د خوړو نړۍوال پروګرام په یوه تازه بیان کې ویلي، چې د هرات له زلزله ځپلو سره نېږدې ۱۹ میلیونه عاجلو مرستو ته اړتیا ده او که چېرې عاجلې مرستې ونه شي ښايي د دغو زیانمنو شویو خلکو ستونزې څو برابره زیاتې شي.
د خوړو دغې ادارې نن چهار شنبه ( د تلې په ۲۵مه) ویلي، چې تر اوسه دوی له زلزله ځپلو سره د مرستې په پار ډېره محدوده بودیجه لري او له هماغې کار اخلي.
یاده اداره وايي، چې تر دا مهاله نېږدې ۱۰۰ زره کسان عاجلو خوراکي مرستو ته اړتیا لري او دوی پر نړۍوالو مرستندویه ادارو غږ کړی، چې له دوی سره عاجل مرستې وکړي.
بل خوا د افغانستان لپاره د ملګرو ملتونو د مرستو د همغږۍ دفتر (اوچا) ویلي، چې د هرات په زلزلو کې ۴۳ زره کسان اغېزمن شوي، له ۳۳۰۰ زیات کورونه زیانمن شوي، چې ۲۱۰۰ کورونه په بشپړه توګه ویجاړ او ۱۷۰۰ نور یې څه نا څه زیانمن شوي دي.
اوچا دغه راز ویلي، چې تر تېرې ورځې پورې د ۱۵۰۰ کسانو مړینه رپوټ شوې او ۲۰۰۰ کسان ټپيان دي.
په هرات ولایت کې لومړۍ زلزله د اکټوبر په اوومه نېټه وشوه، چې بیا وروسته یې بې شمېره نور ټکانونه هم لرل چې له امله یې ګڼ خلک زیانمن شول.
