين وړاندې وايي چې:«علي وزیر ته يې په زندان کې ویلي، چې موږ دې که دلته ووژنو نو څوک به ستا پوښتنه راڅخه وکړي؟ دا د افسوس ځای دی.»
منظور پښتن په خپلو پلویانو په دې ويډیو کې غږ کړی، چې د را روانې سېپټمبر میاشتې په لومړۍ ورځ به په کويټه، کراچۍ او پېښور کې احتجاجي غوندې کوي او په پښتنو سیمو کې د امن راستلو په پار به داسې غونډو ته دوام ورکوي.
