د افغانستان د پخوانۍ ملي امنیت شورا سلاکار له پاکستانه د افغان کډوالو اېستل د نړیوال قانون او بنسټیزو انساني حقونو خلاف بولي. حمدالله محب د امنیتي ګواښونو په پلمه د پاکستان لخوا د کډوالو اېستل غندي او زیاتوي، چې ډېری افغانانو سره د وتلو پر مهال ناانساني چلن کېږي.
پاکستان افغان کډوال او افغان طالبان د دغه هېواد بریدونو کې ښکېل بولي او د اکتوبر لومړیو کې یې بې قانونه کډوالو ته د یوې میاشتې وتلو لپاره وخت ور کړ.
حمدالله محب د پاکستان د دې تور ردولو سره وايي، د پاکستان د امنیتي ناکامیو پړه پر بې وسه افغانانو اچول د دوی د قربانۍ روښانه بېلګه ده.
نوموړی وايي، ورته تور د جمهوریت پر مهال هم لګېده او افغان کډوال پر ترهګرۍ تورنېدل، «خو څوک چې د ترهګرۍ مسوول پاکستان هغوی ته یې خوندي پټنځي ور کړي وو او نن هم په امن دي: خو بې دفاع او بې ځایه شوي افغانان او ان ځینې پاکستاني وګړي له لسیزو راهیسې د ناسمو امنیتي پالیسو کې سوځي.»
طالبانو او پخوانیو افغان چارواکو سربېره نړیوالو ادارو هم د افغان کډوالو په تړاو د پاکستانۍ اوسنۍ پالیسۍ د بدلېدو غوښتنه کړې، خو تراوسه اسلام اباد په دې برخه کې شاتګ نه دی کړی.
د هغه تحلیل له مخې چې په جنګ ورځپاڼه کې خپور شوی راغلي، چې د اټکل له مخې د طالبانو شاوخوا پنځه زره غړي پاکستانۍ پیژندپاڼې لري.
په دې تحلیل کې راغلي چې د طالبانو پخوانی مشر ملا اختر منصور په ۲۰۱۶ میلادي کال کې د امریکا د بې پیلوټه الوتکې په برید کې ووژل شو، د هغه په جیب کې هم پاکستانۍ برېښنايي پېژندپاڼه وموندل شوه.
هغه مهال چې ښاغلی منصور له ایران څخه پاکستان ته روان و، په بلوچستان کې د امریکا د بې پیلوټه الوتکې په نښه کړ.
د هغو افغانانو برخلیک چې د طالبانو له وېرې تښتیدلي
د جنګ ورځپاڼې په تحلیل کې راغلي چې دا مهال په پاکستان کې د افغان کډوالو بېلابېلې کتګورۍ ژوند کوي.
دې ورځپاڼې په پاکستان کې مېشت افغان کډوال په ۷ بېلابېلو کټګوریو وېشلي دي.
د دې تحليل له مخې يوه له دغو ډلو څخه هغه افغانان دي چې په تېرو دوو کلونو کې د طالبانو د غچ اخیستلو له وېرې یې پاکستان ته پناه وړې ده.
په دې کتګورۍ کې پخواني دولتي کارکوونکي، هنرمندان، مدني فعالان او د بهرنیو بنسټونو همکاران شامل دي.
لوېدیځو حکومتونو له دغو کډوالو څخه یې ځینو ته د ویزې ور کولو ژمنه کړې، خو تر اوسه دغه ویزې نه دي ورکړل شوې.
یو شمېر نور بیا په لنډ مهاله روغتیایي او سیاحتي ویزو پاکستان ته تللي، خو په کابل کې د پاکستان سفارت د دوی ویزې نه دي تمدید کړې.
د پاکستان د جنګ ورځپاڼې په دې تحلیل کې د دغه هېواد له حکومته غوښتل شوي چې له دغو کډوالو سره خواخوږي وکړي او پناه ورکړي.
تر دې وړاندې د بشري حقونو سازمانونو هم ویلي و، دوی اندېښنه لري، چې که دغه افغانان له پاکستانه وایستل شي، نو د طالبانو د غچ اخیستنې له ګواښ سره به مخ شي.