د اذربایجان ولسمشر په نګورنو قره باغ کې د خپل هېواد بېرغ پورته کړ
د اذربایجان ولسمشر الهام علییف د یکشنبې په ورځ په نګورنو قره باغ جمهوریت کې د خپل هېواد بېرغ پورته کړ او دا یې د اذربایجان د خلکو ستره بریا وبلله.
د اذربایجان ولسمشر الهام علییف د یکشنبې په ورځ په نګورنو قره باغ جمهوریت کې د خپل هېواد بېرغ پورته کړ او دا یې د اذربایجان د خلکو ستره بریا وبلله.
دا اقدام په قره باغ کې د اذربایجان له پوځي عملیاتو او په دې سیمه کې د ارمني نژاد د یو شمېر سیاستوالو له نیول کېدو وروسته وشو.
د سپتمبر په میاشت کې د اذربایجان ځواکونو په سیمه کې پوځي عملیات پیل کړل، چې له لنډې مودې وروسته اوربند وشو او زرګونه ارمني نژاده خلک له دغې سیمې ووتل.
ارمنستان اذربایجان تورنوي، چې د نګورنو قره باغ ته له ننوتلو وروسته یې ارمنیان په زوره شړلي، له دوی سره یې جبري عمل کړی او دا یې "توکمیز محوه" کول بللي.
څو ورځې وړاندې ارمنستان پر اذربایجان د توکمیزې تصفیې لپاره د جرمونو په نړۍواله محکمه کې دعوه وکړه او له دې سره سم یې د جرمونو د نړۍوالې محکمې تعهد لیک هم لاسلیک کړ.
خو د اذربایجان د بهرنیو چارو وزارت د باکو پر وړاندې د جرمنو په نړۍواله محکمه کې د دعوې مساله بې اساسه او مسخره وبلله او ویې ویل، چې د ارمنستان دا ډول دعوه ورته خندوونکې ښکاري.
په نګورنو قره باغ کې د ارتساخ ځان بولي حکومت د تلې په شپږمه اعلان وکړ چې منحل کیږي.
د دغه جمهوریت د منحلولو فرمان د قره باغ سیمې د مشر سامویل شهرمانیان له خوا لاسلیک شو او د ۲۰۲۴ کال د جنورۍ په لومړۍ نېټه به منحل شي.
ارمنیان په دې باور دي، چې د دوی د "لرغوني کلتور زانګو" په توګه د دې خاورې له لاسه ورکول یو تاریخي ګوزار دی.
