د طالبانو د حکومت ویاند ذبیح الله مجاهد وايي، د دې ډلې مشر ملا هبت الله اخوندزاده د پنجشنبې په ورځ نیمروز ولایت ته لاړ. ښاغلي مجاهد د شنبې په ورځ اېکس کې لیکي چې مشر یې پر ځايي ولسي او نظامي چارواکو سربېره د جهادي مدرسې له ملایانو او مخورو سره هم ولیدل.
نوموړی زیاتوي چې ملا هبت الله اخوندزاده په دې سفر کې له ځايي چارواکو وغوښتل چې خپلې دندې سمې پر ځای کړي او د خلکو ستونزو ته رسیدګي وکړي.
ذبیح الله مجاهد تېره شنبه هم یوه ټوېټ کې ویلي چې د دې ډلې مشر روزګان ولایت ته دوه ورځنی سفر درولود.
لا هم د هغه او اوسني سفر په بهیر کې له ځايي طالب چارواکو او یا خلکو سره د نوموړي د سفر ویډیو یا غږ نه دی خپور شوی.
په یوه اونۍ کې دوو ولایتونو ته د ملا هبت الله اخوندزاده د سفر په هکله خبرونه په داسې حال دي چې لا هم د طالبانو د دوه کاله او یوې میاشتې واکمنۍ سره د دوی مشر عامه محضر کې نه دی لیدل شوی.
