د پاکستان د لنډمهالي حکومت د بلوچستان ایالت د اطلاعاتو وزیر په افغانستان کې د القاعده او نورو ترهګرو پټنځاینونو په نښه کولو لپاره د امریکا د بې پیلوټه الوتکو اډې وړاندیز کوي او وايي، په افغانستان کې باید ځانکړي هدفي عملیات تر سره شي.
د پاکستان لنډمهالي حکومت د بلوچستان ایالت د اطلاعاتو وزیر جان اڅکزي د چهار شنبې په ورځ د (لیندۍ ۲۲مه) په دیره اسماعیل خان کې د پولیسو پر مرکز برید ته په اشارې پر خپلې اېکس پاڼه لیکلي، «د بنو ترهګریز برید د پاکستان د ملي امنیت ټولې سرې کرښې تر پښو لاندې کړې. موږ باید په افغانستان کې د غچ اخیستونکو بریدونو په اړه فکر وکړو.»
نوموړي په افغانستان کې د پاکستان له لوري د ځانګړو هدفي عملیاتو، هوايي بریدونو، له افغانستان سره د پولو تړلو، د ټولو افغان کډوالو اېستلو او په اسلام اباد کې د طالبانو پرضد د سیاسي اپوزیسیون د غونډې د جوړیدو وړاندیزونه کړي.
همدارنګه اڅکزی په افغانستان کې د القاعده او نورو ترهګرو د پټنځایونو په نښه کولو لپاره په پاکستان کې د امریکا د بې پیلوټه الوتکو د اډې جوړیدو غوښتنه هم کوي.
جان اڅکزي تر دې وړاندې هم په پاکستان د بریدونو پړه پر افغانستان اچولې او ويلي یې و چې نور د افغان طالبانو دوه ګوني لوبه ورته د زغملو نه ده.
نوموړی دغه څرګندونې په داسې حال کې کوي چې تېره ورځ د پاکستان د خیبرپښتونخوا په دېره اسماعیل خان کې د پولیسو پر مرکز برید کې ۲۳ پولیس ووژل شول.
