د لومړي ځل لپاره، روسیې د دوو بهر توکمه اتباعو روسی تابعیت د پوځي خدمت نه کولو له امله لغوه کړ. اینټرفاکس خبري اژانس د جمعې په ورځ خبر ورکړ چې په روسیه کې یوې محکمې له هیواد څخه د دغو دوو کسانو د ایستلو حکم صادر کړ.
اینټرفاکس د روسیې د کورنیو چارو وزارت په حواله ویلي چې دغه دوه کسان ۲۱ او ۲۴ کلن دي. تر اوسه د دغو دوو کسانو د هویت په اړه نور جزیات نه دي په ډاګه شوي.
د راپورونو له مخې له دغو دوو کسانو غوښتل شوي و چې په ۱۴ ورځو کې په پوځ د ثبت ادارې ته حاضر شي.
د افغانستان په ګډون د منځنۍ اسیا د ځینو هېوادونو اتباعو په وروستیو کلونو کې د روسیې تابعیت اخیستی دی.
د روسيې او اوکراين تر منځ د جګړې له پيلېدو وروسته دغه دوه ګوني اتباع د پوځ له لیکو تښتیدلي چې يو شمېر خپلو او يا نورو هېوادونو ته تللي.
په ورته مهال، د نړۍ په نورو سیمو کې د شخړو په زیاتیدو سره، د دغو اتباعو ځینې بیرته روسیې ته ستانه شوي دي.
پر اوکراین له یرغل وروسته روسیې د خپلو پوځیانو استخدام زیات کړ. د اوکراین له جګړې مخکې په روسیه کې پوځي خدمتونه اجباري وو.
د روسیې د کورنیو چارو وزارت یوې چارواکي الینا دوبینکو ویلي، د هغو دوو کسانو روسي پاسپورتونه چې له پوځ تښتېدلي، ضبط شوي دي.
د اینټرفکس خبري اژانس د روسي چارواکو په حواله ویلي چې د څو نورو کسانو د تابعیت د محرومولو موضوع تر غور لاندې ده.
