د افغانستان انټرنشنل سرچېنو وویل، په تخار کې د طالبانو ملاتړی ملا، چې د ۱۰ او ۱۱ کلونو په عمر پر ۲ نجونو یې جنسي تېری کړی او انځورونه یې اخیستي، تر لنډ بند وروسته خوشې شوی دی.تېره اونۍ د مولوي فضل من الله انځورونه خپاره شول، چې ښودل یې نوموړی ۲ کم عمره نجونې له جنسي پلوه ځوروي.
ځینو سرچینو وویل، چې یوه له هغو کم عمره نجونو څخه چې ملا فضل من الله د جنسي تیري پرمهال ورڅخه انځورونه اخیستي، د یوه پخواني نظامي لور ده.
د ځايي سرچينو په وينا، مولوي فضل من الله د طالبانو د حکومت په تېره دوره کې د دې ډلې يو له مسوولو کسانو څخه و.
هغه اوس کومه رسمي دنده نه لري، خو د دغې ډلې د حکومت ملاتړ کوي.
خپاره شوي عکسونه او ویډیوګانې ښیي چې هغه په کم عمره نجونو د جنسي تیري پر مهال په خپل ګرځنده تلیفون کې د ځان عکسونه او ویډیوګانې اخیستې دي.
افغانستان انټرنشنل ته یوې سرچینې چې نه یې غوښتل نوم یې واخیستل شي وویل: «ملا فضل من الله د خپلو ټولو جنسي تېریو عکسونه اخیستي او په خپل موبایل کې یې ساتلي دي.څه موده وړاندې د دې ملا موبیل خراب شوی او د جوړلو لپاره یې د تخار مرکز تالقان ته وړی و.د موبايل جوړوونکي ملا فضل پېژانده او ټول عکسونه يې ترې اړولي او بيا يې له دې ملا څخه د باج غوښتنه وکړه. نوموړي له ملا فضل څخه د درې سوه زره افغانیو د باج غوښتنه وکړه، خو ملا یوازې ۵۰ زره افغانۍ ورکړې خو عکسونه یې افشا شول»
د دغو انځورونو او ویډیوګانو له خپرېدو او په رسنيو او ټولنيزو شبکو کې د هغوى له غبرګونونو وروسته طالبانو ملا فضل من الله ونيوه، خو درې ورځې وروسته خوشې شو.
په افغانستان کې په اخلاقي جرمونو تورنو کسانو سره د طالبانو د ډلې دوه مخی چلند څو ځله د خبرونو سرټکی شوی دی.
تېره میاشت د دغې ډلې محکمې د کابل برېښنا شرکت رییس ملا احمد اخند ته برات ورکړ. د نوموړي هغه ويډیو خپره شوې وه، چې له خپل یوه ځوان ساتونکي سره یوځای په یوه بړستن کې څملي.
تېر کال د طالبانو د پاسپورټ د دفتر د رییس ورور له څو ښځو سره د شرابو په څښلو ونیول شو، خو د هغه د محاکمې کوم راپور خپور نه شو.
پر دې دوه مخي چلند اعتراض کوونکي وايي، طالبان د اخلاقي جرمونو په تور عامو خلکو ته سزا کوي، خو د خپلو طالبانو او ملاتړو په ورته جرمونو سترګې پټوي.
