د ملګرو ملتونو د بشري چارو د همغږۍ اداره وايي افغانستان د نړۍ په هغو ۵ هېوادونو کې دی چې وګړي یې تر ټولو ډیرو بشري مرستو ته اړتیا لري. د اوچا د راپور له مخې، دغه اداره اړمنو کسانو ته د مرستو رسولو لپاره د افغانستان په ګډون د ځینې هیوادونو لپاره ۴۶،۴ میلیارد ډالرو ته اړتیا لري.
اوچا دغه راپور نن دوشنبې (د لیندۍ ۲۰مه) خپور کړ او زیاته یې کړه چې، د روان کال د مې او نوامبر میاشتو ترمنځ شاوخوا لس میلیونه کسان د بودیجې د کمښت له امله د خوراکي توکو له مرستو بې برخې پاتې شوي دي.
د اغیزمنو خلکو د ستونزو د حل لپاره د ملګرو ملتونو په غوښتنه کې پنځه لویې غوښتنې شاملې دي چې پکې د سوریې لپاره ۴،۴ ملیارد ډالره، د اوکراین لپاره ۳،۱ ملیارد ډالره، د افغانستان لپاره ۳ ملیارد ډالره، د ایټوپیا لپاره ۲،۹ ملیارد ډالره او د یمن لپاره ۲،۸ ملیارد ډالر شامل دي.
دغه سازمان په ۲۰۲۴ کال کې د ناوړه بشري وضعیت په اړه هم خبرداری ورکړی دی.
د ملګرو ملتونو د بشري چارو همغږي کوونکي مارټین ګریفیټس په دې اړه د ژورې اندیښنې په څرګندولو سره وویل چې، که د راتلونکي کال لپاره د اړتیا وړ بودیجه ترلاسه نشي نو اړو کسانو ته به د مرستو رسول ستونزمن شي.
د هرات اسلام کلا ښاروګوټي کې یو شمیر ډاکټرانو نن دوشنبې د ( لیندۍ ۲۰ مه ) افغانستان انټرنشنل ـ پښتو ته وویل چې د طالبانو د اسلام کلا ښاروالۍ مسوولینو نه یوازې د ناروغانو پر سر مالیه غواړي، بلکې د ډاکټرانو له تنخوا هم مالیه غواړي.
په اسلام کلا کې د یو خصوصي روغتون ډاکټر افغانستان انټرنشنل ـ پښتو ته وویل: «طالبان روغتون راغلل د ډاکټرانو د تنخواګانو او د ناروغانو د تعداد د ثبتولو غوښتنه يې کوله او په دې اړه یې فارم یې پر ټولو روغتونونو او درملتونو ووېشلو ترڅو ډاکټران له خپلو معاشونو او د هر ناروغ پر سر دمیاشتې په پای کې مالیه ورکړي».
په اسلام کلا ښارګوټي کې ډاکتران وايي طالبانو له دې وړاندې د خصوصي روغتونونو له مسوولینو سره کومه مشوره نه ده کړې او دا کار په زور کوي چې ډیری ډاکټران کار پرېښود ته اړ کړی.
هغه فارم چې د هرات اسلام کلا کې د طالبانو ښاروالۍ لخوا ترتیب شوی او پر خصوصي روغتونونو او ډاکټرانو وېشل شوی، یوه کاپي یې افغانستان انټرنشنل پښتو ته هم رسېدلې ده.
د اسلام کلا ډاکټران وايي په ولایت او ولسوالیو کې د طالبانو ځايي چارواکي خپل سري کوي، چې دا به د طالبانو د واکمنۍ او د ولس ترمنځه واټن زیات کړي.
دوی زیاتوي د مالیې راټولو شفاف سیسټم نشتون د دې لامل کیږی چې دغه مالیه هم د ځايي طالب چارواکو شخصي جیبونو ته ځي.
د افغانانو نیوکې دا دي چې یو خوا د طالبانو واکمنېدو سره په هیواد کې اقتصادي وضعیت کړکچین دی او بلخوا د طالبانو له لوري مالیه اخیستل به د نور هم دا وضعیت خراب کړي دي.
