د لغمان په قرغه يیو ولسوالۍ کې سرچينې وايي، چې د واده د مراسمو په موټرو کې د موسیقۍ د غږولو له امله يو ځوان د طالبانو په ډزو ووژل شو. د سرچینو په وینا، دغه پېښه هغه مهال وشوه چې د واده د مراسمو یو کاروان له سیمې څخه تېرېده او موسیقي یې غږوله.
د سرچينې د مالوماتو له مخې، د طالبانو په دې ډزو کې د سميع الله په نوم يو ځوان چې د ننګرهار پوهنتون د کرنې پوهنځي د لومړي کال زدهکړیال و وژل شوی.
د لغمان ځايي چارواکو تر اوسه په دې اړه څه نه دي ويلي.
دا په داسې حال کې ده، چې طالبانو دوه کاله وړاندې هم د واده پر دوو مراسمو د موسيقۍ غږولو له امله ډزې کړې وې، چې په پایله کې یې درې تنه ووژل شوي او څو نور ټپيان شوي وو؛ خو هغه وخت طالبانو ویلي وو، چې وسلهوالو د طالبانو له نوم څخه ناوړه ګټه پورته کړې ده.
افغانستان د طالبانو له واکمنېدو وروسته دغې ډلې د موسیقۍ غږول او اورېدل حرام ګڼلی او وایي،چې د خوښۍ په مراسمو کې هم باید موسیقي ونه غږول شي.
