د ماشومانو د ژغورنې سازمان وايي، د افغانستان په لوېدیځ کې د یکشنبې په ورځ (د تلې ۲۳مې) په زلزله کې لږترلږه څلور کسان مړه او د هرات روغتون ته تر ۱۵۳ ډېر ټپیان ور وړل شوي دي. د امریکا د ځمکې پیژندنې ادارې د زلزلې مرکز د هرات له ښاره شاوخوا ۳۴ کیلومتره لرې ښودلی دی.
د امریکا د ځمکې پیژندنې ادارې د یکشنبې په ورځ د افغانستان په لویدیځ کې د پرله پسې شپږو زلزلو خبر ورکړ.
د دغه سازمان د معلوماتو پر بنسټ، لومړۍ زلزله د رېښتر په کچه ۶.۳، دویمه د رېښتر په کچه ۵،۵ او دریمه د رېښتر په کچه ۴،۲ د افغانستان لوېدیځه برخه ولرزوله.
د دې ترڅنګ څلورمه زلزله د رېښتر په کچه ۴.۲، پنځمه د رېښتر په کچه ۴.۳ او شپږمه د رېښتر په کچه ۴.۴ښودل شوې ده .
طالبانو تراوسه پورې د یکشنبې د ورځې د شپږو پرله پسې زلزلو له امله د اوښتو زیانونو د کره شمېرې په اړه رسنیو ته څه نه دي ویلي.
د ماشومانو د ژغورنې اداره وايي، په رباط سنګي ولسوالۍ کې د بلوچ سیمه او څو نور کلي ویجاړ شوي دي.
افغانستان انټرنشنل ته راپورونه رسیدلي چې، د یکشنبې د ورځې زلزلې د هرات ښار ودانۍ زیانمنې کړې دي.
یوه اونۍ وړاندې په هرات کې د رېښتر په کچه د ۶،۳ درجې زلزلې زرګونه کسان مړه او ټپیان کړل.
ملګرو ملتونو د پنجشنبې په ورځ راپور ورکړ چې ددغو زلزلو ۹۰ سلنه قربانیان ښځې او ماشومان دي.
