د ترکیې د ۱۰۰۰ مترو په یو ژور غار کې د بند سړي پسې عملیات پیل شول
د پنجشنبې په ورځ تر ۱۵۰ زیاتو ژغورونکو د ترکیې په جنوب کې په یوه غار کې بند پاتې امریکايي څېړونکي پسې د ژغورنې عملیات پیل کړل.
د پنجشنبې په ورځ تر ۱۵۰ زیاتو ژغورونکو د ترکیې په جنوب کې په یوه غار کې بند پاتې امریکايي څېړونکي پسې د ژغورنې عملیات پیل کړل.
ترکي چارواکي وايي، مارک ډیکي د توروس غرونو ته څېرمه د مرکا په غار کې د اکتشافي ماموریت پر مهال له خونریزۍ سره مخ شوی دی.
مارک ډیکي په خپلې لومړۍ ویډیو کې چې اسوشیتیډ پریس خپره کړې له ترکي چارواکو څخه مننه کړې، چې د هغه د ژوند د ژغورلو په هڅه کې دي.
ډیکي د ناروغۍ له امله د دې اونۍ له شنبې راهیسې په دې غار کې بند پاتې دی.
یوه ترکي چارواکي بولنت ګینک رویټرز خبري اژانس ته ویلي، چې د دغه ۴۰ کلن سړي په ژغورلو کې د کروشیا او ایټالیا د ژغورونکو په ګډون څو نړۍوالې ژغورونکې ډلې شاملې دي.
هغه زیاته کړه، چې د ژغورنې عملیات به ښايي لس ورځې وخت ونیسي؛ خو د دغه امریکايي وګړي د روغتیايي وضعیت خرابوالی یا ښه والی کولای شي د ژغورنې عملیات چټک یا ورو کړي.
بولینټ ګنګ وویل،چې د مارک ډیکي حالت ښه شوی او هغه اوس کولی شي په خپلو پښو ودریږي.
په دې غار کې د ټیلیفون یوه کرښه چې د ۱۰۴۰ مترو په ژوروالي کې کار کوي، نصب شوې او په دغه ځای کې د ارتباطاتو نور سیستمونه هم نصب شوي دي.
د ترکيې او نړۍوالو ژغورونکو ډلو انځورونه چې د دې غار په شاوخوا کې يې کمپونه جوړ کړي دي خپاره شوي دي. دا په ترکیه کې درېیم لوی غار دی چې شاوخوا 2140 متره ژور دی.
