د بشري حقونو څار سازمان په خپله پاڼه لیکلي، چې د نیپال لیرې پراته کرنالي ولایت کې له خونړۍ زلزلې د یوې میاشتې له تېرېدو وروسته زلزله ځپلي له یخنۍ مري؛ ځکه چې حکومت د دغه کسانو د ژوندي پاتې کېدو په برخه کې د لومړنیو اړتیاوو په برابرولو کې پاتې راغلی.
په لسگونو زره کورنۍ اوس هم د ژمي په را رسېدو سره تر خېمو او ترپالونو لاندې شپې سبا کوي.
د نومبر په درېیمه د رېښتر په کچه د ۶.۴ درجې په لویوالي یوې زلزلې په نیپال کې ۱۵۴ کسان مړه کړل.
د نیپال په جاجرکوټ ولسوالۍ کې ځايي چارواکي وايي، په دغې زلزله کې د خلکو په کورونو کې په زرګونه ټنه خوراکي توکي له منځه تللي دي.
د راپورونو له مخې، په دې وروستیو کې د څلورو کوچنیانو په ګډون لږ تر لږه ۳۲ کسان چې ډېری یې په سیخ او بریښ یا سینه بغل ناروغۍ اخته وو، مړه شوي دي.
روغتیایي کارکونکي هم په سیمه کې د کولرا د احتمالي ناروغۍ خبرداری ورکړی.
په نیپال کې زلزله ځپلو ته د مرستو په وېش کې د سیاسي لاسوهنې ادعاوې شوې دي.
تر دې وړاندې هم نیپال په ۲۰۱۵ کال کې له یوې ویجاړونکې زلزلې سره مخامخ شوی و، چې شاوخوا ۹ زره کسان یې مړه کړي او میلیونونه یې بې کوره کړي وو.
