د اسراییل پوځ ویلي، چې فلسطیني اورپکو د غزې په یو ګڼ مېشته سیمه کې پر اسرايیلي پوځیانو برید کړی او نهه اسراییلي عسکر یې وژلي. دا په داسې حال کې ده، چې اسراییلي پوځیان په هغو سیمو کې چې له دوو میاشتو راهیسې په پراخه توګه بمبار شوې وې، د حماس له سخت مقاومت سره مخامخ شوي دي.
د اسراییل هوايي او ځمکنۍ جګړې په زرګونو فلسطینیان وژلي او د غزې نېږدې ۸۵ سلنه وګړي یې له خپلو کورونو وتلو ته اړ کړي دي او دغې چارې د نړۍوالو غوسه یې راپارولې ده.
امریکا په وار-وار پر اسراییل غږ کړی، چې د ملکي خلکو د ژغورنې لپاره لا زیات پام وکړي؛ خو خپله یې د اوربند لپاره د نړۍوالو غوښتنو مخه نیولې او اسراییل سره یې د پام وړ پوځي مرستو ته دوام ورکړی دی.
پر اسراییل د اکتوبر د اوومې د برید په غبرګون کې اسراییل پوځیانو شاوخوا شپږ اونۍ مخکې د غزې شمالي سیمې اشغال کړې؛ خو د دغه مودې په تېرېدو سره دوی لا هم له فلسطیني جنګیالیو سره په سختو نښتو کې ښکیل دي.
د چهارشنبې په ورځ او شپه د غزې په بیلابیلو سیمو کې نښتو دوام درلوده، دغه نښتې په شجایه سیمه کې ډېرې سختې وې، چېرې چې په ۲۰۱۴ کال کې هم د اسراییل او حماس ترمنځ سختې جګړې شوې وې.
مصطفی ابو طه یو فلسطیني چې په سیمه کې اوسي د ټیلیفون له لارې اسوشییتید پریس خبري اژانس ته ویلي:"دا ډارونکی وضعیت دی. موږ خوب نه شو کولی، وضعیت مخ په خرابېدو دی او موږ د تګ لپاره خوندي ځای نه لرو."
د اسراییل پوځ ویلي، هغو څلورو پوځیانو سره یې اړیکه پرې شوې، چې سې شنبې په ورځ یې په شجیه کې د ودانیو تالاشي کوله او وروسته له هغه چې نورو عسکرو غوښتل دغه سرتېري پېدا کړي، پر هغوی د فلسطیني جنګیالیو له خوا د درنو او سپکو وسلو بریدونه شوي دي.
په نهو وژل شویو کسانو کې ۴۴ کلن ډګروال اِتزاک بن باسات تر ټولو جګپوړی افسر دی، چې د ځمکنیو عملیاتو له پیل راهیسې تر اوسه وژل شوی دی.
