د غزني سیمه ییزو سرچینو ویلي، چې طالبانو په ناور ولسوالۍ کې له څلویښتو ورځو بند او ربړې وروسته ۱۷ تنه په ضمانت خوشي کړي. سرچينې وايي، په ۱۳۹۳ کې د ۲۳۰ پسونو د ورک کیدو په اړه د کوچیانو له ادعا وروسته، طالبانو دغه کسان د چنګاښ په ۲۸مه ونیول.
ځايي خلکو چې د امنیتي ستونزو له امله يې نه غوښتل نوم يې یاد شي، وويل چې دغه ١٧ کسان د جوشان، سبزنالې او واغ کليو اوسېدونکي دي.
د يادو سرچينو په وينا، طالبانو کوچيانو ته د پنځه ميليونه افغانيو له ورکړې وروسته دغه ۱۶ تنه يې وروسته له ضمانت اخیستلو خوشې کړي، خو ټاکل شوې چې اوولسم کس يې چې د غزني ښار په یوه روغتون کې تر درملنې لاندی دی وروسته به بېرته زندان ته ولیږدول شي.
زمونږ سرچینو زیاته کړې چې، طالبانو دغه سړی سخت شکنجه کړی او له همدې امله روغتون کې تر درملنې لاندې دی.
دې سرچینې څرګنده کړې، په دغه موده کې چې یاد شمیر کسان په بند کې وو، د طالبانو استازو دوی ته اجازه نه ورکوله، چې د خپلو خپلوانو په ګډون دې له چا سره وویني او هره ورځ به یې د دوی پر بندخونې اوبه ور پاشلې.
د ځایي خلکو په وینا، په دغه موده کې طالب جنګیالي ددوی کلیو ته ورغلي و چې په دغو کلیو کې ورته نور کسان هم ونیسي.
د دغو کسانو د مالوماتو له مخې، کوچيانو ادعا کړې چې د اجرستان (دايه) او ناور د پولو په دښته کې د شپې له خوا د دوى ٢٣٠ پسونه ورک شوي او دوه شپانه هم وژل شوي دي.
د دوی په خبره، د طالبانو سیمه ییزو چارواکو د ناور د دغو درېیو کلیو پر اوسېدونکو فشار راوړی، څو د کوچیانو د پسونو په بدل کې پنځه میلیونه افغانۍ ورکړي.
دا په داسې حال کې ده، چې په دې وروستیو کې د کوچیانو او د جلریز ولسوالۍ د کلیو د اوسیدونکو د شخړو د هواري شورا د یوې غونډې ویډیو په خواله رسنیو کې خپره شوې، چې یو کس پکې د شورا پریکړه لولي.
د دې پرېکړې له مخې، "د کوچیانو او کلیوالو ترمنځ ټولې شخړې" چې ډیری یې د کوچیانو د بریدونو او د هزاره کلیوالو د کورونو سوځولو پورې تړاو لري، په عمومي بخښنه کې شاملې شوې، خو د کوچیانو د ادعا په قضیه کې بیا پریکړه شوې چې هزاره ګان دې د مینې او ورورګلوۍ له مخې دوی ته یو میلیون او۷۵۰زره افغانۍ ورکړي.
د شخړو د هوارۍ شورا چې د طالبانو تر واک لاندې فعالیت کوي، په خپله پرېکړه کې زیاته کړې ده چې، که له دواړو خواوو څخه یو له دغې پرېکړې سرغړونه وکړي، باید ۵ لکه افغانۍ جریمه ورکړي.
د طالبانو ځايي چارواکو تر اوسه د دغو دواړو پيښو په اړه په رسمي ډول څه نه دي ويلي.
د ۱۴۰۰ لمریز کال د زمري په میاشت کې د طالبانو له واکمنیدو وروسته دغې ډلې د کوچیانو د بې بنسټه ادعاوو له مخې هزاره ګان تر سخت فشار لاندې راوستي دي او دوی یې په ډلییزه توګه مجازات کړي دي.
