د بخښنې نړۍوال سازمان وايي، د طالبانو له بنده د ښځو د بشري حقونو مدافع ندا پرواني او د هغې د خاوند د خوشې کېدو هرکلی کوي. دغه سازمان پر خپله اېکس پاڼه لیکلي، د مېرمن پرواني خوشې کېدل یو مثبت پرمختګ دی.
ندا پرواني چې څه موده وړاندې له خپل خاوند او ماشوم سره په کابل کې نیول شوې وه، د چهارشنبې په ورځ په ضمانت خوشې شوې ده.
د بخښنې نړۍوال سازمان یوځل بیا د ښځو حقونو د مدافعینو ژولیا پارسي، منیژې صدیقي او پریسا د سملاسي خوشې کېدو غوښتنه کړې ده.
طالبانو د ندا پرواني د خوشې کېدو په اړه تر اوسه څه نه دي ویلي.
په چمن کې د روان پرلت ګدونوالو نن د پرلت په ۵۸مه ورځ وویل، د دوی مشران په اسلام اباد کې له مرکزي حکومت سره په خبرو لګیا دي او تر راتلونکې جمعې یې وخت ورکړی که یې غوښتنې و نه منل شي؛ نو دوی به په سترو لاریونونو لاس پورې کړي او مرکزی حکومت ته به لا زیات سرخوږی ورپېښ کړي.
د پرلت یو ګډونوال پهلوان غوث الله افغانستان انټرنشنل پښتو ته وویل:« په تېرو شاوخوا دوو میاشتو کې د چمن او سپین بولدک د اوسېدونکو کارونه په ټپه ولاړ دي او موږ د سهار او د ماښام له پاره خواړه نه شو موندلای. موږ به هره ورځ له چمن دروازې یوې او بلې خوا ته مالونه وړل او خواري غریبي مو کوله؛ خو له هغه مهاله چې پاکستاني چارواکو دغه ظالمانه پرېکړه کړې زموږ ټول کاروبار خراب شوی دی موږ دا نور نه شو زغملای.»
پهلوان غوث الله زیاته کړه، همدغه تېره ورځ یې د یو پرلت وال د ماشومې لور جنازه وه چې پلار یې د وزګارتیا په وجه هغې ته دارو درمل نه شوای اخیستی او د ورپېښې ناروغۍ له امله یې ساه ورکړه.
د پرلت نور ګډونوال وايي، چې څو ورځې وړاندې د پښتونخوا ملي عوامي ګوند مشر محمود خان اڅکزی د دوی پرلت ته ورغلی و او د دوی ټولې غوښتنې یې واورېدې او له دوی سره یې ژمنه وکړه، چې په اسلام اباد کې به د حکومتي چارواکو سره د دوی ستونزې شریکې کړي.
ښاغلي اڅکزي له پرلت وهونکو غوښتي، چې تر راتلونکې جمعې ورځې دې دوی له سترو مزاحمتونو ډډه وکړي او که غوښتنې یې و نه منل شوې؛ بیا دوی کولای شي چې سترو لاریونونو ته مخه کړي.
دغه پرلت ۵۸ ورځې وړاندې له هغې وروسته پیل شو، چې پاکستاني چارواکو د چمن په دروازه په پاسپورټ او ویزو تګ راتګ جبري کړ؛ خو پرلت کوونکي وايي چې دوی د پخوا په څېر په دغه دروازه غواړي په تذکرو او شناختي کارډونو تګ راتګ وکړي.
تر دې وړاندې یو شمېر وکیلانو، سیاستوالو او د بلوچستان ډاکټرانو هم په دغه پرلت کې له پرلت والو سره برخه اخیستې وه او د پاکستان دغه پرېکړه یې ظالمانه بللې وه.
هغوی دا هم ویلي وو، چې د پاکستان لنډمهاله اداره په حقوقي لحاظ د دغسې پرېکړو واک نه لری.
د امریکا د ملي امنیت پخواني سلاکار له افغانستان انټرنېشنل سره په مرکه کې ویلي: «کاش امریکا هیڅکله هم له بګرام پوځي اډې نه وای وتلې.» جان بولټن له افغانستانه د امریکايي او ناټو ځواکونو د وتلو پرېکړه یوه «ویجاړوونکې تېروتنه» بللې ده، چې ور سره طالبان پر دغه هېواد بیا واکمن شول.
بولټن د امریکا د پخواني ولسمشر ډونالډ ټرمپ د ملي امنیت سلاکار و. د هغه په باور، له افغانستان څخه د امريکا په وتلو سره به د سيمې هېوادونه لکه ايران، چين او روسيه هڅه وکړي، چې له دغه وضعيت ګټه پورته کړي.
د امریکا د حکومت دغه پخواني چارواکي ویلي چې له طالبانو سره د ډونالډ ټرمپ خبرې یوه «تیروتنه» وه او جوبایډن دا «تیروتنه» تکرار کړه.
بولټن له طالبانو سره د بګرام پوځي اډې په اړه د معاملې په تړاو د ټرمپ وروستیو څرګندونو ته په اشارې سره ویلي، ټرمپ پوهېږي چې له طالبانو سره په مذاکراتو کې یې تېروتنه کړې او اوس اندېښمن دی.
بولټن هیله څرګنده کړه چې په افغانستان کې به د مقاومت ځواکونه خپلو موخو ته ورسېږي او یو مشروع حکومت به جوړ کړي، چې امریکا وکولای شي بګرام ته د ستنېدو شرایط وڅېړي.
د امریکا د حکومت دغه پخواني چارواکي زیاته کړه چې د افغانستان د وضعیت د بدلیدو یوازینۍ لاره د طالبانو د رژیم بدلول او په افغانستان کې د یوه مسوول نظام رامنځ ته کول دي.
جان بولټن له افغانستان انټرنېشنل سره په مرکه کې ویلي، چې پر طالبانو باور کول "خطرناک" دي او تر هغه چې نړیوال ترهګر افغانستان ته تللی شي، طالبان به د امریکا او د امریکا د ملګرو هیوادونو لپاره یو ګواښ وي.
د هغه په وينا، افراطيت د طالبانو د ایډیولوژی برخه ده او دغه ډله د "ترهګرو لپاره د جنت" په برابرولو سره افغانستان او نړۍ ګواښي.
هغه ټینګار وکړ چې دی هیله من دی چې امریکا به طالبان په رسمیت ونه پیژني، ځکه چې د ده په وینا طالبانو له افغانستان او امریکا سره له خپلو ژمنو سرغړونه کړې او د طالبانو په رسمیت پیژندل یوه بله «تیروتنه» ده.
جان بولټن افغانستان ته د امریکا د راتګ د احتمال په اړه وویل، دی هیله من دی چې جمهوري غوښتونکي په راتلونکو ولسمشریزو ټاکنو کې د یوه مسوول نوماند په درلودلو له طالبانو سره شوې هوکړې له پامه وغورځوي او په افغانستان کې د طالبانو پر وړاندې مقاومت ځواکونه په رسمیت وپیژني.
بولټن طالبانو ته د امریکا له خوا د نغدي کڅوړو د استولو په اړه هم وویل چې دا بشري مرستي دي او که د طالبانو لاس ته ورسیږي دا ډېر ناسم کار دی.
هغه څرګنده کړه چې د امریکا حکومت پوهیږي چې له افغانستان څخه په وتلو سره یې څه ګناه کړې او امریکا باید داسې څه ونه کړي چې طالبان ور سره پیاوړي او دوام سبب یې شي.
ښاغلي بولټن زیاته کړه چې له طالبانو سره هر ډول مرسته به دغه ډله لا پیاوړې کړي.
بګرام هوايي اډه د شاوخوا شلو کلونو لپاره په افغانستان کې د ترهګرۍ ضد جګړه کې د امریکايي ځواکونو تر ټولو مهمه او لویه اډه وه، چې په افغانستان کې د امریکا د حضور پر مهال ان تر یو لک امریکايي پوځیان هم پکې دیره وو.
دغه ستراتیژیکه اډه په ۱۹۸۰یمه لسیزه کې د پخواني شوروي اتحاد ځواکونو جوړه کړې وه او د ۲۰۰۱ کال له ډسمبر د ۲۰۲۱ کال تر جولای پورې د امریکا په مشرۍ د ایتلافي ځواکونو اصلي مرکز و.
جنیوا کې د کډوالو په نړیوال فورم کې د ایران استازي وویل، د کډوالو پر داوطلبانه ستنیدو سربیره باید د نویو بې ځایه کیدو مخه ونیول شي او د افغانانو د جبري کډوالۍ عوامل له منځه یووړل شي. عبدالله موبیني وویل، ټول شموله حکومت باید د نجونو او ښځو لپاره د زدکړو او کار زمینه برابره کړي.
ایسنا خبری اژانسد جمعې په ورځ د ليندۍ پر ۲۴ مه په يوه راپور کې ويلې، چې د ایران د اسلامی جمهوریت د کورنیو چارو وزارت د کډوالۍ ملي ادارې مشر په دغه کتنه کې وویل، څه د پاسه اوه سوه زره افغان محصلین په ایران کې په زدکړو بوخت دی.
د رسنیو د راپورونو له مخې دا مهال په ایران کې زرګونه افغان ماشومان او تنکي ځوانان د زدکړو له حقه بې برخې دي.
همدا ډول ایران هم د دغه هېواد په ۱۶ ښارونو کې د افغان اتباعو پر حضور بندیز لګولی دی.
دغه ایراني چارواکي پر نړیواله ټولنه نیوکه کړې او ویلي یې دي، چې د نړیوالې ټولنې له خوا ایران ته د ورکړل شویو مرستو اندازه «د کډوالو د کوربه توب لپاره ډېره لږ ده او د کوربه توب د لګښتونو له يو سلنې هم کمه ده.»
ښاغلي موبیني ادعا وکړه، چې په هرات کې له خونړۍ زلزلې وروسته له دغې پېښې اغېزمن کسان ایران ته کډوال شوي دي.
دغه ایراني چارواکي له ایران افغانستان ته د اخراج شویو کډوالو احصایې وړاندې نه کړې.
په وروستیو میاشتو کې ایران او پاکستان د افغان کډوالو د جبري ایستلو بهیر ګړندی کړی دی.
په تېرو څو میاشتو کې د ایران او پاکستان له بېلابېلو ښارونو لسګونه زره افغان کډوال افغانستان ته ستانه شوي دي.
د کډوالو نړیوال فورم د چهار شنبې په ورځ د ليندۍ ۲۲ مې نیټې د جمعې د ليندۍ ۲۴ پورې د سویس په جنیوا کې جوړ شوی دی.
د افغانستان د فوټبال فدراسیون د معلوماتو له مخې، د اسيا فوټسال د ملتونو جام د سياليو مهالوېش معلوم او افغانستان به په ډي ګروپ کې له د دريو اسيايي هيوادونو ایران، بحرين او کویټ سره ولوبيږي.
دغه سيالۍ به د راتلونکي زېږديز کال د اپرېل مياشتي په ۱۷ نېټه پيل او تر ۲۸ نېټې به دوام وکړي.
د افغانستان فوټبال فدراسيون د معلوماتو له مخي، چې يادې سيالۍ به تایلنډ هيواد کې تر سره شي.
دغه سیالۍ په څلورو ګروپونو کې کېږي.
په لومړي (اې) ګروپ کې کوربه هېواد تایلنډ، ويتنام، يمن او چين لوبډلې
په دوهم (بي) ګروپ کې ازبکستان، سعودي عربستان، عراق او اسټرليا لوبډلې
او په دريم (سي) ګروپ کې به جاپان، تاجکستان، کوریا او د قرغزستان فوټسال لوبډلې يو د بل په وړاندي ولوبيږي.
تر دې مخکي هم د افغانستان فوټسال ملي لوبډلې په ګڼو نړیوالو سیالیو کې لوبې کړې دي.
د جرمني په برندینبورګ ایالت کې هغه افغان ځوان ته د زړورتیا او شجاعت ستاینلیک ور کړل شو، چې څو میاشتې وړاندې یې یو ۹ کلن جرمن ماشوم په اوبو کې له ډوبېدو بچ کړی و. دغه ځوان بشیر احمد دانشمل نومیږي، د افغانستان لغمان ولایت اوسیدونکی دی او له څه مودې راهیسې په جرمني کې استوګن دی.
دغه ځوان بشیر احمد دانشمل نن افغانستان انټرنشنل ـ پښتو ته وویل چې تېر اګست میاشت کې یې یو ۹ کلن جرمن ماشوم د برندینبورګ ایالت په یو سند کې اوبو اخیستی و او د ځان ژغورلو لپاره یې لاسونه اچول، خو څه یې په وس پوره نه و.
دی وایي، کله یې چې ماشوم د مرګ او ژوند ترمنځ ولید، نو اوبو ته یې ور ټوپ کړل او دغه ماشوم یې له مرګ وژغوره.
دی زیاتوي وروسته دغه ماشوم د جرمني ځايي چارواکو د امبولانس الوتکې له لارې روغتون ته انتقال کړ.
بشیر احمد دانشمل وايي دوه ورځې وړاندې له ایالتي ښاروالۍ ورته زنګ راغی او ورته وویل شول چې د پنچشنبې «پرون» په ورځ تاسو د ښاروالۍ تالار کې دعوت یاست.
نوموړی وايي، نه پوهېده چې هلته څه خبره ده، خو کله چې پرون ښاروالۍ ته ورغی، نو مالومه شوه چې د ستایلو لپاره ځانګړي مراسم ور ته جوړ شوي دي.
دی زیاتوي د برندینبورګ ایالتي چارواکو لخوا تقدیر شوو او ډالیو باندې ونازول شوو.
دغه افغان ځوان افغانستان انټرنشنل ـ پښتو وویل: «زه په دغه هیواد کې اوسیږم او د دې ځای خلک چې دي هغوي باید خپل خلک وګڼو ځکه همدغه هیواد مونږ ته په سختو حالاتو ځای راکړی او امن یې راکړی دی.»
دی له ټولو افغانانو غواړي چې کومو هیوادونو کې د کډوالۍ ژوند کوي هیواد او خلک یې خپل وګڼي ترڅو د افغانان نوم تل روښانه او نېک پاتې شي.