عباس ستانکزی: پر لوېدیځو هېوادونو افغانستان ته ستنېدل او رغونه کې یې برخه اخیستل واجب دي
د طالبانو د بهرنیو چارو وزارت سیاسي مرستیال ویلي، چې د نړیوال ایتلاف د هغو غړو لپاره چې په افغانستان کې پوځي ځواکونه لرل، دغه هېواد ته د بیا رغونې لپاره ستنېدل «واجب» دي.
عباس ستانکزي زیاته کړه، چې دغو هېوادونو په افغانستان کې هر ډول وسلې وکارولې، اوس پر دوی «واجب» دي، چې د دغه هېواد په بیارغونه کې ونډه واخلي.
ښاغلي ستانکزي په افغانستان کې د کام ایر شرکت د جوړېدو د شلمې کلیزې په مناسبت مراسمو کې وویل، چې د دوحې د تړون له مخې هغه هېوادونه چې په افغانستان کې یې ځواکونه لرل«مکلف» دي، چې دغه هېواد ته ستانه او د افغانستان په بیارغونه کې برخه واخلي.
د هغه راپور له مخې چې د طالبانو تر کنټرول لاندې ملي راډیو ټلویزیون د جمعې په ورځ (د وږي ۱۷مه) خپور کړ، د طالبانو د بهرنیو چارو وزارت سیاسي مرستیال وویل، دغې ډلې د بهرنیو ځواکونو د خوندي وتلو مسوولیت په «ښه ډول» ترسره کړ او اوس دا د لوېديځ مسووليت دی چې په افغانستان کې د بنسټونو د بيا جوړولو په اړه خپله ژمنه پوره کړي.
عباس ستانکزی په دوحه کې له امریکا سره د طالبانو د سولې په خبرو کې د طالبانو مرکچي و.
د ۱۴۰۰ لمریز کال د اسد په میاشت کې کابل ته د طالبانو تر ننوتلو څو میاشتې وروسته ښاغلي ستانکزي وویل،دی هیله لري چې په کابل کې د امریکا سفارت بیرته پرانستل شي.
دغه لوړپوړي طالب چارواکي په کابل کې د ١٤٠٠ لمریز کال په قوس میاشت کې وويل، چې امریکا ژمنه کړې وه، چې د دوحې تړون له مخې له وتلو وروسته به خپل سفارت په کابل کې پرانیستی ساتي.
ده په هغه وخت کې زیاته کړې وه: «دا د نړۍ او په ځانګړې توګه د امریکا دنده ده، چې د افغانستان په بیارغونه کې فعاله وڼډه واخلي. لکه څنګه چې دوی په تېرو شلو کلونو کې زموږ اقتصاد ویجاړ کړ، اوس دا د دوی دنده ده چې بیرته راشي او د دې هېواد د اقتصاد په بیارغونه کې فعاله ونډه واخلي».
په همدې کال کې عباس ستانکزي ویلي و، چې کله امریکا افغانستان ته راستنه شي، اروپا به هم په کابل کې خپل سفارتونه پرانیځي.
خو د طالبانو له دوه کلنو پرله پسې غوښتنو وروسته د نړۍ هېڅ حکومت د افغانستان د حکومت په توګه د طالبانو رژیم په رسمیت نه دی پېژندلی.
اروپايي ټولنې افغانستان ته د بشري مرستو د رسولو لپاره خپل استازي لېږلي، خو په افغانستان کې د اروپايي هېوادونو او امريکا سفارتونه تړلي دي.
