نوبل بنسټ د شنبې په ورځ وویل، له پراخو نیوکو وروسته یې د سږني کال د نوبل جایزې مراسمو ته د روسیې، ایران او بیلاروس سفیرانو له بللو ډډه کړې ده. تېر کال هم پر اوکراین د روسیې د برید له امله د روسیې او بیلاروس سفیران دې مراسمو ته نه وو بلل شوي.
دغه بنسټ د پنجشنبې په ورځ اعلان وکړ، چې د دغو دوو هېوادونو او د ایران سفیر ته به په ډیسمبر میاشت کې په دغو مراسمو کې د ګډون بلنه ورکړي.
خو نوبل بنسټ دغه پرېکړه په سویډن کې له پراخو غبرګونونو سره مخ شوه او د دغه هېواد د یو شمېر سیاسي ګوندونو مشرانو اعلان وکړ چې دا مراسم به تحریم کړي.
نوبل بنسټ د شنبې په ورځ په یوه بیانیه کې د دې غبرګونونو په ځواب کې وویل: «موږ په سویډن کې سخت غبرګونونه درک کوو او غوره ګڼو چې د تېر کال استثنایي کار تکرار او د روسیې، ایران او بیلاروس سفیرانو ته د ګډون بلنه ورنه کړو».
د نوبل جایزې ګټونکي د اکتوبر په پیل کې اعلانیږي او د نوبل له شپږو جایزو پنځه یې هر کال په سټاکهولم کې ور کول کېږي.
دې جایزو ته د کاندیاتو د غوره کولو بهیر هم د ۵۰ کلونو لپاره پټ ساتل کیږي.
د نوبل سولې جایزه په اوسلو کې په جلا مراسمو کې ورکول کیږي.
