وروسته له هغې چې په غزه کې د اسراییل له خوا د پراخو عملیاتو او بمباریو پر ضد د نړۍ ګڼو هېوادونو خپل اعتراض وکړ، ملګرو ملتونو نن په عمومي غونډه کې د بېړني اوربند پرېکړه لیک تصویب کړ.
فاکس نیوز ویلي، چې دغه پرېکړه لیک چې لازم الاجرا نه دی او تر ډېره یوه سیاسي بڼه لري.
دغه پرېکړه لیک نن د ۱۵۳ موافقو، ۱۰ مخالفو او ۲۳ سپینو رایو په کارولو سره تصویب شو، چې تر اوسه پورې په دې اړه اسراییل څه نه دي ویلي.
په ورته وخت کې نن د غزې په تړانګه کې د اوربند لپاره د نړۍوالو غوښتنو سره - سره د اسراییل د دفاع وزیر اعلان وکړ، چې د حماس سره جګړه به دوام ومومي او ښايي وخت ونیسي.
یواو گالانت له اسوشیټیډ پریس سره په مرکه کې وویل: «موږ له خپل ځانه دفاع کوو او زه د اسراییل د راتلونکي لپاره مبارزه کوم.
الجزیرې خبري چینل راپور ورکړی، چې د اسراییل د دفاع وزیر څرګندونې په غزه کې د اسراییل د سختو ځمکنیو او هوايي عملیاتو د دوام ښودنه کوي چې ښايي څو اونۍ او میاشتې به دوام وکړي.
په عین حال کې د فلسطین د روغتیا وزارت اعلان کړی، چې اسراییلي ځواکونو د غزې تړانګې په شمال کې د کمال عدوان روغتون باندې برید کړی او ور ننوتلي دي.
اسراييلي چارواکو ویلي دي، چې حماس له ملکي تاسیساتو لکه روغتونونو او ښوونځیو څخه کار اخلي.
