د طالبانو د کابل ولایت د امنیه قوماندانۍ ویاند خالد ځدراڼ د ملي ډېموکراټیک غورځنګ د مشر وروستیو څرګندونو ته غبرګون ښودلی او ویلي یې دي، چې دوی جګړې ته د افغانستان خلک هڅوي.
محسن داوړ په تاجکستان کې د هرات په امنیتي کنفرانس کې ویلي وو، چې په افغانستان کې په زور واکمني نه شي کېدی؛ طالبان د ټوپک په زور افغانستان ته راغلي او باید د ټوپک په زور له افغانستان څخه وایستل شي.
په ورته وخت کې یو شمېر طالب چارواکو او طالب پلوو د نوموړي څرګندونو ته غبرګون ښودلی او محسن داوړ یې په افغانستان کې جګړې ته د خلکو پر ور بللو تورن کړی دی.
د طالبانو د کابل ولایت د امنیه قوماندانۍ ویاند خالد ځدراڼ پر خپلې اېکس پاڼې لیکلي: "هغه دوه مخي چې لر پر عدم تشدد او بر پر تشدد باور لري تل د افغان وژنې نندارچیان پاتې شوي".
نوموړي په خپل یادښت کې محسن داوړ ته په اشارې زیاته کړې، چې دوی په افغانستان کې جګړې ته خلک هڅوي او د جګړې اور ته لمن وهل غواړي.
هغه لیکلي: " دا ګوډاکۍ څېرې اوس دلته پېژندل شوي، په ټولنه کې یې هغه وقار, عزت او حیثت له لاسه ورکړی".
نوموړي ته ورته یو شمېر نورو طالب پلوو هم په ټولنیزو رسنیو کې ورته خشن غبرګونونه ښودلي او زیاته کړې یې ده، چې افغانان باید جګړې ته ونه هڅول شي.
هڅه مو وکړه، چې په دې اړه د محسن داوړ نظر هم راواخلو خو ونه توانېدو.
په ورته وخت کې د خېبر پښتونخوا یو شمېر قامپالو سیاستوالو او مدني فعالانو د محسن داوړ له خبرو ملاتړ کړی او ویلي یې دي، چې طالبانو افغانستان یرغمل نیولی او له دوی څخه باید د افغانستان خلک وژغورل شي.
