د ایران د خراسان رضوي سرحدي ځواکونو قوماندان ویلي، ۱۳ زره او ۲۰۴ تنه افغان کډوال له تایباد پولې افغانستان ته اېستل شوي دي. بريد جنرال مجيد شجاع نن له خبريالانو سره په خبرو كې زياته كړه، چې دغه بې اسناده کډوال په تېره یوه اونۍ کې پیژندل شوي دي.
د ایرنا د راپور له مخې، هغه زياته کړه: دغه افغان کډوال د دوغارون، چې له اسلام کلا سره پر پوله پروت دی، سرحدي دروازو له لارې اېستل شوي او طالبانو ته سپارل شوي دي.
مجید شجاع ټینګار وکړ: هغه افغان کډوال چې په غیر قانوني توګه ایران ته د ننوتو اراده ولري او یا له اجازې پرته په هېواد حضور لري، نیول کیږي او له هېواده به شړل کیږي.
هغه ټینګار وکړ: هغه افغانان چې ایران ته د تلو اراده لري باید له رسمي او قانوني لارې داخل شي.
د ملګرو ملتونو د شمېرو له مخې په روان میلادي کال کې له ایران څخه ۳۱۰ زره افغان کډوال هېواد ته په تدریجي ډول ستانه شوي دي.
د طالبانو د کرنې وزير وایي، هغو افغان کډوالو ته یې چې سرپناه نه لري، د کورنو لپاره د نمرو د ورکولو طرحه جوړه کړې. عطالله عمري وايي، د طالبانو مشرتابه دا طرحه منلې ده او له مخې به یې ډېر ژر کډوالو ته د دوه لکه کورونو لپاره د نمرو ويش پيل شي.
نوموړی چې د نورو ځايي طالب چارواکو سره تورخم ته د کډوالو د ستونزو د اورېدو لپاره تللی وايې، د افغانستان په بېلا- بيلو سيمو کې به د کورنو لپاره دا ۲ لکه نمرې ووېشل شي.
د طالبانو تر واک لاندي باختر خبري اژانس نن جمعه د کرنې د وزير يوه ويډيويې مرکه نشر کړې، چې په تورخم کې له پاکستانه د راغلو کډوالو سره ګوري.
عطاء الله عمري په دغه ویډیو کې وايي: «د هغو کورنيو شمېر، چې لس کسه غړي لري، لس بيسوې او چې د کورنۍ شمېر تر لس کسو زيات وي ۱۵ بيسوې ځمکه او مکمل اسناد ورکول کېږي».
د عمري په وينا، چې د کډوالو لپاره د ښارګوټو د جوړېدو ساختماني پلان د طالبانو د ښار جوړلو وزارت له لوري جوړ شوی، چې ژر به عملي شي.
هغه د دې نومرو د ورکولو دوخت او د جوړېدو په اړه یې نور جزيات ور نه کړل.
اوس مهال له پاکستانه، افغانستان ته تر ۴ لکه زيات کډوال ستانه شوي، چې لويه برخه یې په کمپونو کې تر خېمو لاندې د ژوند سخت حالت تېروي.
ستانه شوي کډوال د سرپناه د نه درلودلو ترڅنګ، د کار د نشتوالي او د اولادونو لپاره د زدکړو پر نه شتون ترڅنګ د ژوند د نورو ستونزو سره هم مخ دي.
له پاکستانه د افغان کډوالو د اېستلو لړۍ د تېر اکتوبر په لومړیو کې پیل شوې او د دغه هیواد چارواکي وایي د راتلونکي کال تر لومړۍ میاشتې به څه باندې یو میلیون افغان کډوال له پاکستانه وباسي.
طالبانو پورې اړوند المرصاد وېب پاڼې راپور خپور کړی چې طالبانو په هرات او نیمروز ولایتونو کې د داعش د یو ګروپ پرضد عملیات کړي دي. دغه وېپاڼه زیاتوي په دغو عملیاتو کې طالبانو د داعش یو وسلوال وژلی او څو نور یې ژوندي نیولي دي، چې په یوه ګاونډي هېواد کې د داعش یوه مشر رهبري کول.
د طالبانو اړوند المرصاد وېپ پاڼې نن جمعې ورځ په راپور کې لیکلي چې په دغو عملیاتو کې یې له وژل شوي داعش وسلوال څخه یوه تومانچه او کلاشنګوف ترلاسه کړي دي.
په دغه راپور کې راغلي چې طالبانو دا عملیات د هغه داعش ګروپ پرضد کړي، چې تېره اونۍ یې د هرات ښار په جبرييل ښارګوټي کې شپږ اهل تشیع اووژل او درې یې ټپیان کړل.
راپور زیاتوي دغو نیول شويو داعش وسلوالو له دې وړاندې هم پر یو شمیر اهل تشیع افغانانو په بریدونو کې لاس درلود.
د هرات ښار د جبریل ښارګوټي ځینې اوسېدونکو څه موده وړاندې په یوه غونډه کې د طالبانو والي ته وویل، یا دې د خلکو امنیت ونیسي او یا دې وسلې ورکړي، چې خپل امنیت ونیسي.
په دغه غونډه کې د جبريل ښارګوټي اوسېدونکو په هرات کې د شيعه ديني عالمانو د پرلپسې وژنو د عاملينو د نيولو او مجازاتولو غوښتنه هم وکړه.
المرصاد وېبپاڼې د طالبانو د سرچينو له قوله لیکلي چې نيول شويو داعشیان په يوه ګاونډي هيواد کې د داعش د يوې شبکې له لوري رهبري کېدل.
که څه هم د طالبانو سرچینو د ګاونډي هیواد نوم نه دی په ډاګه کړی خو له دې وړاندې المرصاد د تحریک طالبان پاکستان پخواني ویاند احسان الله احسان له قوله یې ویلي و، چې د داعش ـ خراسان مشران د پاکستان نظامیانو په مېلمستونونو کې ساتل کیږي.
د طالبانو سرچینې ویلي چې له نیولو شوو داعش وسلوالو څخه د دې ډلې یوه ځانګړې فني او مسلکي ټیم څېړنې پیل کړې دي او تمه ده چې نور انکشافات هم رامنځته شي.
طالبانو تر اوسه دنیول شوو داعش وسلوالو هویت نه دی څرګند کړی او نه یې هم دا په ډاګه چې څو تنه نیول شوي دي.
المرصاد وېبپاڼه په کابل کې د طالبانو واک ته رسېدو سره فعاله شوې ده او د داعش اړوند ټول خبرونه په دغه وېبپاڼه کې نشریږي.
طالبان په دې کار سره غواړي چې د دوی تر کنټرول لاندې په نورو داخلي رسنیو کې د داعش اړوند راپورونه نشر نه شي ترڅو عامه فکرونو باندې منفي تاثیر ونه کړي او دغه ډله همېشه کوښښ کوي، چې خلکو ته وايي په افغانستان کې داعش وسلوال فزیکي حضور نه لري.
د پاکستان د کورنیو چارو وزیر سرفراز بګټي وویل، چې د طالبانو د کورنیو چارو د وزیر سراج الدین حقاني د پاکستاني پاسپورټ په اړه پلټنې کوي او پایلې به یې له رسنیو سره شریکې کړي. تر دې مخکې دوو پاکستاني خبریالانو ویلي وو چې پاکستان په دې وروستیو کې د حقاني پاکستانی پاسپورټ باطل کړی.
د اعزاز سعید او عمر چیمه په وینا د ښاغلي حقاني پاکستانی پاسپورټ د لومړي ځل لپاره په قطر کې له امریکا سره د طالبانو د خبرو پر مهال کارول شوی و.
د پاکستان د کورنیو چارو وزیر د جمعې په ورځ په یوه خبري غونډه کې په پاکستان کې د استوګنې له اسنادو پرته د بهرنیو اتباعو د شړلو په اړه وویل: "موږ به لومړی په دې اړه پلټنې وکړو، له څېړنو وروسته به یې معلومات له رسنیو سره شریک کړو."
سرفراز بګټي نور وضاحت ور نه کړ.
تر دې مخکې د پاکستان د بهرنیو چارو وزارت ویاندې د سراج الدین حقاني د "پاکستاني پاسپورټ" په اړه له څه ویلو ډډه کړې وه.
زهرا ممتاز بلوڅ وویل چې هغه د معلوماتو په خلا کې ده او دا مهال د دې مسلې ځواب نشي ویلی.
نوموړې د طالبانو د کورنیو چارو د وزیر د "پاکستاني پاسپورت" د باطل کېدو په اړه د راپورونو له رد یا تایید څخه ډډه وکړه.
د چهارشنبې په ورځ، د لیندۍ په ۱۵ مه، دوو مشهورو پاکستاني ژورنالیستانو، اعزاز سعید او عمر چیمه څرګنده کړه، چې د پاکستان حکومت په دې وروستیو کې له حقاني سره په همغږۍ د هغه پاکستانی پاسپورت باطل کړی دی.
د راپورونو له مخې د پاکستان حکومت دوه پاکستاني چارواکي چې ویل کیږي د ښاغلي حقاني د پاسپورت په صادرولو کې یې لاس درلود نیولي دي.
د پاکستان ډان ورځپاڼې لیکلي، چې افغان اتباعو ته له ۳۰ زرو څخه تر ۴۰ زرو پورې پاکستاني پاسپورټونه ورکړل شوي دي.
د دې ورځپاڼې په وینا دغه پاسپورټونه د پاکستان په خیبر پښتونخوا، بلوچستان او سند صوبو کې ویشل شوي دي.
د راپورونو له مخې، پاکستان ټولو افغانانو ته صادر شوي پاسپورټونه باطل کړي دي.
د طالبانو ویاند وايي، د ټول ګډونه حکومت د جوړېدو په هکله له دې ډلې سره چا خبرې نه دي کړې او نه دوی له چا سره د ورته حکومت د جوړېدو ژمنه کړې ده. د ذبیح الله مجاهد دا څرګندونې ګلبدین حکمتیار ته ځواب دی چې وايي، امریکا طالبانو ته د ټول ګډونه حکومت د جوړېدو په هکله نوملړ سپارلی دی.
حو ښاغلی مجاهد زیاتوي: «په دې اړوند د حکمتیار صاحب خبرې سمې نه دي، باید د هیواد مشران بې اسنادو خبرې ونه کړي.»
د نوموړي په خبره، طالبانو له چا سره د ټول ګډونه حکومت د جوړېدو ژمنه نه ده کړې.
خو د افغانستان د حزب اسلامي مشر وايي، امریکا له طالبانو غوښتي چې د دوحې تړون پر اساس ټولګډونه حکومت جوړ کړي.
ګلبدین حکمتیار زیاتوي د ټولګډونه حکومت لپاره امریکا طالبانو ته نوملړ هم سپارلی دی او ور سره یې خبرداری ور کړی، که د دوحې شرطونه پوره نه کړي، د مخالفانو ملاتړ به یې وکړي.
د حزب اسلامي افغانستان ګوند تلوېزون بریا وايي، ګلبدین حکمتیا دا خبرې پرون له هېواد بهر د خپل ګوند ملاتړو ته کړې دی.
هغه زیاتوي، چې په دې وروستیو کې امریکا د طالبانو په اړه خپله لهجه بدله کړې ده او په خپل دريځ کې یې بدلون راوستی دی.
ښاغلی حکمتیار وايي په امریکا کې د یوې نوې جبهې جوړېدو اعلان او په مسکو، تاجکستان او ویانا کې د طالبانو د مخالفو ډلو وروستیو ناستو په اړه وايي چې شاید د پردې ترشا څه وي.
حکمتیار په دې باور دی چې د طالبانو د مخالفو ډلو ناستې د دې لپاره کیږي چې یو شمیر بهرني هیوادونه پر طالبانو فشار راوړی.
د پاکستان د بهرنیو چارو وزارت، د دغه هېواد سرپرست بهرنیو چارو وزیر جلیل عباس جیلاني، د افغانستان په چارو کې د امریکا له ځانګړي استازي ټام ویسټ سره د ليدو خبر ورکړی. په دې لیدنه کې ښاغلي جیلاني د افغانستان د خلکو د هوساینې لپاره د اجتماعي لارو چارو پر اهمیت ټینګار وکړ.
د پاکستان د بهرنیو چارو وزارت د پنجشنبې په ورځ (ليندۍ ۱۶)د جليل عباس جيلاني له قوله لیکلي، چې اسلام اباد د افغانستان په مسله کې له خپلو نړیوالو شریکانو سره همکارۍ ته ژمن دی.
د امریکا ځانګړي استازي د افغانستان پر مسلې د خبرو لپاره د سیمې هېوادونو ته د خپلو سفرونو نوی پړاو پیل کړی دی.
تر دې کتنې مخکې، ښاغلي ويسټ اسلام اباد ته د خپل سفر پر مهال د افغانستان لپاره د پاکستان له ځانګړي استازي اصف دراني سره هم جلا ليدنه کړې.
ښاغلي دراني په خپله ایکس پاڼه لیکلي، چې په دې ناسته کې د افغانستان پر بېلابېلو موضوعاتو او نړیوالو غبرګونونو خبرې وشوې.
د هغه په وينا، په دې کتنه کې دواړو لورو پر لا زياتو همکاريو او همغږۍ ټينګار وکړ.
ټام ویسټ تر دې مخکې اعلان کړی و، چې د افغانستان په سیاسي، اقتصادي او بشري اړتیاوو د خبرو لپاره به پاکستان، متحده عربي اماراتو، قطر او سعودي عربستان ته لس ورځنی سفر وکړي.
