د طالبانو د کورنیو چارو وزیر سراج الدین حقاني د جاپان له سفیر تاکایوشي کورومیا سره په لیدنه کې په افغانستان کې د نشه یي توکو پر وړاندې د مبارزې په برخه کې د نړۍوالو د مرستې غوښتنه وکړه.
د طالبانو د کورنیو چارو وزارت د خبرپاڼې له مخې؛ حقاني ویلي چې نړۍواله ټولنه باید د کوکنارو د بدیل کښت په ترویج کې له کروندګرو سره مرسته وکړي.
دغه وزارت ویلي؛ په دې کتنه کې د جاپان سفیر ژمنه وکړه چې هېواد به یې له نشه يي توکو سره د مبارزې، روغتیا او له هغو کډوالو سره د مرستې په برخو کې خپلو مرستو ته دوام ورکړي، چې بېرته هېواد ته راستانه شوي دي.
د طالبانو د کورنیو چارو وزارت زیاته کړه، چې سراج الدین حقاني له نړۍوالې ټولنې غوښتي چې د نشه یي توکو د له منځه وړلو او کنټرول لپاره د بدیل کښت په پراختیا کې له افغان بزګرانو سره همکاري وکړي.
طالبانو د خپلې واکمنۍ په دوو کلونو کې له نشه يي توکو سره د مبارزې خبر ورکوي؛ خو د ملګرو ملتونو له نشه يي توکو او جرمونو سره د مبارزې دفتر اټکل کړی، چې افغانستان په ۲۰۲۲ کال کې د نړۍ ۸۰ سلنه تریاک تولید کړی دی.
له دې وړاندې د ایران یو شمېر چارواکو هم ویلي وو، چې په افغانستان کې د تریاک کښت او قاچاق زیات شوی دی.
د طالبانو د چارو ادارې لوی رياست پر خپلې اېکس پاڼې لیکلي، چې نن چهار شنبه ( د لیندۍ ۲۲مه) د ملي تدارکاتو رياست د تدارکاتي چارو د لاښه والي او شفافيت په موخه د برېښنايي تدارکاتو سيسټم پرانیست.
د ملي تدارکاتو مشر عبدالولي صديقي په دې اړه په جوړه شوې غونډه کې د وینا پرمهال وویل، چې له دغه سیسټم سره به په تدارکاتي بهير کې رونټیا، چټکتيا او اساني رامنځته شي.
خو د ۲۰۲۱ کال د اګسټ لومړۍ نېټه د "ډیجیټل افغانستان اونۍ" پروګرام وروستۍ ورځ وه، چې پکې پخواني ولسمشر اشرف غني د ارګ سربېره د تدارکاتو او یو شمېر وزارتونو ډیجیټل پروګرامونه پرانیستل.
د چارو ادارې د تدارکاتو ریاست یو کارکوونکی چې د نوم له ښودلو ډډه کوي افغانستان انټرنشنل - پښتو ته وویل، چې د تدارکاتو دا سیسټم د پخواني ولسمشر اشرف غني د واکمنۍ پر مهال د چارو ادارې په تخنیکي مرسته جوړ شوی او تر اوسه هم فعال ساتل شوی دی.
نوموړي وویل: " دلته اکثره پخواني کارمندانو رییس ته وویل، چې دا سیسټم پخوانی دی او که یې بیا پرانیسته کوئ، اکثرو خلکو او رسنیو ته یې په اړه معلومات شته؛ خو رییس د چا خبره نه اوري".
دغه سرچینه وايي، چې د ولسمشرۍ ماڼۍ اکثرو سیسټمونو برېښنايي چارې د چارو د ادارې پخواني مشر فضل محمود فضلي له خوا ترسره شوې وې.
د ملي تدارکاتو ریاست دغه کارکوونکی وايي، چې دا سیسټم له هغه وخته چې جوړ شوی تر اوسه فعال دی او هېڅ ځنډ پکې نه دی راغلی.
طالبانو په تېرو څه باندې دوو کلونو کې یو شمېر هغه تکراري پروژې بیا پرانیستي چې پخوا د جمهوریت پرمهال یو ځل پرانېستل شوې وې؛ خو ځیني یې د ناسم مدیریت له امله له ځنډ سره مخ شوي دي.
