په ډېلي کې د افغانستان سفارت وايي، د بې مخینې شرایطو له امله مجبور دی چې ټول فعالیتونه ودروي. د افغانستان سفارت وايي، دا پرېکړه یې د هندي حکومت د نه ملاتړ له امله کړې ده. د هند بهرنیو چارو وزارت د افغان سفارت د دې پرېکړې او څرګندونو په هکله لا څه نه دي ویلي.
د سفارت د اعلامیې له مخې، دوی خپل فعالیت د هند د ډيپلوماټیکې پاملرنې د نشتوالي له امله کوي.
په بیان کې راغلي چې سفارت په تېرو شپږو میاشتو کې څو ډيپلوماټیک یادښتونه د هند بهرنیو چارو وزارت ته استولي، خو د ستراتیژیک مشارکت او نورو دوه اړخیزو هوکړو له مخې دې موجهو یادښتونو کې یې یوه ته هم پاملرنه نه ده شوې.
سفارت وايي: «د ډیپلوماټیک ماموریت د حالت، ښوونیزو نوښتونو، کونسلي خدمتونو د ملاتړ، د بشرپالو مرستو د تنظیم او له افغان سوداګرو سره د سوداګریزو مرستو په ګډون د مهمو اندېښنو په هکله د بې شمېره غوښتنو سره سره لازمې هڅې ونه شوې او لا هم چارواکو ډېر کم ملاتړ وکړ.»
سفارت دا هم وايي، چې په تېر جون کې له طالبانو سره د نوي ډېلي د ډيپلوماټیکو مناسباتو له پیلېدو مخکې هم دا اداره د ډيپلوماټیکو ملاحظو له پلوه د هند له ملاتړ برخمنه نه وه.
په خبرپاڼه کې تینګار شوی چې هند په کابل کې د سفارت تر پرانیستې وروسته په ډېلي کې له افغان سفارت په سیستماتیک ډول پام اړولی دی.
تېر اپرېل کې د ډېلي لپاره افغان سفیر فرید ماموندزي وویل، چې د جمهوریت له پرځېدو وروسته سفارت له کابل سره هیڅ سیاسي اړیکه نه لري، خو بیا هم په هند کې افغانانو ته خپل خدمتونه وړاندې کوي.
د تېر کال اګسټ کې د هند بهرنیو چارو وزیر وویل، له سفیر پرته یې یوه ډله ډیپلوماټان افغانستان ته ستانه شوي دي.
سابرامانیام جي شنکر دا هم ویلي و چې د سفارت افغان کارمنان هم کار ته ستنېږي او تنخا یې و رکول کېږي.
څو میاشتې مخکې نوموړي دا هم وویل چې پر افغانستان د طالبانو په واکمنېدو پسې ځینې هېوادونو خپل سفیران کابل ته لېږلي، خو هند له سفیر پرته په کابل کې سفارت پرانیستی دی.
