د امریکا په فلوریډا ایالت کې یوه سپین پوستي سړي چې دوه وسلې یې په لاس کې وې، لومړی درې تورپوستي وژلي او بیا یې په یوه پلورنځي کې ځان هم وژلی. په جکسن ویل ښار کې د پولیسو چارواکي وايي، دغه پېښه تېره ورځ د "توکم پالنې" له امله رامنځته شوې وه.
د پوليسو چارواکو ويلي، چې د دغې پېښې قربانيان دوه نارينه تورپوستي او يوه تورپوستې مېرمن ده.
د جکسن ویل ښاروال (جې،کې، واټرز) وویل، چې برید کوونکي له دې پېښې مخکې رسنیو، پولیس چارواکو او خپلې کورنۍ ته څو لیکونه لیکلي وو، چې له تورپوستو څخه یې خپله کرکه په کې څرګنده کړې وه.
د امریکا د فدرالي څېړنو د ادارې چارواکو ویلي، چې دوی په دې برخه کې د «کرکې له امله جنایت» په نامه خپلې څېړنې پیل کړې دي.
د شمېرو له مخې، سږ کال په امریکا کې د وسلهوال تاوتریخوالي پېښې ۴۶۹ ته لوړې شوې دي.
