له هغه مهاله چې د افغانستان له پولې د تېلو یو شمېر ټانکرونه د بې کیفیته تېلو په نامه بېرته ایران ته ستانه کړای شول، د دواړو هېوادونو تر منځ لانجو ګونچو زور اخیستی. طالبانو په دې ورستیو کې څو ځله د بې کیفیته تېلو په پلمه د ايران د تېلو ټانکرونه بېرته ورګرځولي دي.
د ایران د تېلو د واردونکې ټولنې مشر (معروف خاني) د یکشنبې په ورځ د طالبانو حکومت د دغه اخیستل شوي ګام په غبرګون کې وویل چې افغانستان د تېلو د کیفیت معلومولو ماشینونو دغه پرېکړه نه ده کړې، بلکې د ده په وینا طالب چارواکي له خپلې خېټې دغه شان پرېکړې کوي.
نوموړي په افغانستان کې د طالبانو حکومت په سرحدي ادارو کې د تېلو د کیفیت د سنجونې معیارونه د پوښتنې وړ وبلل.
د دغه ایراني چارواکي له اعتراضه یوه ورځ وروسته د افغانستان د نورم او سټنډرډ ادارې ۱۲ نور ایراني ټانکرونه د فراه ولایت په بندر کې ودرول او د کیفیت د خرابوالي له کبله یې بېرته ایران ته وګرځول.
خو د معروف خاني د ادعا په ځواب کې طالب چارواکي ملا فیض الله تمیم په اېکس پاڼه لیکلي، د افغانستان په پولو کې د تېلو د کیفیت معلومولو له پاره پرمختللي او سمبال لابراتوارونه د افغانستان په واک کې دي، ایراني چارواکي د دې پر ځای چې نیوکې وکړي باید د خپلو تیلو کیفیت ته پاملرنه وکړي.
بې کیفیته تېل، چې عموماً یې د سُربو اندازه زیاته وي، د سرطاني او نورو خطرناکو ناروغیو سبب کېږي.
