د طالبانو پوهنې وزیر:نور هیوادونه له ټکنالوژۍ سره اسمان ته وختل، موږ لا هم پر ځمکه ناست یو
د طالبانو د پوهنې وزیر حبیب الله اغا پر عصري او دیني زدکړو ټینګار وکړ او ویې ویل: «نور هېوادونه په ټکنالوژۍ اسمان ته رسېدلي، موږ لا هم پر ځمکه ناست یو.» خو نړۍ وايي، طالبانو، نجونې له زدکړو په راګرځولو سره د افغانستان د پرمختګ مخه نيولې.
حبیب الله اغا د جوزجان په آقچې ولسوالۍ کې د یوه ښوونځي د پرانیستې په مراسمو کې په اوسني عصر کې د ټکنالوژۍ د پرمختګ یادونه وکړه او ويې ویل: «موږ شاته پاتې یو، سړکونه نه لرو، برېښنا نه لرو او که وي هم کیلي يې د نورو په لاس کې ده.»
دغه طالب چارواکی په داسې حال کې د زده کوونکو لپاره د عصري علومو د زده کړې د اړتیا خبره کوي، چې دوه کاله وړاندې طالبانو ښوونځيو او پوهنتونونو ته د نجونو پر تګ بندیز ولګاوه.
د شمېرو له مخې په دغو دوو کلونو کې شاوخوا ۸۰ سلنه د زده کړو پر شرایطو برابرې نجونې په ښوونځیو او پوهنتونو کې له زده کړو بې برخې شوې.
بل خوا ملګري ملتونه وايي چې د زده کړوڅخه د نجونو بې برخې کول په افغانستان کې په څو نسلونو باندې اغېزه لري او د ماشومو نجونو واده کول، د ماشومانو اجباري کار او همدارنګه د ښځو په وړاندې د کورني تاوتریخوالي د زیاتوالي لامل کیږي.
د نجونو د ښوونځیو او د ښځو د کار د بیا پرانستلو لپاره د نړیوالې ټولنې او یو شمېر اسلامي هېوادونو له ټینګار سره سره، طالبانو د ښځو بې برخې کولو ته دوام ورکړی او پر وړاندې یې سختې تګلارې پلي کوي.